რუსეთთან ურთიერთობის საკითხებში პრემიერ-მინისტრის სპეციალური წარმომადგენლის ზურაბ აბაშიძის განცხადებით, საქართველოს მოქალაქეებისთვის რუსეთის ვიზები არ მოიხსნება და საუბარია მხოლოდ სავიზო რეჟიმის გამარტივებაზე, ისიც გარკვეული კატეგორიისთვის. 
როგორც აბაშიძე "ინტერპრესნიუსთან" საუბარში აცხადებს, საქართველოს ინტერესებშია მის მოქალაქეებს ჰქონდეთ თავისუფალი გადაადგილების საშუალება, სადაც სურვილი აქვთ, თუმცა ამ მიმართულებით, პირველ რიგში, ევროკავშირთან მიმდინარეობს მუშაობა. რაც შეეხება რუსეთის მიერ საქართველოს მოქალაქეებისთვის სავიზო რეჟიმის გამარტივებას, აბაშიძის თქმით, თუ მოსკოვსაც ექნება ასეთი მზაობა, გამოჩნდება, თუმცა ქართული მხარე ამაზე აქცენტირებას არ აკეთებს. 
რუსეთის მხრიდან ბოლო პერიოდში რამდენჯერმე გაკეთდა კომენტარი საქართველოს მოქალაქეების გარკვეული კატეგორიისთვის სავიზო რეჟიმის გამარტივების შესაძლებლობაზე. საუბარი იმაზე, ნამდვილად არსებობს თუ არა ასეთი მზაობა, დღეს, პრაღის ფორმატში დაგეგმილ შეხვედრაზე იქნება.
"მოვისმინეთ, რას გულისხმობენ, ნამდვილად ასეა თუ არა, როდიდან და ა.შ. არავითარი წინაპირობები რუსეთის მიერ სავიზო რეჟიმის გამარტივებისთვის არ არის, იმიტომ რომ ჩვენ 2011 წლიდან საერთოდ გაუქმებული გვაქვს ვიზები რუსეთის მოქალაქეებისთვის. წელს მათთვის და კიდევ დაახლოებით 90 ქვეყნის მოქალაქეებისთვის კიდევ უფრო გამარტივდა სავიზო რეჟიმი. ჩვენ განსაკუთრებულ აქცენტირებას ამ თემაზე არ ვახდენთ. რუსეთის გადასაწყვეტია, აქვს თუ არა ასეთი მზაობა და სურვილი გადადგან შესაბამისი ნაბიჯი", - განაცხადა აბაშიძემ. 
რამდენად დგას ქართული საზოგადოება რუსეთის ვიზების გამარტივების საჭიროების წინაშე და მნიშვნელოვანია თუ არა ეს საქართველოს მოქალაქეებისთვის, ზურაბ აბაშიძე აცხადებს, რომ გარკვეული ნაწილისთვის – კი, განსაკუთრებით მათთვის, ვისაც რუსეთში ნათესავები ჰყავს. 
"რუსეთში ცხოვრობს საქართველოს ყველაზე დიდი დიასპორა. ბევრს აქვს სურვილი რუსეთს ეწვიოს და ამისთვის დიდ სირთულეებს აწყდება. ამჟამად, უახლოესი ნათესავის ან რუსული ორგანიზაციებიდან ოფიციალური მოწვევის საფუძველზე გასცემენ ვიზას. ჩვენს მოქალაქეებს ექმნებათ პრობლემები და ჩვენს ინტერესშია, რომ მათ ჰქონდეთ თავისუფალი გადაადგილების საშუალება, სადაც სჭრიდებათ და სადაც სურვილი აქვთ. ამის გამო ვმუშაობთ, უპირველეს ყოვლისა, ევროკავშირთან სავიზო ლიბერალიზაციის კუთხით და იმედი გვაქვს, რომ ეს მომავალ წელს შედეგს გამოიღებს. თუ რუსეთის მხარესაც ექნება ასეთი სურვილი, მზაობა, გამოჩნდება. ჩვენ განსაკუთრებულ აქცენტირებას, პედალირებას ამ თემაზე არ ვახდენთ", - განაცხადა ზურაბ აბაშიძემ. 
ამასთან, ზურაბ აბაშიძის აზრით, არასწორი და ხელოვნურია საკითხის დაყენება ისე, რომ ევროკავშირის მხრიდან ვიზალიბერალიზაციის საკითხის დადებითად გადაუწყვეტელობის შემთხვევაში, რუსეთის ვიზების გამარტივებამ შესაძლოა, საზოგადოებრივ განწყობებზე გარკვეულწილად იმოქმედოს. 
"მაშინაც იყვნენ სკეპტიკოსები, როდესაც თვითმფრინავის დამატებითი რეისები გაიხსნა და ამბობდნენ, რომ ახლა ყველა მოსკოვში გაფრინდება, მაგრამ ასე ხომ არ არის? ადამიანი მიდის იქ, სადაც მას სჭირდება და ამაში ხელი არ უნდა შეეშალოს – ასე დგას საკითხი და არა ისე, რომ გინდა თუ არა, იქით გაფრინდი ან იქით წადი. ჩვენს მოქალაქეებს უნდა შევუქმნათ მაქსიმალური გადაადგილების საშუალება ყველა მიმართულებით, სადაც კი მათ სჭირდებათ. ამ შემთხვევაში ევროკავშირთან საუბარი გავქვს სრული ვიზალიბერალიზაციის, ანუ ვიზების მოხსნის თაობაზე, ხოლო რუსეთთან _ გამარტივებაზე. რუსეთთან ვიზები არ მოიხსნება, ამაზე საუბარი არ არის. როგორც რუსული მხარის წარმომადგენლები ამბობენ, გარკვეული კატეგორიებისთვის ვიზების გამარტივების საკითხს განიხილავენ. ეს, ალბათ, უფრო შეეხება ნათესაურ კავშირებს და ბიზნეს-თანამეგობრობას, იმათ, ვინც საქმიანობენ რუსეთში. გარდა ამისა, უამრავ ქართველს, რომელიც რუსეთში ცხოვრობს, საქართველოში ნათესავები ჰყავს. ამ ხალხს აქვთ მოთხოვნა, რუსეთში ჩავიდნენ _ ასეთია ობიექტური მოცემულობა და თუ ეს გამარტივდება, ამ კატეგორიის ჩვენს მოქალაქეებს პრობლემებს მოუხსნის. ვისაც არ სჭირდება რუსეთში წასვლა, არ აინტერესებს, არ უნდა, ძალით არავინ მიერეკება. ვიზის გამარტივება არ ნიშნავს იმას, რომ გინდა თუ არა, იქით წახვიდე", - განაცხადა ზურაბ აბაშიძემ.