პაატა ბურჭულაძის მიერ განვლილი რამდენიმე ათეული წლის განმავლობაში დათესილი სიკეთე უნიკალური შანსია იმისა, რომ მისი ნდობა ბევრად მეტ ამომრჩეველს ჰქონდეს, ვიდრე გამოცდილ პოლიტიკოსებს, რომელთაც არც ჰქონიათ ფუფუნება, ტაშსა და ოვაციებში გაეტარებინათ ცხოვრება, - ამის შესახებ ”ინტერპრესნიუსს” ექსპერტმა სოსო ცისკარიშვილმა ”საქართველოს განვითარების ფონდის” დამფუძნებლის პაატა ბურჭულაძის პოლიტიკაში წასვლის გადაწყვეტილების კომენტირებისას განუცხადა.
ცისკარიშვილის აზრით, პაატა ბურჭულაძის მიმართ არსებული მაღალი ინტერესი, დიდი ალბათობით, გამოწვეულია მისი პირადი ბიოგრაფიიდან.
”ადამიანი, რომელიც ასოცირდება სიკეთესთან და წარმატებასთან, ალბათ, მონატრების საგანია ჩვენს საზოგადოებაში. მისი განცხადება არის სიკეთეზე ორიენტირებული და მე ვიტყოდი, არცთუ ემოციებს მოკლებული. ჯერჯერობით რაიმე კონკრეტიკაზე საუბარი გართულდება. მიზნები, სურვილები სრულიად ნათელია და ცხადია, რომ მისაღებიც არის და უნდა ვიყოთ უფრო თავდაჯერებულნი ამ მიზნის მიღწევის პერპსექტივისა, თუ მის გარშემო არ მოხდება არაკეთილსინდისიერ ადამიანთა წარმოჩენა”, - განაცხადა ცისკარიშვილმა.
მისივე შეფასებით, პაატა ბურჭულაძის 75%-იანი რეიტინგი IRI-ს კვლევაში სერიოზული გაღიზიანების ფაქტორი გახდა არსებულ პოლიტიკურ სუბიექტთა შორის და პაატა ბურჭულაძეს ”მოუწევს შეგუება მისთვის უჩვეულო რეალობასთან, რადგან მისმა წარმატებულმა პროფესიულმა საქმიანობამ იგი ჯერჯერობით ვერ მოამზადა იმისთვის, რომ ტაშის და ოვაციების ნაცვლად ცილისწამებას, უმიზეზო ლანძღვას და ბინძურ პოლიტიკურ ველში ჩაყოლიების სურვილს შეეგუოს”.
”დარწმუნებული ვარ, ბატონი პაატა ყველა ამ ნეგატიურ პროცესს დაძლევს, დანარჩენი დამოკიდებულია ჩვენს ამომრჩეველზე და იმ ნაწილზე პოლიტიკური სივრცის აქტიური მონაწილეებისა, რომლეთაც ჯერ კიდევ აქვს უფლება ილაპარაკოს ხალხის სახელით”, - განაცხადა ცისკარიშვილმა.
რაც შეეხება იმას, თუ რომელ პოლიტიკურ ძალასთან შეიძლება ითანამშრომლოს ბურჭულაძემ, სოსო ცისკარიშვილი მიიჩნევს, რომ ამ კითხვაზე პასუხი შეიძლება გაიცეს მხოლოდ საპარლამენტო არჩევნების შემდეგ.
პაატა ბურჭულაძემ დღეს დაადასტურა, რომ პოლიტიკა მიდის. მისი პოლიტიკური მოძრაობის სახელწოდება იქნება - „სახელმწიფო ხალხისთვის.“
