იურისტ ლევან ალაფიშვილის შეფასებით, ”საუკეთესო გამოსავალია” ის, რომ პრემიერ-მინისტრი პრეზიდენტს არჩევნებთან დაკავშირებულ განკარგულებას მოტივირებული შენიშვნებით უკან უგზავნის.
როგორც ალაფიშვილმა ”ინტერპრესნიუსს” განუცხადა, კარგია ისიც, რომ საარჩევნო კამპანია თუნდაც 3 თვით ადრე დაიწყება.
”ეს არის საუკეთესო გამოსავალი. გარკვეულწილად, სამართლებრივი კონფლიქტი კი დაფიქსირდა, მაგრამ არა უშავს - მართალია 6- თვიანი წინასაარჩევნო კამაპანია არ იქნება, მაგრამ სამთვიანი რომ იქნება, ესეც კარგია წინასაარჩევნო კამპანიის სამართლიანად წარმოებისთვის, რადგან მთავრობა დათანხმდა, ამ პერიოდის განმავლობაში იყოს შეზღუდული. რაც მთავარია, რეალურად ახლა ყველაფერი სამართლებრივ ჩარჩოში ჩადგება და იმედია, პრეზიდენტი სწორედ იმ დროს გამოსცემს განკარგულებას. ყველაფერი კანონის შესაბამისად წარიმართება და წინასაარჩევნო კამპანია იქნება ისეთი, რომ არც ქვეყნის შიგნით და არც ქვეყნის გარეთ დამატებითი კითხვები არ გაჩნდეს”, - განაცხადა ალაფიშვილმა.
პრემიერ-მინისტრი პრეზიდენტს თხოვნით მიმართავს, არჩევნებთან დაკავშირებით ახალი განკარგულება ივლისში გამოსცეს. როგორც პრემიერმა მთავრობის დღევანდელ სხდომაზე განაცხადა, უმჯობესი იქნება თუკი ეს 8 ივლისს, არჩევნებამდე 3 თვით ადრე მოხდება, იქამდე კი გიორგი კვირიკაშვილი პრეზიდენტ მარგველაშვილს მის მიერ გამოცემულ განკარგულებას მოტივირებული შენიშვნებით უკან უგზავნის.
