დიალოგს ყველაზე რთულ მხარესთანაც კი ალტერნატივა არ აქვს, - ასე პასუხობს საქართველოს მთავრობის ადმინისტრაცია აბაშიძე-კარასინის ფორმატის გადახედვის შესაძლებლობის თაობაზე "ინტერპრესნიუსის" მიერ დასმულ შეკითხვას.
როგორც სააგენტოს მთავრობის ადმინისტრაციაში განუცხადეს, დიალოგის შეწყვეტა პრობლემების მოგვარებას ხელს არ შეუწყობს.
"დიალოგს ყველაზე რთულ მხარესთანაც კი ალტერნატივა არ აქვს. ამაზე მუდამ საუბრობენ ჩვენი დასავლელი პარტნიორებიც. დიალოგის შეწყვეტა პრობლემების მოგვარებას ხელს არ შეუწყობს. მოლაპარაკებები რუსულ მხარესთან რთული პროცესია, მაგრამ ფაქტია, რომ სწორედ დიალოგის ფორმატში შეძლებისდაგვარად უნდა მოხდეს არსებული პრობლემების გადაჭრა, მათ შორის პრაქტიკული ხასიათის საკითხების - ისეთ სფეროებში, როგორიც არის სავაჭრო ურთიერთობები, სატრანსპორტო კომუნიკაციები და ჰუმანიტარული საკითხები", - განმარტავენ მთავრობის ადმინისტრაციაში.
ამასთან, ადმინისტრაცია კატეგორიულად აცხადებს, რომ რუსულ მხარესთან დიალოგი, ნებისმიერ ფორმატში გამორიცხავს საქართველოს სუვერენიტეტის და ტერიტორიული მთლიანობის ხარჯზე რაიმე სახის კომპრომისს.
რუსეთის საგარეო საქმეთა მინისტრის მოადგილის, გრიგორი კარასინის მიერ გუშინ გაკეთებული განცხადებების შემდეგ საქართველოს საპარლამენტო უმრავლესობა აბაშიძე-კარასინის ფორმატის გადახედვის შესაძლებლობის საკითხზე ალაპარაკდა.
