„ნაციონალური მოძრაობა“ საარჩევნო სისტემის ე.წ. გერმანული მოდელის მხარდაჭერის საკითხთან დაკავშირებით კონსულტაციებს გამართავს.
როგორც „ნაციონალური მოძრაობის“ წევრმა, ლევან ბეჟაშვილმა განაცხადა, გაიმართება კონსულტაციები, შესაძლებელია კონსენსუსი იქნეს მიღწეული, ან შესაძლებელია „ნაციონალურმა მოძრაობამ“ პირდაპირ დაუჭიროს მხარი “გერმანულ მოდელს”, რადგან „არსებულ საარჩევნო სისტემას ყველა სისტემა სჯობს“.
როგორც ლევან ბეჟაშვილმა აღნიშნა, კოალიცია „ქართული ოცნების“ გარდა, მთელი პოლიტიკური სპექტრი თანხმდება იმაზე, რომ არსებული მაჟორიტარული სისტემა შესაცვლელია. ის ეწინააღმდეგება კონსტიტუციურ ნორმებს და მხოლოდ ხელისუფლების ინტერესებს ემსახურება.
„ამიტომ ნებისმიერი პროექტი, მათ შორის ჩვენც გვაქვს წარდგენილი საარჩევნო სისტემის შეცვლასთან დაკავშირებით პროექტი, რომელიც არსებულ საარჩევნო სისტემას შეცვლის, მხარდაჭერილი იქნება ჩვენი მხრიდან და ამ შესაძლებლობებს ვიხილავთ“, - განაცხადა ლევან ბეჟაშვილმა.
როგორც დეპუტატმა აღნიშნა, პარლამენტში ახლა არის კარგი პერიოდი, რადგან კოალიცია „ქართული ოცნების“ შიგნითაც სერიოზული უკმაყოფილებაა, რათა მოხდეს საპარლამენტო ჯგუფებს შორის კონსესუსის მიღწევა იმასთან დაკავშირებით, რომ შეიცვალოს არსებული საარჩევნო სისტემა.
