არჩევნებამდე NDI საქართველოში კიდევ ერთ გამოკითხვას ჩაატარებს. ამის შესახებ NDI-ის ევრაზიის განყოფილების დირექტორმა ლორა ჯუიტმა ”ამერიკის ხმის” ქართულ რედაქციასთან ინტერვიუში განაცხადა.
მისი თქმით, გამოკითხვა სავარაუდოდ ზაფხულში ჩატარდება, შესაბამისად მასში ის ახალი პოლიტიკური რეალობაც იქნება ასახული, რაც კოალიციის სუბიექტების, არჩევნებზე დამოუკიდებლად გასვლას გულისხმობს.
”საინტერესო იქნება, თუ რამდენად შეიცვლება შედეგები. თუმცა, სიმართლე გითხრათ, ცვლილება შეიძლება ამ ეტაპზე მხოლოდ ერთ კითხვაზე პასუხში გვქონოდა. ვგულისხმობ კითხვას - არჩევნები რომ ხვალ ტარდებოდეს, ვის მისცემდით ხმას? ალბათ, ”რესპუბლიკელთა” მიერ არჩევნებში დამოუკიდებლად მონაწილეობის გადაწყვეტილების შემდეგ, ამ კითხვაზე საკმაოდ განსხვავებულ პასუხს მივიღებდით. ამიტომ დაკვირვება საინტერესო და მნიშვნელოვანი იქნება, მაგრამ დანარჩენ კითხვებზე პასუხს ისევ ლეგიტიმურად ვთვლი. განსაკუთრებით - იმ თემებზე, რაც ქართველებს ყველაზე მეტად აწუხებთ. პოლიტიკური პარტიებისთვის დღეს გამოწვევად რჩება ის ფაქტი, რომ მოსახლეობის უდიდეს უმრავლესობას არ გადაუწყვეტია, თუ ვის აძლევს ხმას, რაც იმას ნიშნავს, რომ მათ გარანტირებული მხარდამჭერების საკმარისი რაოდენობა არ ჰყავთ. თუმცა, ეს შესაძლოა დიდ შესაძლებლობადაც აღვიქვათ: არის უამრავი ხმა, რომლის მოპოვების საშუალება ჯერ კიდევ არსებობს. ყველაფერი დამოკიდებულია იმ პლატფორმაზე და პარტიის იმ ლიდერებზე, რომელიც ქართველებს მოეწონება”, - განაცხადა ლორა ჯუიტმა.
NDI-ის ევრაზიის განყოფილების დირექტორი არჩევნებში მონაწილე პარტიებს, რომლებსაც მომავალ არჩევნებში გამარჯვება სურთ, მეტი ქალის მოზიდვას, პოლიტიკაში ჩართვასა და მათ მომგებიან პოზიციაში ჩაყენებას ურჩევს.
”საუბარია როგორც პარტიულ სიებზე, ასევე მაჟორიტარ დეპუტატობის კანდიდატებზე. როგორც ხედავთ, ქართველებს პარლამენტში მეტი ქალის ხილვა სურთ და კვოტირების პრინციპსაც ემხრობიან”, - განაცხადა ჯუიტიმ.
