ჩვენ გვაქვს ყველაზე მეტი ეკონომიკური ზრდა მთელს ევროპასა და ჩვენს სამეზობლოში, - აღნიშნული განცხადება პარლამენტის პლენარულ სხდომაზე, 2017 წლის სახელმწიფო ბიუჯეტის პროექტის განხილვისას საფინანსო-საბიუჯეტო კომიტეტის თავმჯდომარის პირველმა მოადგილემ პაატა კვიჟინაძემ გააკეთა.

მისი შეფასებით, 2017 წლის ბიუჯეტი არის დაბალანსებული და ყველა იმ მოთხოვნას აკმაყოფილებს, რომელიც გათვალისწინებულია კანონმდებლობით და ევროპული სტანდარტით.

”თავის დროზე, ”ნაციონალურმა მოძრაობამ” მიიღო კანონი ეკონომიკური თავისუფლების შესახებ, სადაც გაწერილია, თუ როგორი უნდა იყოს კარგი ბიუჯეტი. ამ კანონის თანახმად, ხარჯები არ უნდა აღემატებოდეს 30%-ს - დღეს არის 29%. კანონის თანახმად, სახელმწიფოს ვალი არ უნდა აღემატებოდეს 60%-ს - დღეს არის 44%. გარდა ამისა, ბიუჯეტის დეფიციტი არ უნდა იყოს 3%-ზე მეტი - ჩვენ ბიუჯეტის დეფიციტი 2%-იც არ გვაქვს. ამავე დროს, სავალუტო ფონდთან შეთანხმებით, ეკონომიკური ზრდა არის 4%. ჩვენ რა თქმა უნდა, მეტი გვინდა, მაგრამ ვთხოვ ყველას, ნახოს სავალუტო ფონდის მიერ ოქტომბერში გამოქვეყნებული ანგარიში - ჩვენ გვაქვს ყველაზე მეტი ეკონომიკური ზრდა მთელს ევროპაში და ჩვენს სამეზობლოში, მათ შორისაა: თურქეთი, სომხეთი, აზერბაიჯანი, რუსეთი, მოლდოვა და ასე შემდეგ. ინფლაცია არის 4%-ის ფარგლებში. სავალუტო რეზერვები ბანკს აქვს 2-მილიარდ 700 მილიონი, რომელიც ნორმაზე მეტია. ასე რომ ბიუჯეტი არის დაბალანსებული და გამართული”, - განაცხადა პაატა კვიჟინაძემ.