რუსეთის საგარეო საქმეთა მინისტრმა სერგეი ლავროვმა რუსეთის პრეზიდენტს ვლადიმერ პუტინს რუსეთიდან 35 ამერიკელი დიპლომატის და სანკტ-პეტერბურგში ამერიკის გენერალური საკონსულოს 4 თანამშრომლის გაძევება შესთავაზა.
საპასუხო ნაბიჯების ფარგლებში რუსეთის საგარეო საქმეთა მინისტრმა პრეზიდენტს ასევე შესთავაზა ამერიკული დიპლომატიური მისიის წარმომადგენლებისთვის „სერებრიანი ბორში“ აგარაკითა და მოსკოვში მდებარე საწყობით სარგებლობის აკრძალვა.
„ბრალდებები, რომ რუსეთი აშშ-ის საპრეზიდენტო არჩევნებში ჩაერია უსაფუძვლოა“, - განაცხადა სერგეი ლავროვმა.
წინასაარჩევნოდ კიბერ თავდასხმებთან დაკავშირებით, თეთრმა სახლმა უპრეცედენტო გადაწყვეტილება მიიღო. ბარაკ ობამა 35 რუს დიპლომატს ქვეყნიდან აძევებს და მათ გვარებს ასაჯაროებს.
აშშ-ის მოქმედი პრეზიდენტი, რუსეთის მთავრობის უმაღლეს წარმომადგენლებს თავდასხმებში ადანაშაულებს.
გარდა ამისა, თეთრმა სახლმა მერილენდსა და ნიუ-იორკში რუსეთის ყველა დიპლომატიური მისიის დახურვა გადაწყვიტა. რუსმა დიპლომატებმა აშშ-ის ტერიტორია 72 საათის განმავლობაში უნდა დატოვონ.
