მოვედი, რომ გავაპროტესტო ის სიბინძურე, რომლის ტერორის მსხვერპლიც გახდა ჩვენი საზოგადოება, - ამის შესახებ კამპანია "ეს შენ გეხებას" აქციაზე "თავისუფალი დემოკრატების" ერთ-ერთმა ლიდერმა ალექსი პეტრიაშვილმა განაცხადა.
მისი თქმით, საზოგადოება და კონკრეტულად რამდენიმე ადამიანი გახდა ტერორის მსხვერპლი.
"მოვედით, რომ გავაპროტესტოთ ის სიბინძურე, რომლის ტერორის მსხვერპლი გახდა ჩვენი საზოგადოება და კონკრეტული ადამიანები. ეს თითოეულ ჩვენგანს ეხება და ამიტომაც ვისაც გვინდა ჩვენი ქვეყანა წავიდეს ევროპული გზით, იყოს ადამიანებს შორის ცივილური ურთიერთობა და არა საბჭოთა წუმპეში დარჩეს საზოგადოება, ჩვენი ქვეყანა, ჩვენი ხმა, ჩვენი ძალისხმევა უნდა გავაერთიანოთ მიუხედავად პოლიტიკური მსოფმხედველობისა და დავამარცხოთ ის სიბინძურე, რომელიც უბრალოდ დანაშაულს სცდება", - განაცხადა ალექსი პეტრიაშვილმა.
კამპანია "ეს შენ გეხებას" აქცია-მსვლელობა ფილარმონიასთან დაიწყო. აქციის მონაწილეები კანცელარიის შენობისკენ მიემართებიან. ისინი აპროტესტებენ ფარული ვიდეოჩანაწერების გავრცელებას და მოითხოვენ, რომ აღნიშნულთან დაკავშირებით გამკაცრდეს კანონმდებლობა და მოხდეს იმ ადამიანების დასჯა, ვინც პირადი ცხოვრების ამსახველი ვიდეოები გაავრცელა.
