დღევანდელი მთავრობის ბევრ წევრს დროშა ეჭირა ხელში და მიშა, მიშას გაიძახოდა, - ამის შესახებ მოძრაობა ”სახელმწიფო ხალხისთვის” ლიდერმა, პაატა ბურჭულაძემ ”PalitraNews”-ის გადაცემა ”360 გრადუსში ” სტუმრობის დროს გააკეთა.
როგორც ბურჭულაძემ განაცხადა, 2011 წლიდან ის ბიძინა ივანიშვილის გვერდით იდგა.
”2011 წლიდან ივანიშვილის გვერდით ვიდექი, რომ ყველაფერი შეგვეცვალა. ”ნაციონალური მოძრაობის” დროს, მე ვიყავი ჩემი ქვეყნის სამსახურში. ვერავინ მოისმენდა ჩემი მხრიდან ყოფილი ხელისუფლების ქებას. მქონდა კრიტიკა, ეს კრიტიკა იყო, რომ მე ვაკეთებდი სახელმწიფოს საქმეს. იმ ცხრა წელმა გამომაცხადა ქვეყნის მოღალატედ იმიტომ, რომ მოსკოვში ჩავედი და ავადმყოფ ბავშვებს დავეხმარე, იმ ცხრა წლის განმავლობაში გარდა იმის, რომ ვეხმარებოდი ადამიანებს, საქართველოს სახელი გამქონდა საზღვარგარეთ და მგონი არც თუ ისე ცუდად. დღევანდელი მთავრობის ბევრ წევრს დროშა ეჭირა ხელში და მიშა, მიშას გაიძახოდა”, - აცხადებს პაატა ბურჭულაძე.
მოძრაობა ”სახელმწიფო ხალხისათვის” ლიდერი ”საქართველოს გზის” საპატიო ლიდერის სალომე ზურაბიშვილის განცხადებასაც გამოეხმაურა, სადაც საუბარი ფონდ ”იავნანას” საქმიანობას შეეხება - ”ასეთ გამაყრუებელ სიჩუმეს რამე კავშირი ჰქონდა იმასთან, რომ ამ 9 წლის მანძილზე მისი ფონდი ”იავნანა” სარგებლობდა იმ დროინდელ ხელისუფლების სრული ”კარტ- ბლანშით”? მეტიც, ”იავნანას” ჰქონდა მიღებული მონოპოლია- აეროპორტში იდგა მხოლოდ ”იავნანას” ყუთები, სადაც წამსვლელ მგზავრებს შეეძლოთ მათ ხელთ შერჩენილი ლარების შეწირვა ”იავნანასთვის”, -აცხადებს სალომე ზურაბიშვილი.
პაატა ბურჭულაძის თქმით კი, ფონდის ხელშეუხებლობა, ფონდის საქმიანობამ განაპირობა”. ამ განცხადებაზე შემიძლია ვთქვა, რომ ფონდი ”იავნანა” იმდენად სუფთა და კარგი ფონდია, რომ მას ვერავინ შეეხება, ეყო ნამუსი და სინდისი იმ ხელისუფლებას, რომ ფონდისთვის ხელი არ შეეშალა”, - განაცხადა პაატა ბურჭულაძემ გადაცემაში ”360 გრადუსი”.
