"მაესტროს" საკონტროლო პაკეტის მფლობელის ადვოკატი, ირაკლი კორძახია დღეს სამეწარმეო რეესტრში არხის გენერალურ დირექტორად ლევან გაჩეჩილაძის დამტკიცების შესახებ განცხადებას შეიტანს.
წარმოდგენილი იქნება კრების ოქმიც, სადაც ამ საკითხზე დამფუძნებლების თანხმობა დადასტურებულია.
როგორც ირაკლი კორძახიამ "რუსთავი 2"-ს განუცხადა, საკუთარი მოვალეობის შესასრულებლად ლევან გაჩეჩილაძე "მაესტროში" სავარაუდოდ დღესვე მივა.
"სამეწარმეო რეესტრში რეგისტრაციის მომენტიდან, ლევან გაჩეჩილაძე შეუდგება დირექტორის მოვალეობის შესრულებას "მაესტროში". მე როგორც ვიცი, ლევან გაჩეჩილაძე აპირებს მარტო მივიდეს "მაესტროში". ჩვენ მოვისმინეთ სამართლებრივი სივრციდან გასული არაერთი განცხადება, სადაც ბაია გადაბაძე იმუქრებოდა, რომ "მაესტროს" გამოასახლებდნენ, აპარატურას წაართმევდნენ, სახელი აღარ დაიწერებოდა. ეს აღქმული იყო გაჩეჩილაძეების მიერ, როგორც გარკვეული შანტაჟი ," - განაცხადა ირაკლი კორძახიამ.
