არანაირი საფუძველი არ გვაქვს ვთქვათ, რომ ჩვენი სპეცსამსახურები კარგად ვერ მუშაობენ, - ამის შესახებ საქართველოს უშიშროების საბჭოს მდივნის მოადგილე ლევან ბოძაშვილმა განაცხადა.
როგორც ბოძაშვილმა საზოგადოებრივი მაუწყებლის ეთერში, ბრიუსელში გუშინ მომხდარ ტერაქტებზე საუბრის კონტექსტში აღნიშნა, ამის მიუხედავად, მუდმივადაა საჭირო, რომ სპეცსამსახურები მეტად განვითარდნენ.
"სპეცსამსახური არის ის თემა, რომლის საქმიანობასთან დაკავშირებით კმაყოფილება არასდროს არ შეიძლება გამოითქვას. ის მუდმივად უნდა იყოს განვითარების რეჟიმში ტექნიკური აღჭურვილობის, ფინანსური რესურსის, კადრების კვალიფიკაციის და ბუნებრივია, ინფორმაციის მოპოვებისა და გავრცელების საშუალებების თვალსაზრისით. რაც შეეხება უშუალოდ საქართველოს სპეცსამსახურებს, ჩვენ, დღესდღეობით, არანაირი საფუძველი არ გვაქვს ვთქვათ, რომ ჩვენი სპეცსამსახურები კარგად არ და ვერ მუშაობენ. ამის საფუძველი ნამდვილად არ არსებობს, მაგრამ, რა თქმა უნდა, მუდმივად არსებობს იმის საჭიროება, რომ ის იყოს უფრო უკეთესი და მეტად განვითარდეს, რისი რესურსიც ქვეყანას გააჩნია", - განაცხადა ბოძაშვილმა.
მისივე განმარტებით, უშუალოდ უშიშროების საბჭოს აპარატი მუდმივ რეჟიმში ახორციელებს რეგიონში არსებული რისკებისა და საფრთხეების შეფასებას, რასთან დაკავშირებულ ინფორმაციასაც შესაბამის უწყებებს აწვდის.
"ჩვენს ანალიტიკურ მუშაობაზე, ბუნებრივია, ღიად ვერ ვისაუბრებ, მაგრამ მინდა გითხრათ, რომ ინფორმაცია, რაც ჩვენთან მოიპოვება, დამუშავების შემდეგ ყველა შესაბამის სტრუქტურას – მინიმუმ უშიშროების საბჭოში წარმოდგენილ უწყებებს მიეწოდება. ასეთი კვლევები ჩვენ 2015 წლის განმავლობაში საკმაოდ დიდი რაოდენობით ჩავატარეთ. მაგალითად, უშუალოდ ტერორისტებთან მიმართებაში შემიძლია გითხრათ, რომ 4 ათასამდე კონკრეტული საქმე შევისწავლეთ, რომელიც მოიცავდა თვითმკვლელი ტერორისტების მოტივაციას, გადაბირების მეთოდიკას და ასეთ საკითხებს. რეალურად ამ ტიპის ინფორმაციები მუდმივი დამუშაბების პროცესშია, ვინაიდან უშიშროების საბჭოს აპარატის ერთ-ერთი მთავარი დანიშნულება არის სწორედ უშიშროების და თავდაცვის საკითხებთან მიმართებაში წინასწარი რისკების და საფრთხეების გათვლა-შეფასება", - აღნიშნა უშიშროების საბჭოს მდივნის მოადგილემ.
