"ნაციონალური მოძრაობის" წევრ გიგი წერეთლის შეფასებით, ქორწინების თემა და ამასთან დაკავშირებით კონსტიტუციაში დაგეგმილი ცვლილებების პროექტი აბსოლუტურად ხელოვნურად არის წამოწეული.
"როგორც ვიცი, ჩვენს საზოგადოებაში ამასთან დაკავშირებით კითხვები არ დასმულა. საუკუნეებია საქართველოში არსებობს ურთიერთობები, არ იყო ჩანაწერები, მაგრამ ჩვენი ოჯახები ამ დრომდე მოვიდა. გარდა ამისა, ქორწინებასთან დაკავშირებით სრულიად ნათელი განმარტება არსებობს "სამოქალაქო კოდექში". ერთადერთი, რაც შეიძლება ვიფიქროთ არის ის, რომ ადგილი აქვს ვითარების და არსებული სირთულეების გადაფარვის მცდელობას. სხვა შემთხვევაში, ვის რაში სჭირდება, ასე ძალით ამოტივტივებული ეს საკითხი?!", - განუცხადა ჟურნალისტებს გიგი წერეთემა.
ქორწინების საკითხთან დაკავშირებით საკონსტიტუციო ცვლილებების პროექტი პარლამენტში ინიცირებულია. პროექტი პარლამენტის ბიუროს დღეს 80 დეპუტატის ხელმოწერით წარედგინა.
პროექტის მიხედვით, კონსტიტუციის 36-ე მუხლის 1-ელ პუნქტი შემდეგი შინაარსით ჩამოყალიბდება: - ქორწინება, რომელიც არის ოჯახის შექმნის მიზნით, ქალისა და მამაკაცის ნებაყოფლობითი კავშირი, მეუღლეთა უფლებრივ თანასწორობას ემყარება.
პროექტის ავტორი უმრავლესობაში შემავალი შემდეგი ფრაქციებია: "ქართული ოცნება", "ქართული ოცნება - კონსერვატორები", "ქართული ოცნება - მრეწველები", "ქართული ოცნება – ეროვნული ფორუმი". პროექტის ინიციატორი კი 80 დეპუტატია.
