ამერიკელი ექსპერტები მსოფლიოში ბოლო პერიოდში განვითარებული მოვლენების ფონზე საქართველოს მიმართ არსებულ საფრთხეებს აფასებენ. როგორც "ამერიკის ხმის" ქართულ რედაქციასთან საუბრისას სტრატეგიული და საერთაშორისო სწავლებების ცენტრის ანალიტიკოსმა ჯეფრი რათკემ განაცხადა, საქართველო ნატო-ს წევრი არ არის და როდესაც მის დაცვაზეა საუბარი, უნდა გავითვალისწინოთ, რომ ნატო წევრებს სხვანაირად დაიცავს, საქართველოს კი სხვანაირად.
"რაც შეეხება საქართველოს: ალიანსსა და საქართველოს კარგი ურთიერთობები აქვთ, კავშირები რეგულარულად მტკიცდება. მეტი სიახლოვის სურვილი ნატო-ს ბოლო შეხვედრაზეც გამოჩნდა. თუმცა ისიც უნდა გვახსოვდეს, რომ საქართველო ალიანსის წევრი არ არის და ამიტომ, მის მიმართ არსებული პასუხისმგებლობა, როცა მის დაცვაზე ვსაუბრობთ, სრულიად განსხვავდება სხვა, ნატო-ს წევრი ქვეყნის დასაცავად აღებული პასუხისმგებლობისგან", - განაცხადა ანალიტიკოსმა.
ჯორჯ ვაშინგტონის ევრაზიული კვლევების პროფესორის, კორი ველტის განცხადებით კი, საქართველოსთვის უშუალო საფრთხეს წარმოადგენს თუ თურქეთ-რუსეთის დაპირისპირების ფონზე სომხეთ-აზერბაიჯანს შორის კონფლიქტის ესკალაცია მოხდება.
"საქართველოსთვის უშუალო საფრთხედ სომხეთ-აზერბაიჯანს შორის კონფლიქტის შესაძლო ესკალაცია მგონია, მითუმეტეს, თუ ამ დაპირისპირებაში არაპირდაპირ აისახა თურქეთ-რუსეთის კონფლიქტი - ერთი მხრივ, რუსეთისა და სომხეთის, მეორე მხრივ კი, თურქეთ-აზერბაიჯანის ახლო კავშირებით. მნიშვნელოვანია, რომ მწვავე გარემო განეიტრალდეს, საქართველოს საჰაერო სივრცეც არაერთხელ დაირღვა ბოლო პერიოდში, რაც ვფიქრობ, მასზე ზეწოლის მოსახდენად კეთდება, რომ საპასუხო რეაქცია გაკეთდეს. მიუხედავად იმისა, მისცემენ თუ არა საქართველოს MAP-ს ან წევრობას, აქტიურად უნდა გაგრძელდეს ნატო-ს საწვრთნელი ცენტრის განვითარება თბილისთან ახლოს. სხვადასხვა სფეროებში, საქართველოსთან მჭიდრო კავშირები უნდა გააგრძელოს შეერთებულმა შტატებმაც. და ბოლოს, საქართველო, ამ ახალ რეალობაში, საბედნიეროდ პირდაპირი მსხვერპლი არ არის, თუმცა მდგომარეობა რა თქმა უნდა, საფრთხეებს შეიცავს", - განაცხადა ველტმა.
ანალიტიკოსების აზრით, საქათველოსთვის ჩრდილოატლანტიკური ხელშეკრულების ორგანიზაციასთან აქტიური თანამშრომლობა და ალიანსის გაწევრიანების მიმართულებით აქტიური სვლა კარგი ალტერნატივაა იმ რთულ გარემოში, რომელიც მეზობელი ქვეყნებისა თუ ზოგადად ნატოსთვის დამატებითი გამოწვევების ფონზე ჩამოყალიბდა.
