საგარეო საქმეთა მინისტრის პირველი მოადგილის, დავით ზალკალიანის განცხადებით, ხელისუფლება "ოკუპირებული ტერიტორიების შესახებ კანონის" გადახედავს არ აპირებს, თუმცა ითვალისწინებს ეუთო-ს სურვილს და პრინციპებს, რომ საქართველოში დაგეგმილ ეუთო-ს საპარლამენტო ასამბლეაში მონაწილეობა მიიღოს ეუთო-ს წევრმა ყველა ქვეყანამ.
ამის შესახებ დავით ზალკალიანმა ჟურნალისტებთან საუბრისას შესაბამის საკითხზე რუსეთის საგარეო საქმეთა მინისტრის მოადგილის, გრიგორი კარასინის მიერ გაკეთებულ განცხადებაზე კომენტირებისას აღნიშნა.
როგორც ზალკალიანმა განმარტა, საქართველო ამ შემთხვევაში არის მხოლოდ მასპინძელი და ღონისძიება იმართება ეუთო-ს ეგიდით.
"ყველამ უნდა გაითვალისწინოს, რომ ეს ღონისძიება ტარდება ეუთო-ს ეგიდით. ჩვენ ვართ მხოლოდ ქვეყანა, რომლის ტერიტორიაზეც ასამბლეა ტარდება. უაღრესად მნიშვნელოვანია ეს ღონისძიება, რადგან 54 ქვეყნის საპარლამენტო დელეგაცია ეწვევა საქართველოს. ეუთო-ს სურვილია, რომ ეს ასამბლეა შედგეს სრული ფორმატით ანუ მასში მონაწილეობა მიიღოს ეუთო-ს ყველა წევრმა ქვეყანამ. ჩვენ, რა თქმა უნდა, როგორც ეუთო-ს წევრი ქვეყანა, რომელიც ვიზიარებთ იმ პრინციპებს, რომელზეც დაფუძნებულია ეს ორგანიზაცია, პატივს ვცემთ ამ ორგანიზაციას და სწორედ ეს არის ამოსავალი წერტილი, როდესაც ვსაუბრობთ საქართველოში
ეუთო-ს საპარალმენტო ასამბლეის ღონისძიებაზე და მასში ეუთო-ს წევრი ქვეყნების მონაწილეობაზე. ჩვენ კანონის გადახედავს არ ვაპირებთ, ყველამ პატივი უნდა სცეს ამ კანონს, მაგრამ ვითვალისწინებთ ეუთო-ს სურვილს და პრინციპებს, რომ ღონისძიებაში, რომელიც ტარდება საქართველოში ეუთო-ს ეგიდით, მონაწილეობა მიიღოს ეუთო-ს წევრმა ყველა ქვეყანამ", - განაცხადა ზალკალიანმა.
კითხვაზე, როგორ მოდის თანხვედრაში ის, რომ რუს დეპუტატებს დარღვეული აქვთ კანონი "ოკუპირებული ტერიტორიების შესახებ" და ეუთო-ს სურვილი, რომ ყველა წევრი დაესწროს ღონისძიებას, ზალკალიანმა განმარტა, რომ ჯერ არ არის ცნობილი, ვინ ჩამოვა რუსეთის დელეგაციიდან საქართველოში.
"ჩვენ ვართ მჭიდრო კონტაქტში ეუთოსთან. მთავარი ამოსავალი იქნება ის, რომ ჩვენ, როგორც ეუთო-ს წევრი ქვეყანა ვითვალისწინებთ ყველა იმ პრინციპს, რომელზც არის დაფუძნებული ეს ორგანიზაცია", - აღნიშნა ზალკალიანმა.
რუსეთის საგარეო საქმეთა მინისტრის მოადგილე გრიგორი კარასინმა გუშინ განაცხადა, რომ რუსი პარლამენტარები ფიქრობენ დაესწრონ ეუთო-ს საპარლამენტო ასამბლეის სხდომას, რომელიც საქართველოშია დაგეგმილი.
"წინ კიდევ გვაქვს დრო. მაგრამ ისევ მინდა აღვნიშნო, რომ რუსეთის წარმომადგენლები და რიგითი მოქალაქეები უნდა იყვნენ გარანტირებულად დაცულები ნებისმიერი გართულებებისგან, რომელიც უკავშირდება ე.წ. კანონს ოკუპირებული ტერიტორიების შესახებ. ამის გამო უკვე დაზარალდა რამდენიმე ტურისტი. ჩვენ გვჭირდება მყარი გარანტიები და უფრო უკეთესი იქნება თუ ამ კანონს საერთოდ გააუქმებენ. ამ შემთხვევაში ჩვენი კონტაქტები უფრო გამარტივდება", - განაცხადა კარასინმა.
