საარჩევნო ადმინისტრაცია არჩევნების ჩასატარებლად მუდმივად მზად არის, - ამის შესახებ ცესკო-ს სპიკერმა ანა მიქელაძემ ”ინტერპრესნიუსს” განუცხადა.
მისივე ინფორმაციით, არჩევნებთან დაკავშირებით პრეზიდენტის განკარგულების კონტრასიგნაციის ”საკანონმდებლო მაცნეში” ასახვის შემდეგ, რამდენიმე დღეში მზად იქნება სამართლებრივი აქტი, რომელსაც ცენტრალური საარჩევნო კომისია დაამტკიცებს. აქტში გაწერილი იქნება საარჩევნო ღონისძიებათა გრაფიკი, დეტალური ინფორმაცია და ვადები არჩევნებში ჩართული ყველა მხარისთვის.
”საარჩევნო ადმინისტრაცია არჩევნების ჩასატარებლად მუდმივად მზად არის, მუდმივად ვახორციელებთ სხვადასხვა საგანმანათლებლო პროგრამებს საოლქო-საარჩევნო კომისიის წევრებისთვის მათი კვალიფიკაციის ამაღლების და ინსტიტუციური გაძლიერების კუთხით. გარდა ამისა, გვაქვს სხვადასხვა საგანმანათლებლო პროექტები ამომრჩევლებისთვის, საუბნო-საარჩევნო კიმისიის წევრობის მსურველებისთვის, სხვადასხვა ჩართული მხარისთვის. ეს კონკრეტული პროექტები ახლაც მიმდინარეობს. მას შემდეგ, რაც ოფიციალურად დაინიშნება არჩევნები, ცესკო დაამტკიცებს საარჩევნო ღონისძიებათა გრაფიკს, სადაც დეტალურად იქნება მოცემული ინფორმაცია, კონკრეტული ვადები, არჩვენებში ჩართული ყველა მხარისთვის. დეტალური ვადებია გაწერილი პოლიტიკური სუბიექტებისთვის, მედიისთვის, სადამკვირვებლო ორგანიზაციებისთვის, საერთაშორისო ორგანიზაციებისთვის და ა.შ.”, - აღნიშნა ანა მიქელაძემ.
მისივე ინფორმაციით, ცესკო-ს უკვე გადაეცა ამომრჩევლების შესახებ ინფორმაცია. რამდენიმე დღეში ცესკო-ს მიერ ფორმირებული და განახლებული ამომრჩეველთა ერთიანი სია ხელმისაწვდომი იქნება ცესკოს- ვებ-გვერდზე. საარჩევნო ადმინისტრაციის სპიკერის ცნობით, თითოეულ ამომრჩეველს ვებ-გვერდზე საკუთარი მონაცემების გადამოწმების შესაძლებლობა ექნება.
