უძრავი ქონების, მათ შორის მიწების რეგისტრაციასთან დაკავშირებით, "ნაციონალური მოძრაობის" საკანონმდებლო ინიციატივის განხილვას პარლამენტის ადამიანის უფლებათა დაცვის კომიტეტზე შეკამათება მოჰყვა.
შეკამათება არასამთავრობო ორგანიზაცია "სამოქალაქო მრჩეველთა საზოგადოებრივი საბჭოს" წარმომადგენლის მამუკა ტუსკაძის განცხადებამ გამოიწვია, რომელმაც კომიტეტს 2012 წლის ზაფხულში განხორციელებულ რეგისტრაციის პროცესთან დაკავშირებით ინფორმაცია მიაწოდა და მას წინა ხელისუფლების "წინასაარჩევნო ტრიუკი" და "სიყალბე" უწოდა.
კერძოდ, როგორც ტუსკაძემ განმარტა, 2012 წლის ზაფხულში, არჩევნების წინ, სახელმწიფომ მოქალაქეთათვის უფასოდ, ქონების რეგისტრაციის პროცესი დაიწყო. მისი თქმით, სასოფლო-სამეურნეო მიწების და საკარმიდამო ნაკვეთების აზომვითი სამუშაოები მთელი საქართველოს მასშტაბით ჩატარდა, ხოლო ამ საქმისთვის ტენდერი სახელმწიფომ "მიწის მესაკუთრეთა ასოციაციას" მოაგებინა. როგორც "სამოქალაქო მრჩეველთა საზოგადოებრივი საბჭოს" წარმომადგენელმა განაცხადა, სიყალბე თავად პროცესში მდგომარეობდა, რის გამოც, დღეის მდგომარეობით, 2012 წლის რეგისტაცია ანულირებულია და რეგისტრაციის შესაბამისი დოკუმენტი ფარატინა ქაღალდს წარმოადგენს.
"2012 წელს განხორციელებული რეგისტრაციების ამონაწერის უკან მართლზომიერი მფლობელობის დამადასტურებელი არანაირი დოკუმენტი არ დევს – დევს მხოლოდ აზომვითი ნახაზი. ადამიანები ამ ქონებას ვერ იყენებენ, რადგან არის ანულირებული", - განაცხადა მამუკა ტუსკაძემ, რომლის თქმით, მოქალაქეებს სადღეისოდ ხელახლა უწევთ უძრავის ქონების დარეგისტრირება და ამაში თანხის გადახდა.
"სამოქალაქო მრჩეველთა საზოგადოებრივი საბჭოს" წარმომადგენლის განცხადებამ და მის მიერ 2012 წლის ზაფხულში ჩატარებული რეგისტრაციის პროცესის "წინასაარჩევნო ტრიუკად" და "სიყალბედ" შეფასებამ "ნაციონალური მოძრაობის" წევრების გაღიზიანება გამოიწვია. როგორც ამასთან დაკავშირებით ოპოზიციონერმა დეპუტატმა გიორგი ღვიანიაშვილმა განაცხადა, წინა ხელისუფლებამ პროცესი დაიწყო, მაგრამ ბოლომე ვერ მიიყვანა, რადგან არჩევნებში დამარცხდა. საკომიტეტო სხდომაზე ითქვა ისიც, რომ თუკი რაიმე ხარვეზებს ჰქონდა ადგილი, მისი გამოსწორება დღევანდელ ხელისუფლებას მართებდა, რასაც არ აკეთებს.
რაც შეეხება უშუალოდ საკანონმდებლო ინიციატივას, "ნაციონალურმა მოძრაობამ" პარლამენტს "საჯარო რეესტრის შესახებ" კანონში ცვლილებები შესთავაზა, რომლის მიხედვით, უძრავ ნივთზე, რომელზეც საჯარო რეესტრში დაცული მონაცემებით სხვა პირის მართლზომიერი მფლობელობის უფლების არსებობა არ დასტურდება, მართლზომიერი მფლობელის მიმართვის საფუძველზე, რომელსაც გააჩნია შესაბამისი ქონების მართლზომიერი ფლობის დამადასტურებელი დოკუმენტი ან სხვა სახის მტკიცებულება, საჯარო რეესტრი, სახელმწიფო ბიუჯეტის ხარჯზე, ქონების უსასყიდლოდ საკუთრებაში რეგისტრაციას ახდენს. ამავე ცვლილებებით, თუ უძრავი ნივთის მართლზომიერი მფლობელი რეგისტრაციას ხუთი წლის ვადაში არ განახორციელებს, უძრავ ნივთზე საკუთრების უფლება სახელმწიფოს წარმოეშვება.
ადამიანის უფლებათა დაცვის კომიტეტმა პროექტის მხარდაჭერისგან თავი შეიკავა.
