საქართველოს პრემიერ-მინისტრმა გიორგი კვირიკაშვილმა მარტყოფში რაგბის გადამზადების ცენტრი გახსნა. როგორც გიორგი კვირიკაშვილმა ჟურნალისტებს განუცხადა, ეს არის უნიკალური შესაძლებლობა ამ სპორტის მიმდევრებისთვის, ბავშვებისთვის და მოზარდებისთვის, რომ აქ გაიარონ მომზადება.
”მე ძალიან მოხარული ვარ, რომ დღეს რაგბისთვის არის ძალიან დიდი დღე. თქვენ ხედავთ რამხელა კომპლექსი გაიხსნა. 
ძალიან კარგია, რომ თვითონ მოედნებთან ერთად სხვა ინფრასტრუქტურაც აშენდა. ვფიქრობთ, რომ ეს იყო ძალიან კარგი ინიციატივა. ფონდი ”ქართუ” აგრძელებს რაგბის ინფრასტრუქტურის დაფინანსებას და უკვე 100 მილიონ ლარზე მეტია დახარჯული. სპორტის ამ სახეობას განსაკუთრებული წარმატება აქვს საქართველოში. რაგბი მართლა არის ქართველების თამაში. ეს არის თამაში, რომელშიც ყველაზე კარგად ფასდება გუნდურობა, ერთმანეთის გვერდში დგომა და მთელი გუნდით გაერთიანება წარმატების მისაღწევად. ეს არის ის, რაც ჩვენ მართლა გვახასიათებს და ამ თვისებას განსაკუთრებით უნდა შევუწყოთ ხელი”, - განაცხადა პრემიერმა.