ქუთაისში "საქართველოს განვითარების ფონდის" ოფისი გაიხსნა. როგორც "ინტერპრესნიუსს" "საქართველოს განვითარების ფონდიდან" აცნობეს, რეგიონალური წამომადგენლობა პაატა ბურჭულაძემ ფონდის წევრებთან ერთად გახსნა.
ფონდის დამფუძნებელი ქუთაისის ქუჩებში ადგილობრივებსაც გაესაუბრა და მათი პრობლემები მოისმინა. დღესვე პაატა ბურჭულაძე სასტუმრო "ბაგრატში" შეკრებილ ადგილობრივებსაც შეხვდა, სადაც მან და თემატური ჯგუფის ხელმძღვანელებმა მოსახლეობას ფონდის ხედვები და მიზნები გააცნეს.
"დიდი მადლობა მინდა გადავუხადო ქუთაისელებს ასეთი თბილი დახვედრისთვის. დღეს საზოგადოება არის გახლეჩილი ორად, ასე გაგრძელება არ შეიძლება. ჩვენ პატარა ერი ვართ და უნდა გავერთიანდეთ. რეგიონებში მდგომარეობა არის კატასტროფული, ვითარება სასწრაფოდ უნდა გამოსწორდეს. ჩვენ ყველამ ერთად უნდა ავაშენოთ ჩვენი ქვეყანა და საქართველო სწორ გზაზე უნდა დავაყენოთ", - განაცხადა პაატა ბურჭულაძემ მოსახლეობასთან შეხვედრის დროს.
პაატა ბურჭულაძე ქუთაისელებთან ერთად ბოტანიკურ ბაღს ესტუმრა და ბაღის ცენტრალურ ნაწილში ნაძვი დარგო.
"საქართველოს განვითარების ფონდი" რეგიონული ოფისების გახსნას მთელი საქართველოს მასშტაბით გეგმავს. ფონდის რეგიონული ოფისები უკვე გაიხსნა თელავში, რუსთავში, ახალციხეში, ოზურგეთში და ქუთაისში.
