კონსტიტუციონალისტ ვახუშტი მენაბდეს განცხადებით, ე. წ. კაბელების საქმეზე სასამართლოს მიერ გადაწყვეტილების ასე სწრაფად მიღება მოულოდნელი იყო. ასე შეაფასა ვახუშტი მენაბდემ ჟურნალისტებთან საუბარში საქალაქო სასამართლოს მიერ დღეს მიღებული გადაწყვეტილება, რომელმაც ე.წ.კაბელების საქმეზე ბრალდებული ხუთივე პირი დამნაშავედ ცნო.

„როგორც ”რუსთავი 2“-ის, ისე კაბელების საქმეზე პოლიტიკოსების მხრიდან გაკეთებული განცხადებები და მიღებული გადაწყვეტილებები ცხადყოფს, რომ სასამართლოზე ხელისუფლების მხრიდან მიმდინარეობს ზეწოლა. ე. წ. კაბელების საქმეზე ძალიან ბევრი კითხვა არსებობს და მოულოდნელი იყო თუნდაც სასამართლოს მხრიდან ასე სწრაფად გადაწყვეტილების მიღება და მთელი ის პერიპეტიები, რაც წინ უძღოდა ამ პროცესს. ეს ყველაფერი აჩვენებს, რომ ჩვენ უნდა ველოდოთ სასამართლოს ზედა ინსტანციების გადაწყვეტილებას“, - განაცხადა ვახუშტი მენაბდემ.

მისივე თქმით, კაბელების საქმეზე ძალიან ბევრი კითხვა გაჩნდა როგორც პოლიტიკური, ისე სამართლებრივი თვალსაზრისით.

ე.წ. კაბელების საქმეზე ხუთივე ბრალდებულს მოსამართლემ თავისუფლების 7 წლით აღკვეთა მიუსაჯა.

ე.წ. კაბელების საქმეზე 5 პირი არის ბრალდებული: ნუგზარ კაიშაურს, დავით წიფურიას, არჩილ ალავიძეს, გიორგი ლობჟანიძესა და გიზო ღლონტს გამოძიება სახელმწიფოს კუთვნილი 4 102 000 ლარის გაფლანგვას ედავება.