არანაირი ეგზიტპოლები და წინასწარი დათვლის შედეგები არ მაინტერესებს, ბავშვი არ ვარ, - ამის შესახებ პარლამენტის თავმჯდომარე დავით უსუფაშვილმა ”კურიერის” ეთერში განაცხადა.
უსუფაშვილი გამოეხმაურა ბოლო დროს გამოქვეყნებულ კვლევებს, რომლის თანახმად, ”რესპუბლიკურ პარტიას” დაბალი რეიტინგი აქვს.
”ბიძინა ივანიშვილი არ არის ორიგინალური ამ ამბავში. დღეს ვისაც არ ეზარება, ყველა რაღაცა ციფრებს ასახელებს, სხვადასხვა პროცენტებს. აქ არის მარათონი ზუსტად ისევე განსაკუთრებით ორ პოლიტიკურ ძალას შორის, მათ მიერ კონტროლირებადი ტელევიზიების და ექსპერტების მეშვეობით. ამ ციფრებთან დაკავშირებით მე მაქვს ძალიან მშვიდი დამოკიდებულება, ვკითხულობ, დავინახე, გავაგრძელე საარჩევნო კამპანია. ჩვენ ვაღიარებთ და ველოდებით 8 ოქტომბერს, ვინ რას მიიღებს საარჩევნო ბიულეტინების დათვლის შედეგად. არანაირი ეგზიტპოლები, წინასწარი დათვლის შედეგები არ მაინტერესებს. არ ვარ ბავშვი და გუშინდელი მოსული პოლიტიკაში, რომ არ ვიცოდე რასთან გვაქვს საქმე, როგორ კეთდება ეს ამბავი, როგორ ხდება ამით მანიპულირება, როგორ არის ნაქცევი პროპაგანდისტულ მანქანად სოციალური კვლევა. ბიძინასაც, მიშასაც სხვებსაც, შეუძლიათ გააგრძელონ ციფრების გამოქვეყნება, რაც უფრო მივუახლოვდებით არჩევნებს, მეტი იქნება ასეთი კვლევები, მაგრამ 8 ოქტომბრის არჩევნებზე მოდით, ერთად დავითვალოთ ბიულეტენები”, - აღნიშნა უსუფაშვილმა.
