გერმანიის პოლიციამ ბუნდესტაგის თურქული წარმომავლობის 11 დეპუტატს დაცვა დაუნიშნა. გერმანული გამოცემების ინფორმაციით, ამის მიზეზი მათი მისამართით არსებული მუქარებია .

ქვეყნის შინაგან საქმეთა მინისტრი თომას მეზიერი დეპუტატების მისამართით მუქარებს მიუღებელს უწოდებს. მისი თქმით, გერმანიის 3,5 მილიონი მცხოვრები თურქული წარმომავლობისაა. „ისინი კარგი მეზობლები და გერმანული საზოგადოების მნიშვნელოვანი ნაწილი არიან“, - განაცხადა მინისტრმა.

მანამდე, გერმანიის შსს-მ აღნიშნულ დეპუტატებს რეკომენდაციით მიმართა, უსაფრთხოების მიზნით, თურქეთში გამგზავრებისგან თავი შეეკავებინათ. ზოგიერთმა პარლამენტარმა თურქეთში ვიზიტი გადადო.

თურქული წარმომავლობის დეპუტატებისადმი მუქარა მას შემდეგ დაიწყო, რაც 2 ივნისს ბუნდესტაგმა ოსმანთა იმპერიის მხრიდან სომხეთის გენოციდი აღიარა.