დედაქალაქის მერი დავით ნარმანია „აუდიტორია 115“-ის წარმომადგენლებს მაღლივი კორპუსის მიმდებარე ტერიტორიაზე მშენებლობასთან დაკავშირებით შესაბამის უწყებებთან კონსულტაციების გავლას დაპირდა. უნივერსიტეტის მაღლივ კორპუსში დავით ნარმანიასა და „აუდიტორია 115“-ის წარმომადგენლების შეხვედრა უკვე დასრულდა. სტუდენტებმა დედაქალაქის მერს მშენებლობის დაუყოვნებლივ შეჩერება მოსთხოვეს.
„სტუდენტების პოზიციაა, შეჩერდეს მშენებლობა და აღნიშნული ტერიტორია განვითარდეს როგორც საუნივერსიტეტო სივრცე. შევთანხმდით, რომ გავივლით კონსულტაციებს შესაბამის სამინისტროსთან, უწყებებთან, რომელთა პროექტიც არის, შემდეგ შევხვდებით და გავივლით ამ საკითხს. მათი კატეგორიული მოთხოვნაა, რომ არ დაინგრეს და არ განადგურდეს ეს ტერიტორია. ამიტომ, კონსულტაციები ვიდრე იქნება, შესაძლოა რამდენიმე დღის განმავლობაში შეჩერდეს პროცესი, ვიდრე საკითხში თავიდან ბოლომდე არ გავერკვევით“, - განაცხადა დავით ნარმანიამ.
„აუდიტორია 115“-ის წევრები თსუ-ს მაღლივი კორპუსის მიმდებარე ტერიტორიაზე დაგეგმილ მშენებლობას აპროტესტებენ, მათი ინფორმაციით, ყოფილ რეკრეაციულ ზონაში გაერთიანებული წყალმომარაგების კომპანია წვეთის ფორმის ობიექტის მშენებლობას გეგმავს.