ჩვენ ვერ გადავდგით ის აუცილებელი ნაბიჯები ქვეყნის დემოკრატიული განვითარებისა და სახელმწიფოს ფუნდამენტის გამყარებისკენ, რაც კოალიცია “ქართული ოცნების“ მიერ 2012 წელს და 2012 წლის შემდგომ იყო დაგეგმილი, - ამის შესახებ ჟურნალისტებთან შეხვედრისას დავით უსუფაშვილმა განაცხადა, რომელმაც პარლამენტის თავმჯდომარის რანგში დღეს ბოლო პრესკონფერენცია გამართა.
დავით უსუფაშვილის შეფასებით, საპარლამენტო არჩევნების შედეგად ვერ მივიღეთ ისეთი შემადგენლობის პარლამენტი, სადაც ჯანსაღი კონკურენცია და პოლიტიკურ ძალებს შორის ოპონირება იქნება შესაძლებელი.
“ჩვენ ვერ მივიღეთ უფრო მრავალპარტიული, უფრო ეფექტური პარლამენტი, მაგრამ მივიღეთ პარლამენტი, რომელსაც აქვს საშუალება იყოს ძალიან პროდუქტიულიც და ეფექტურიც, მაგრამ არის ხიფათის დამშვებიც იმ კომპოზიციიდან გამომდინარე, რომელიც პარლამენტში შეიქმნა. პარლამენტში შეიქმნა ვითარება, სადაც საკონსტიტუციო უმრავლესობა აქვს ერთ ძალას. მეორე ძალა - “ნაციონალური მოძრაობის“ სახით, არის ოპოზიციური ძალა, მაგრამ ის არ და ვერ ასრულებს პარლამენტში, საზოგადოებაში საჭირო ოპოზიციის როლს, ვინაიდან სახელისუფლებო ძალასა და ამ პოლიტიკურ გუნდს შორის არის იმხელა უფსკრული, რომ ამ უფსკრულის გადალახვა, თუნდაც მცირედ სხვადასხვა საკითხებზე, პრინციპულად შეუძლებელია. აქ არის არა კონკურენცია, არამედ მტრობა. ჩვენ პარლამენტში ვერ მივიღეთ კონკურენტი პოლიტიკური ძალები, რომლებიც ერთმანეთს მოუსმენენ და არგუმენტებით გააკრიტიკებენ. წინმსწრებად ცნობილია, რომ რაც არ უნდა თქვას “ქართულმა ოცნებამ“, ეს “ნაციონალირი მოძრაობის“ მიერ ჩათვლილი იქნება რუსი ოლიგარქის მესიჯად და ამიტომ “არ გისმენთ“ და რაც არ უნდა თქვას “ნაციონალურმა მოძრაობამ“, ეს “ქართული ოცნების“ მხრიდან ჩათვლილი იქნება ცხრაწლიანი სისხლიანი რეჟიმის წარმომადგენლების ოინებად და ამიტომ “არ გისმენთ“. ეს ვითარება არის რეალობა. ეს იმას ნიშნავს, რომ პოლიტიკური პროცესი, პოლიტიკური პაექრობა, პოლიტიკური ოპონირება ვერ ბადებს სათანადო შედეგებს, რადგან ოპონირებას მაშინ აქვს აზრი, თუ ოპონირებისას რაღაც ახალს აღმოვაჩენთ და გავარკვიეთ და ერთმანეთს გარკვეულწილად მაინც დავეთანხმებით. პარლამენტი სწორედ ასეთი ადგილია და ჩვენ ამას ალბათ, სამწუხაროდ, იშვიათად ვიხილავთ ხოლმე“, - განუცხადა ჟურნალისტებს დავით უსუფაშვილმა.
ამასთან, როგორც მან აქვე აღნიშნა, იმის მიუხედავად, რომ 2012 წლის მოწვევის პარლამენტი “ქართული ოცნებითა“ და “ნაციონალური მოძრაობით“ იყო წარმოდგენილი, “ქართული ოცნება“ კოალიციურ უმრავლესობას წარმოადგენდა და ოპონირება კოალიციის შიგნით მიმდინარეობდა.
“ოპონირების რეჟიმი, რასაც პარლამენტში ოპოზიციიდან უნდა ჰქონოდა ადგილი, კოალიციის შიგნით არსებობდა. ეს აბალანსებდა იმ მინუსებს, რასაც ერთპარტიული მმართველობით აქვს ადგილი. დღეს საქართველოს პარლამენტში პრინციპულად განსხვავებული ვითარება მივიღეთ“, - დასძინა უსუფაშვილმა.