ველოდები, რომ ” ნაციონალური მოძრაობა” ყველანაირად შეეცდება საპარლამენტო მუშაობაში ბევრი ხელოვნური ბარიერი შექმნას, - ამის შესახებ ”ინტერპრესნიუსს” ”ქართული ოცნების” ერთ-ერთმა ლიდერმა ეკა ბესელიამ განუცხადა. 
არჩევნების მეორე ტურის შედეგების შეფასებისას, ბესელიამ ამომრჩევლებს აქტიურობისთვის მადლობა გადაუხადა და აღნიშნა, რომ ”ქართულმა ოცნებამ” მოსახლეობისგან დამაჯერებელი ნდობის მანდატი მოიპოვა. 

”ამ საკონსტიტუციო უმრავლესობით შევეცდებით, რომ ყველა პოლიტიკური გადაწყვეტილება, რომელიც მიღებული იქნება ჩვენი გუნდის მიერ, იყოს შეთანხმებული ჩვენს ხალხთან და მათ განწყობას გამოხატავდეს. არავითარი საფრთხე საკონსტიტუციო უმრავლესობის პირობებში დღეს არ არსებობს. ვინაიდან ეს უმრავლესობა არა ”ნაციონალურ მოძრაობას”, არამედ ”ქართულ ოცნებას” აქვს, რომელიც პასუხისმგებლობის მქონე პოლიტიკური გუნდია. ჩვენი გუნდისა და ხელისუფლების მთავარი მაკონტროლებელი არის სწორედ ჩვენი ამომრჩეველი”, - განაცხადა ბესელიამ. 

მისივე თქმით, ”ქართული ოცნების” მიერ მოპოვებული მანდატების აღნიშნული რაოდენობა იმისთვისაც იყო მნიშვნელოვანი, რომ ახალი პარლამენტი, წინა მოწვევის პარლამენტს არ დამსგავსებოდა გადაწყვეტილებების მიღებაში.

”თუ გავითვალისწინებთ, ”ნაციონალურ მოძრაობის” აგრესიულ რიტორიკას და იმას, რომ მათ 27 მანდატი აქვთ აღებული, ოპონირების ნაკლებობა ახალ პარლამენტში ალბათ არ იქნება. ველოდები, რომ ისინი ყველანაირად შეეცდებიან საპარლამენტო მუშაობაში ბევრი ხელოვნური ბარიერი შექმნან და მანდატების ეს რაოდენობა, რომელიც ”ქართულმა ოცნებამ” მოიპოვა ამიტომ იყო მნიშვნელოვანი, რომ ეს პარლამენტიც არ დამსგავსებოდა წინა პარლამენტს, როდესაც 4 წელი ძირითადად მიდიოდა პოლიტიკური ჭიდილი და გადაწყვეტილების მიღება ძალიან რთული იყო”, - აღნიშნა ბესელიამ.