ყოველდღიური შეხვედრები მაძლევს საფუძველს ვივარაუდო, რომ ვიზალიბერალიზაციის პროცესი ზაფხულში წარმატებით დასრულდება, - ამის შესახებ საქართველოს საგარეო საქმეთა მინისტრი მიხეილ ჯანელიძე ”კვირის პალიტრასთან” ინტერვიუში აცხადებს.
მინისტრის თქმით, საქართველო ევროპარლამენტთან და ევროკავშირის საბჭოსთან აქტიურად მუშაობს, რათა საქართველომ მიიღოს დამსახურებული შედეგი, მიუხედავად იმ სირთულეებისა, რომელიც დღეს ევროკავშირში არსებობს.
”ეს პრობლემებია არალეგალური მიგრაცია, ევროსკეპტიციზმი და ა.შ., რომელიც ირიბად ახდენს გავლენას საქართველოს შესახებ გადაწყვეტილებაზეც. დღეს საქართველოს უწევს ბევრად მეტი სირთულის გადალახვა ამ პროცესში, ვიდრე, მაგალითად, ეს მოლდოვას შემთხვევაში იყო”, - აღნიშნავს მინისტრი.
მიხეილ ჯანელიძე ”ევროპის სახალხო პარტიის” წევრების განცხადებებსაც ეხმაურებს და განმარტავს, რომ პარტიის ცალკეული წარმომადგენლების მიერ გამოთქმული მოსაზრებები არ ასახავს არც ”ევროპის სახალხო პარტიის” პოლიტიკური ჯგუფისა და არც ევროპარლამენტის ერთიან პოზიციებს.
”აპრილში სტრასბურგში, ევროპარლამენტში ჩემი ვიზიტის დროს შეხვედრები გავმართე, როგორც ”ევროპის სახალხო პარტიის”, ასევე ევროპის სხვადასხვა პარტიების წარმომადგენლებთან, სადაც კიდევ ერთხელ დადასტურდა ევროპული ინტეგრაციისთვის აქტიური მხარდაჭერა და ასევე, საქართველოსთვის უვიზო მიმოსვლის რეჟიმის დროულად მინიჭების მზაობა. ასევე, ევროპარლამენტის შესაბამის კომიტეტში უკვე გაიმართა პირველი მოსმენა, სადაც მომხსენებელი საქართველოს ვიზალიბერალიზაციის საკითხზე ”ევროპის სახალხო პარტიის” წარმომადგენელი იყო და ამ განხილვის დროსაც ნათლად გამოჩნდა საქართველოს საკითხისთვის სრული მხარდაჭერა”, - აღნიშნა მინისტრმა.
