ქართული რაგბის მომავალი საიმედო ხელშია, - ამის შესახებ საქართველოს მორაგბეთა ეროვნული ნაკრების მთავარმა მწვრთნელმა მილტონ ჰეიგმა, გერმანიის ეროვნულ ნაკრებთან მოპოვებული გამარჯვების შემდეგ ავჭალის მედია-დარბაზში გამართულ პრესკონფერენციაზე ისაუბრა.
მილტონ ჰეიგმა ახალგაზრდა ქართველი მორაგბეეების თამაშით კმაყოფილება გამოთქვა და აღნიშნა, რომ მათ ნაკრების სტაჟიან წევრებთან ერთად დასახულ მიზანს თავი კარგად გაართვეს.
"მიზნად მეტოქის წნეხის ქვეშ მოქცევა გვქონდა დასახული და მიუხედავად იმისა, რომ პირველ 15 წუთში ბევრი შეცდომა დავუშვით, ეს მაინც მოვახერხეთ. ძალიან ნიჭიერი ახალგაზრდები გვყავს და ადრინდელ ნათქვამს კვლავ გავიმეორებ - ჩვენი რაგბის მომავალი საიმედო ხელშია!
ამის გარდა, გუნდის ლიდერებსაც გამოვარჩევ. ზოგადად, იდეალურია მოდელი, როდესაც გუნდში ახალი ტალანტები ასაკიან ლიდერებზე არიან მორგებულნი. ფაქტია, დღეს ამ მოდელმა გაამართლა. ჩვენი მიზანია, დინამიური თამაში პრაქტიკაში ვისწავლოთ.
დიდი იმედი მაქვს, რომ ტრავმირებული მორაგბეები პორტუგალიასთან თამაშისას შემოგვიერთდებიან," - განაცხადა მილტონ ჰეიგმა.
საქართველოს მორაგბეთა ეროვნულმა ნაკრებმა გერმანიის ნაკრები ანგარიშით 59:7 დაამარცხა და ევროპის ერთა თასზე პირველი გამარჯვება მოიპოვა.
