პირადი ცხოვრების ამსახველი ვიდეოკადრების გავრცელების აღსაკვეთად მთავარი მექანიზმი ძალიან ეფექტური და სწრაფი გამოძიება უნდა იყოს, - ამის შესახებ ჟურნალისტებს დღეს თბილისის საკრებულოში პერსონალური მონაცემთა დაცვის ინსპექტორმა თამარ ქალდანმა განუცხადა.
თამარ ქალდანმა ჟურნალისტებთან კომენტარი გააკეთა ბოლო დღეებში პირადი ცხოვრების ამსახველი ვიდეოკადრების გავრცელების გამო. თამარ ქალდანის თქმით, ყველა ტიპის დანაშაულის 100%-იანი წინასწარი პრევენცია შეუძლებელია. პრევენციისთვის მნიშვნელოვანი ნაბიჯები უნდა გადაიდგას, მაგრამ მეორე მხრივ, ჩადენილ დანაშაულზე რეაგირება უნდა იყოს მყისიერი და ეფექტური.
"მთავარი მექანიზმი უნდა იყოს ძალიან ეფექტური და სწრაფი გამოძიება, რათა პასუხი გაეცეს კითხვებს და მეორე მხრივ, კომპლექსური მიდგომა, რომელიც მხოლოდ კანონმდებლობის ან სასჯელის გამკაცრებაზე საუბრით არ უნდა შემოიფარგლოს. კომპლექსური მიდგომაა საჭირო, რათა ასეთი ტიპის ინფორმაციის მოპოვება და გავრცელების პრევენცია განხორციელდეს. მიუხედავად იმისა როგორი იქნება პრევენცია, ასეთი ტიპის დანაშაულზე რეაგირება ძალიან მკაცრი უნდა იყოს და ყველა პირი, რომელსაც ეს მასალა უკანონოდ მოპოვებული თუ გავრცელებული აქვს, კანონის მთელი სიმკაცრით უნდა მიეცეს შესაბამის პასუხისგებაში. ეს იქნება ძალიან მნიშვნელოვანი, ისევე როგორც საზოგადოების კონსოლიდაცია, რომ პირად ცხოვრებაში ასეთი უხეში ჩარევა საქართველოს ყველა მოქალაქისათვის არის მიუღებელი. ჩვენ სახელმწიფოსთან ერთად კონსოლიდირებულად წინ უნდა აღვუდგეთ ამ მძიმე დანაშაულს", - განაცხადა თამარ ქალდანმა.
თამარ ქალდანმა საუბრისას აღნიშნა, რომ პირად ცხოვრების ამსახველი ვიდეოკადრები რომ მომავალშიც გავრცელდება ეს ინფორმაცია მათთვის ცნობილია. ასეთ შემთხვევაში, პერსონალურ მონაცემთა დაცვის ინსპექტორის აპარატი შეეცდება გამოძიების პროცესებს გარკვეულად ხელი შეუწყოს, მაგრამ ყველაფერი დამოკიდებულია გამოძიების ეფექტურად ჩატარებაზე, რასაც საზოგადოებამაც უნდა შეუწყოს ხელი.
თამარ ქალდანი აცხადებს, რომ ბოლო დღეებში გავრცელებულ ვიდეოკადრებთან დაკავშირებით პასუხისმგებლობა უნდა დაეკისროს პირველ რიგში იმ პირს, ვინც მოიპოვა და გაავრცელა აღნიშნული კადრები.
