საქართველოს ეკონომიკისა და მდგრადი განვითარების მინისტრობის კანდიდატმა გიორგი გახარიამ საპარლამენტო უმრავლესობასთან გამართულ შეხვედრაზე დეპუტატების მიერ დასმული კითხვების საპასუხოდ რამდენიმე საკითხზე ისაუბრა: ,,მცირე და საშუალო ბიზნესის სექტორი ქვეყნისთვის ძალიან სერიოზული დამსაქმებელი უნდა გახდეს. ბიზნესგარემო მუდმივ გაუმჯობესებას საჭიროებს. აქ საჭირო არ არის რაიმე პერმანენტულ, კონკრეტულ გეგმებზე საუბარი, რადგან ჩვენ საკმაოდ კონკურენტულ გარემოში ვცხოვრობთ - ჩვენ ვაკეთებთ და ჩვენი კონკურენტი სახელმწიფოები თანდათანობით გვეწევიან. ამას საკმაოდ კარგად აჩვენებს „დუინგ ბიზნესში“ არსებული დინამიკა - ჩვენ შეგვიძლია ერთი-ორი საფეხურით უკან დავიწიოთ, შემდეგ გავატაროთ გარკვეული რეფორმები და ისევ წინ წავიდეთ და ა.შ. ეს არის გარკვეული დინამიკა და მუდმივი პროცესი“ – განაცხადა გიორგი გახარიამ.
მინისტრობის კანდიდატის თქმით, ძალიან მნიშვნელოვანია და გაგრძელდება გიორგი კვირიკაშვილის ინიციატივით შექმნილი პროგრამები. „მათ შორის პროგრამა „აწარმოე საქართველოში,“ რომელიც ძირითადად საშუალო ბიზნესზეა ფოკუსირებული. ასევე მცირე ბიზნესის ნაწილში გაგრძელდება მიკრო გრანტების პროგრამა, რომელიც, ფაქტობრივად, რეგიონში ადამიანს საშუალებას აძლევს, კომერციული საქმიანობის პირველი ნაბიჯები გადადგას და ასე ვთქვათ, მის მიერ ნაშოვნი ფული „იგრძნოს“. ვფიქრობ, ჩვენი მაჟორიტარი დეპუტატები, ყველა შეხვედრია ფენომენს, თუ რამდენად წარმატებული იყო ეს პროგრამა“ – აღნიშნა გიორგი გახარიამ.
გახარიას შეფასებით, უნიკალური პროგრამაა ასევე სტარტაპების დაფინანსება, რომელიც ხელს უწყობს ახალგაზრდების ბიზნესპროცესებსა და სამეწარმეო აქტივობებში ჩართვას. „ რა თქმა უნდა, გაგრძელდება ინოვაციური პროექტების დაფინანსება და ეს ყველაფერი ძირითადად მიმართულია მცირე და საშუალო ბიზნესის მხარდასაჭერად. ყველა ეს პროგრამა წარმატებით მუშაობს და გაგრძელდება. ერთადერთი, რაც შეგვიძლია ამ მიმართულებით გავაკეთოთ, ამ პროგრამების ეფექტიანობის გაზრდაა, რისთვისაც ძალ-ღონეს არ დავიშურებთ“– აღნიშნა გიორგი გახარიამ.
