ამაყი ვარ, რომ საქართველოს გენერალური შტაბის უფროსი გამოცდილი პროფესიონალი იქნება, - ამის შესახებ ეროვნული უშიშროების საბჭოს მდივანმა დავით რაქვიაშვილმა ჟურნალისტებს საბჭოს სხდომის დასრულების შემდეგ განუცხადა.
როგორც რაქვიაშვილმა აღნიშნა, უშიშროების საბჭომ პრეზიდენტს ვლადიმერ ჩაჩიბაიას კანდიდატურა წარუდგინა, რომლის თაობაზეც გადაწყვეტილებას პრეზიდენტი უშუალოდ ჩაჩიბაიასთნ შეხვედრის შემდეგ მიიღებს.
”პრეზიდენტი დღეს შეხვდება ჩაჩიბაიას და ხვალ მთავრობას ამ საკითხთან დაკავშირებით საკუთარ მოსაზრებას გაუგზავნის. ვლადიმერ ჩაჩიბაია ძალიან მნიშვნელოვან პოზიციას იკავებდა გენერალურ შტაბში. ის იყო გენერალური შტაბის უფროსის მოადგილე. აქვს ძალიან დიდი გამოცდილება საერთაშორისო მისიებში მუშაობის და ასევე საერთაშორისო პარტნიორებთან ურთიერთობის. მე პირადად მას ვიცნობ და ამაყი ვარ, რომ საქართველოს გენერალური შტაბის უფროსი ასეთი გამოცდილი პროფესიონალი იქნება”, - განაცხადა დავით რაქვიაშვილმა.
შეგახსენებთ, რომ გენერალური შტაბის უფროსს, ვახტანგ კაპანაძეს უფლებამოსილების ვადა 22 ნოემბერს ეწურება და მის შემცვლელად პრეზიდენტს კაპანაძის მოადგილის, ვლადიმერ ჩაჩიბაიას კანდიდატურა ეროვნული უშიშროების საბჭოს დღევანდელ სხდომაზე წარედგინა.
