ავსტრიელი დეპუტატის, კრისტინა მუტონენის გიგი წერეთელზე გამარჯვება არის ზომიერი ევროპის აგრესიულ, ანტირუსულ ევროპაზე გამარჯვება, - აღნიშნული განცხადება რუსეთის სახელმწიფო დუმის საერთაშორისო საქმეთა კომიტეტის თავმჯდომარე ალექსეი პუშკოვმა გააკეთა.

მისი თქმით, ეუთო-ს საპარლამენტო ასამბლეის ახალი პრეზიდენტის პოსტისთვის ბრძოლაში გაიმარჯვეს იმ ადამიანებმა, რომლებსაც რუსეთთან დიალოგის საჭიროება მნიშვნელოვნად მიაჩნიათ.

„ავსტრიელ სოციალისტ მუტონენის მიხეილ სააკაშვილის პარტიის კანდიდატზე, გიგი წერეთელზე გამარჯვება - ევროპის ზომიერი ნაწილის, აგრესიულ, ანტირუსულ ნაწილზე გამარჯვებაა. ეს ასევე გამარჯვებაა რუსეთის იზოლაციის კურსზე, რომლის გატარებასაც ეუთო-ს საპარლამენტო ასამბლეაზე და სხვა ფორმატებში ამერიკული და კანადური დელეგაციები ცდილობენ“, - განაცხადა პუშკოვმა.

მისი მოსაზრებით, ეუთო-ს საპარლამენტო ასამბლეის სესიაზე ჩატარებული კენჭისყრა მიუთითებს, რომ ევროპაში რუსეთის საკითხზე განხეთქილება არსებობს.

ალექსეი პუშკოვი ასევე მიესალმა ფაქტს, რომ ეუთო-ს საპარლამენტო ასამბლეის პრეზიდენტის პოსტზე აირჩიეს ნეიტრალური, ნატო-ში არშემავალი ქვეყნის წარმომადგენელი.

ეუთო-ს საპარლამენტო ასამბლეის პრეზიდენტი კრისტინა მუტონენი გახდა. პრეზიდენტის ასარჩევად კენჭისყრის მეორე ტურის ჩატარება გახდა საჭირო, ვინაიდან ხმათა აბსოლუტური უმრავლესობა ვერც ერთმა კანდიდატმა ვერ დააგროვა.

არჩევნების მეორე ტურის შედეგების მიხედვით, ეუთო-ს საპარლამენტო ასამბლეის პრეზიდენტის პოსტზე ავსტრიის წარმომადგენელ კრისტინა მუტონენს 86-მა დელეგატმა დაუჭირა მხარი, გიგი წერეთელს კი -73-მა.

ახალი პრეზიდენტი ეუთო-ს საპარლამენტო ასამბლეას 1 წლის განმავლობაში უხელმძღვანელებს.

ეუთო-ს საპარლამენტო ასამბლეის 25-ე, ყოველწლიური სესია, რომელიც 1-5 ივლისის ჩათვლით საქართველოში მიმდინარეობდა, თბილისის დეკლარაციის მიღებით და ასამბლეის ხელმძღვანელი პირების არჩევით დასრულდა.

გიგი წერეთელი რჩება ეუთო-ს საპარლამენტო ასამბლეის ვიცე-პრეზიდენტად მომავალი 2 წლის განმავლობაში.