NDI-ს კვლევაში არის გარკვეული მომენტები, როდესაც მე შესაძლოა სხვა განცდები მქონდეს, - ამის შესახებ საქართველოს პრემიერ-მინისტრმა გიორგი კვირიკაშვილმა მედიის წარმომადგენლებთან შეხვედრაზე განაცხადა.
პრემიერის თქმით, არ შეიძლება ცალსახად იმის თქმა, არის თუ არა სანდო ამერიკის ”ეროვნულ-დემოკრატიული ინსტიტუტის” მიერ ჩატარებული კვლევის შედეგები, თუმცა როგორც მან აღნიშნა,NDI-ს საკმაოდ დიდი როლი აქვს საქართველოში პლრალიზმის დამკვიდრებასა და ზოგადად დემოკრატიული ინსტიტუტების განვითარებაში.
”NDI-ს საკმაოდ დიდი როლი აქვს საქართველოში პლურალიზმის დამკვიდრებასა და ზოგადად დემოკრატიული ინსტიტუტების განვითარებაში. არაერთი პროგრამა, რომელიც იქნა დასპონსორებული NDI-ს მხრიდან, გახლდათ ძალიან მნიშვნელოვანი ქვეყანაში დემოკრატიული ინსტიტუტების მშენებლობის მიმართულებით.
რაც შეეხება კვლევას - კვლევას ახორციელებს სხვადასხვა კონტრაქტორი კომპანია, რომლებსაც შესაძლოა არ ჰქონდეთ იმ დონის პროფესიონალიზმი ან კვლევის მოცულობა არ იყოს იმ დონის, რომელიც საჭიროა იმისთვის, რომ ზუსტად გამოხატოს საზოგადოების პრიორიტეტები.
მე არ ვიტყოდი, რომ არ ვენდობი კვლევის შედეგებს. კვლევაში არის მნიშვნელოვანი კომპონენტები, რომელიც ჩემთვის ძალიან საინტერესოა. თუმცა არის გარკვეული მომენტები, როდესაც მე შესაძლოა სხვა განცდები მქონდეს, იგივე ”ქართული ოცნების” მხარდამჭერთა პროცენტულ რაოდენობასთან მიმართებაში და იმასთან მიმართებაში, რაც ეხება სხვადასხვა პირების პოპულარობას, თუ არაპოპულარობას. ამიტომ მე ვფიქრობ, რომ ასე ერთი ხელის მოსმით არ ივარგებს ნეგატიური კომენტარის გაკეთება. შესაძლოა რაღაცას ვენდობოდეთ, რაღაცას არ ვენდობოდეთ.
ნებისმიერი კვლევა რაღაც კუთხით საინტერესოა და წინასაარჩევნო კამპანიაში გასათვალისწინებელია,” - განაცხადა გიორგი კვირიკაშვილმა.
