ყოფილი პრემიერ-მინისტრის ბიძინა ივანიშვილის განცხადებით, ის წინასაარჩევნო პერიოდში მხარს დაუჭერს "ქართულ ოცნებას", როგორც ჩვეულებრივი მოქალაქე.
"პარტიას მხარს დავუჭერ. მხარს დავუჭერ იმ ძალას, რომელიც მგონია, რომ ქვეყანას პროგრესისკენ წაიყვანს და სწორი მიმართულებით განავითარებს. როგორც ჩვეულებრივ მოქალაქე,ს მე ამის უფლება მაქვს და არაფერს ვაჭარბებ. ის, რომ მე ძალაუფლება გამაჩნია აშფოთებს ძალიან ბევრ ოპონენტს, რა ვუყო ამ ძალაუფლებას?",- განაცხადა ივანიშვილმა "საზოგადოებრივი მაუწყებლის" ეთერში.
მისივე თქმით, კოალიციაში მთავარი გადამწყვეტი ფუნქცია "ქართულმა ოცნებამ" შეასრულა.
"კოალიციაში გადამწყვეტი ფუნქცია შეასრულა "ქართული ოცნება- დემოკრატიულმა საქართველომ". კოალიციის პარტიებსაც ჰქონდათ თავისი როლი, ვის რამდენი ჰქონდა, ყველაზე კარგად გამოჩნდება ხალხის შეფასებით",- განაცხადა ივანიშვილმა.
ყოფილი პრემიერი დღეს "საზოგადოებრივი მაუწყებლის" გადაცემა "ინტერვიუში" მიიღებს მონაწილეობას, სადაც მიმდინარე პროცესებზე ისაუბრებს.
