ზოგიერთი მედიასაშუალებისგან განსხვავებით, ვერავინ იტყვის, რომ "ინტერპრესნიუსი" ოდესმე რომელიმე ხელისუფლების გავლენას განიცდიდა, - ამის შესახებ გაზეთ "კვირის პალიტრისთვის" მიცემულ ინტერვიუში ექსპერტმა ალექსანდრე თვალჭრელიძემ განაცხადა.
როგორც ალექსანდრე თვალჭრელიძემ აღნიშნა, "ინტერპრესნიუსმა" დაუშვა შეცდომა, აღიარა, ბოდიშიც მოიხადა და რედაქტორი თანამდებობიდან გათავისუფლდა.
მისივე თქმით, ამ პროცესში ყველაზე ცინიკური იყო "რუსთავი 2"-ისა და მისი უფროსის ნიკა გვარამიას პოზიცია.
"მინდა ორიოდე სიტყვა ვთქვა "ინტერპრესნიუსის" გარშემო ატეხილ აჟიოტაჟზე. ამ პროცესში ყველაზე ცინიკური იყო "რუსთავი 2"-ისა და მისი უფროსის ნიკა გვარამიას პოზიცია. "ინტერპრესნიუსმა" დაუშვა შეცდომა, აღიარა, ბოდიშიც მოიხადა და რედაქტორი თანამდებობიდან გათავისუფლდა. როგორც ვიცი, სულ რამდენიმე წუთით იყო განთავსებული ნიუსი იმის შესახებ, რომ ჩანაწერი ინტერნეტში გავრცელდა. გვარამია, რომელიც თავად იყო ფარული ჩანაწერების თანაშემოქმედი, ვინმეს რომ გააკრიტიკებს, რბილად რომ ვთქვათ, სასაცილოა. აქვე უნდა აღვნიშნო, რომ ზოგიერთი მედიასაშუალებისგან განსხვავებით, ვერავინ იტყვის, რომ "ინტერპრესნიუსი" ოდესმე რომელიმე ხელისუფლების გავლენას განიცდიდა, ის ყოველთვის ახერხებდა დამოუკიდებლობის შენარჩუნებასა და ობიექტურობას, რითაც საზოგადოების ნდობა მოიპოვა და ასეც გაგრძელდება", - განაცხადა თვალჭრელიძემ.
ექსპერტის თქმით, ის ყველაზე მეტად თავდაცვისა და იუსტიციის მინისტრების განცხადებებმა გააკვირვა.
"სიმართლე გითხრათ, ყველაზე მეტად გამაკვირვა თინა ხიდაშელისა და თეა წულუკიანის განცხადებებმა. მაგალითად, იუსტიციის მინისტრის განცხადება ისე არ მომეწონა, რომ ბოლომდე არც წავიკითხე. ეს იყო თავიდან ბოლომდე პოლიტიზირებული განცხადება, სადაც აშკარად ჩანდა, რომ მომხდარში იუსტიციის მინისტრმა საკუთარი პასუხისმგებლობა ვერ დაინახა და სხვაზე გადაბრალება სცადა. მის განცხადება ინფანტილურად მომეჩვენა, რასაც ვერ ვიტყვით პრემიერ-მინისტრზე, რომლის განცხადებაც ძალიან აწონილი იყო", - განაცხადა თვალჭრელიძემ.
