აზერბაიჯანულმა მედიამ „პატრიოტთა ალიანსის“ ლიდერის, დავით თარხან-მოურავის სახელით გავრცელებულ განცხადებასა და ამასთან დაკავშირებით აზერბაიჯანში საქართველოს საელჩოს კომენტარზე „ინტერპრესნიუსთან“ განმარტება გააკეთა.

დღეს სააგენტო „ინტერპრესნიუსმა“ გაავრცელა აზერბაიჯანული სააგენტო „ტრენდის“ სტატია, სადაც საქართველოს საელჩო აზერბაიჯანში ეხმაურებოდა „პატრიოტთა ალიანსის“ ლიდერის დავით თარხან-მოურავის განცხადებას აზერბაიჯანთან დაკავშირებით“. სააგენტო „ინტერპრესნიუსი“ სააგენტო „ტრენდს“ დაუკავშირდა, რომელმაც აღნიშნა, რომ აზერბაიჯანში საქართველოს საელჩოს კომენტარისთვის „სპუტნიკ აზერბაიჯანის“ ვებ-გვერდზე გამოქვეყნებულ სტატიასთან დაკავშირებით მიმართეს.

„მივმართეთ აზერბაიჯანში საქართველოს საელჩოს და გადავუგზავნეთ „სპუტნიკ აზერბაიჯანის“ სტატია, რომელშიც დავით თარხან-მოურავი აცხადებდა, რომ საქართველოს დაშლის შემთხვევაში აზერბაიჯანი მარნეულზე გამოთქვამს პრეტენზიას“, - განაცხადეს „ტრენდში“.

„ინტერპრესნიუსი“ შემდეგ უკვე „სპუტნიკ აზერბაიჯანს“ დაუკავშირდა და სთხოვა დაზუსტება, ჰქონდათ თუ არა დავით თარხან-მოურავის მიერ გაკეთებული მსგავსი განცხადების ვიდეო ან აუდიოჩანაწერი. „სპუტნიკ აზერბაიჯანში“ „ინტერპრესნიუსს“ განუცხადეს, რომ მასალის მომზადებისას დაეყრდნენ ვებ-გვერდ eurasianet.org-ზე გამოქვეყნებულ ინგლისურენოვან სტატიას, რომელიც საქართველოს შეეხებოდა, თუმცა „ინტერპრესნიუსმა“ სტატიის გადამოწმებისას დაადგინა, რომ აღნიშნული სიტყვები არ ეკუთვნოდა დავით თარხან-მოურავს და მისი ავტორი იყო ერთ-ერთი რესპონდენტი, რომელსაც სტატიის ავტორი გაესაუბრა. ამის შემდეგ „ინტერპრესნიუსმა“ კვლავ მიმართა „სპუტნიკ აზერბაიჯანის“ ხელმძღვანელობას და მიუთითა შეცდომაზე. საპასუხოდ სააგენტოში განაცხადეს, რომ ეს იყო სავარაუდოდ თარჯიმნის შეცდომა და თავისი ვებ-გვერდიდან მასალა წაშალა.

ამასთან პორტალმა „ტრენდმა“ დღეს დილით გამოქვეყნებულ მასალაში, რომელიც აზერბაიჯანში საქართველოს საელჩოს განცხადებას შეეხებოდა, შესწორებები შეიტანა. კერძოდ, სტატიაში აღნიშნულია, რომ დავით თარხან-მოურავის განცხადება გამოაქვეყნა სააგენტო „სპუტნიკმა“ და მოგვიანებით აღნიშნული ინფორმაცია ვებ-გვერდიდან წაშალა.

აღნიშნულის შემდეგ „ინტერპრესნიუსი“ საქართველოს საგარეო საქმეთა სამინისტროსაც დაუკავშირდა, თუმცა, აზერბაიჯანში საქართველოს საელჩოს საკითხზე ახალი განცხადება ჯერ არ გაუკეთებია.