„წაგებულია მიშა! მას აქვს არჩევანი ან  წესიერად წავიდს ან კიდევ...  გამორიცხულია მისი პრემიერმინისტრობა. პარლამენტის თავმჯდომარეობას ჩალიჩობს, მაგრამ   პარლამენტის თავმჯდომარე რომ გახდე, არჩევნები უნდა მოიგო და მაგას არჩევნებს აღარ მოვაგებინებთ“, - გვითხრა  „ეროვნული ფორუმის“ ლიდერმა გუბაზ სანიკიძემ. რადგან „ფორუმი“ ახლახან ბიძინა ივანიშვილის კოალიციის წევრი გახდა, საუბარიც ამ თემით დავიწყეთ:

- პროცესის დროში გაწელვა  ბუნებრივი პროცესი იყო. ჩვენ ურთიერთობა გვქონდა ახალშექმნილ პოლიტიკურ ძალასთან, რომელსაც ჩამოყალიბებისთვის სჭირდებოდა გარკვეული დრო. იმის გამო კი არ ვდუმდით, რომ რაღაცას ვმალავდით. ჩვენ გარკვეული ურთიერთობები გვქონდა ბატონ ბიძინასთან, იმ პოლიტიკურ პარტიებთან, რომლებიც მის გაერთიანებაში არიან, მაგრამ როდესაც სათქმელი არ გაქვს, სჯობს არ ილაპარაკო.

ანუ, არ ადასტურებთ მოარულ ხმას, რომ ივანიშვილისთვის „ეროვნული ფორუმის“ ზოგი ლიდერიმისაღები იყო და ზოგი – არა?

- არა, რას ამბობთ. ზოგი იმასაც ამბობს, - კომენტარებს რატომ არ აკეთებდით იმ ჭორებზეო. "ფორუმი“ 7-ჯერ მაინც დაშალეს ამ ჭორებით. როდესაც შენზე ჭორები ვრცელდება, ერთის მხრივ კარგია - ე.ი. აქტუალური ხარ. ჭორების უარყოფისათვის პრესკონფერენციებს ვერ მოვაწყობდით და ვერც ინტერვიუებს მივცემდით. ჩვენი ურთიერთობა გაირკვა კოალიციასთან. რომლის სრულფასოვანი წევრებიც ვართ. კოლიაცია ოთხ სუბიექტიანია. ბატონი ბიძინას პოლიტიკურ ჯგუფში, რომლის პრეზენტაცია მოხდა, ძალიან ღირსეული ადამიანები არიან. ჩვენ მალე გადავალთ ქმედებებზე.

მაინც ჩაგეკითხებით, როდესაც ლაპარაკობთ, რომ „ფორუმი“ კოალიციის სრულფასოვანი წევრია, ეს ნიშნავს, რომ ოთხივე პარტია თანაბრად იქნება წარმოდგენილი ერთიან სიაში?

- ეს საკითხი დახურულ თემად დავტოვოთ, რადგან შეთანხმება გვაქვს, რომ ამაზე ნაკლებად ვისაუბროთ. თუმც გეტყვით, რომ ეს საინტერსო და მთავრი თემა არ არის. გარწმუნებთ, უპრობლემო ურთიერთობები გვაქვს ჩვენს პარტნიორებთან, როგორც ბატონ ბიძინასთან, ასევე კოალიციის დანარჩენ წევრებთან. ამ საკითხზე არანაირი პრობლემა არ არის და არც იქნება მომავალში.

კოლიციაში შესვლამდე „ფორუმს“ ბლოკი ჰქონდა „ტრადიციონალისტებთან“ და „ქალთა პარტიასთან“.  ივანიშვილისაგან პირობა იყო, რომ მხოლოდ „ფორუმი“ და გუგული მაღრაძე შესულიყვნენ მის კოალიციაში?

- არავითარი პირობა არ ყოფილა. თავის დროზე, როდესაც  საარჩევნო გარემოს საკითხი იდგა, ჩვენ ბლოკი გავაკეთეთ „ტრადიციონალიტებთან“ და „ქალთა პარტიასთან“. ეს საარჩევნო ბლოკი არ ყოფილა. საარჩევნო გარემოს გაუმჯობესებისათვის მუშაობა დასრულდა, ახლა სხვა ვითარება გვაქვს, ამიტომ სამივე სუბიექტმა ჩავთვალეთ, რომ მოქმედების თავისუფლება დაგვეტოვებინა. აქედან გამომდინარე მოხდა იმ ბლოკის გაუქმება. რა იქნება, როგორ იქნება და რა ურთიერთობები ჩამოყალიბდება ქალბატონ გუგულისთან და ბატონ აკაკისთან, მათი გადასაწყვეტია და არა „ეროვნული ფორუმის“.

კოალიციისათვის რომელიმე პოლიტიკური ძალის დამატების საკითხი ჯერ-ჯერობით დღის წესრიგში არა დგას. ვნახოთ ვითარება როგორი იქნება. ჩემი აზრით, თუ გარე ფაქტორები გამწვავდა, კოალიციის გაფართოებასა და შევიწროებაზე კი არა, შეიძლება დიდი, ფართო ფრონტის გაკეთებაზე ვიფიქროთ, რათა ოპოზიცამ ის შეცდომა არ დაუშვას, რაც 2008 წელს დაუშვა. ოპოზიციის სტრატეგიული შეცდომა იყო, როდესაც პასუხისმგებლობა უპასუხისმგებლო ხელისუფლებას გადავაბარეთ და ოპოზიციამ მორატორიუმი გამოაცხადა. ამის დაშვება აღარ შეიძლება. თუ ქვეყანას გარედან საფრთხეები დაემუქრა, ჩვენ პასუხისმგებლობა უნდა ავიღოთ. პასუხისმგებლობის მქონე ძალების - პარტიების, არასამთავრობოების, საზოგადოების გაერთიანება უნდა მოხდეს, რათა ქვეყანას მესამედ არ დაემუქროს ოკუპაცია.

რა შეცვლება თუ საზოგადოებამ აიღო პასუხიმგებლობა?

- ძალიან ბევრი რამე. თუ აქ ოპოზიციის, საზოგადოების, სამოქალაქო სექტორის საერთო ქართული თანხმობა იქნა, ჩვენ  როგორც სუბიექტი, როგორც ერი ანგარიშგასაწევი ვიქნებით. ქართველი ხალხი დღეს არ ვართ სუბიექტი და სუბიექტად უნდა ვიქცეთ. თუ აქ რეგიონული კრიზისი შეიქმნა, დიდი ქართული შეთანხმება დაგვჭირდება, რომ თურქსაც, რუსსაც, ირანელსაც ის ვუთხრათ, რაც იმ დროს იქნება სათქმელი და ქვეყანას საფრთხეები ავაცილოთ. ვნახეთ, რომ აგვისტოს ომის დროს ქვეყანა უპატრონოდ იყო და ასე უპატრონოდ ვეღარ დავტოვებთ. რუსეთმა ხომ თქვა, - აგვისტოს ომი იმიტომ იყო, რომ საქართველო დაგვესაჯა ამერიკის პარტნიორობისთვისო. ეს ხიფათი კიდევ გვაქვს.  არაა გამორიცხული ისე გავნითარდეს მოვლენები აქ არავინ არაფერს შეგვეკითხოს. ქვეყანა დარჩება, არ დარჩება, სისხლში გვაბანავებენ თუ რა იქნება, აქ გადამწყვეტი როლი მხოლოდ პოლიტიკოსებს კი არა, ქართველ საზოგადოებას დაგვეკისრება. შესაძლოა, ისეთი ვითარება  შეიქნას, რომ არჩევნებიც უკან მოგვრჩეს და ყველაფერიც.

თქვენ ქართველი ერის გაერთიანების აუცილებლობაზე ლაპარაკობთ, მაშინ, როდესაც ოპოზიციის გაერთიანება ვერ ხერხდება სააკაშვილის ხელისუფლებიდან გასაშვებად.

- საპრეზიდენტო არჩევნების დროს ოპოზიცია ერთიანი იყო? არ იყო, მაგრამ მოვიგეთ. თუმც საქმე ბოლომდე არ მივიყვანეთ და ეს იყო ჩვენი შეცდომა. მეორე ტურზე უარი არ უნდა გვეთქვა და როდესაც ხალხი ამის გამო პრეტენზიას გვიყენებს, ცამდე მართალია. ჩვენ მოგებული გქვონდა, მაგრამ ამას გაფორმება სჭირდებოდა.

ახლა მაინც თქვით რატომ არ იბრძოლეთ. ჩემთან ინტერვიუში ჯაბა ჯიშკარიანმა განაცხადა, რომ ამაში რესპუბლიკელების ბრალი იყო.

- არა, რა რესპუბლიკელები... ყველა ჩვენგანის ბრალია. „ფორუმი“ მეორე ტურის მომხრე იყო, მაგრამ ჩემს თავს ვადანაშაულებ იმაში, რომ თავგანწირვით არ დავიცავით ეს საკითხი. ჩვენ არ ვიყავით საპარლამენტო არჩევნების მომხრენი, მაგრამ მარტო ჩვენ არ ვწყვეტდით იქ საქმეს.

მაშ რომელმა პოლიტიკურმა ძალებმა გადაწყვიტეს ეს საკითხი?

- რა საჭიროა თქმა. ყველამ ყველაფერი იცის. შეცდომა იყო როდესაც დავეთანხმეთ ფორმულას  - საპარალმენტო არჩევნები იქნება რეალურად მეორე ტური.  არ იყო ასე. საპრეზიდენტო არჩევნები ბოლომდე უნდა მიგვეყვანა.

მიგაჩნიათ, რომ გახლეჩილი ოპოზიცია ერთმანეთს ხმებს არ წაართმევს?

- საინტერესო ინიციატივა იყო ბიძინა ივანიშვილისაგან, რომ შეიძლება შეთანხმებები გავაკეთოთ მაჟორიტარებთან დაკავშირებით. ოპოზიციამ ეს ვერ მოვახრეხეთ საპარლამენტო არჩევნების დროს. ბევრი მაჟორიტარული ოლქი ამის გამო წავაგეთ. მაგალითად, საბურთალოზე რეზო შავიშვილმა აიღო 18 ათასი ხმა, 6 ათასი ხმა აიღო თინა ხიდაშელმა და ერთი კანდიდატურა რომ გვყოლოდა, მოვიგებდით. მაშინ ჩვენ მოგებული წავაგეთ. ოპოზიციამ ურთიერთთავდასხმებს თავი უნდა დაანებოს. შესაძლოა ოპოზიციურ ძალებს შორის თემატური კოორდინაცია, კონსულტაციების რეჟიმი, მუდმივ რეჟიმში თანამშრომლობა კოლეგებთან. გამოსავალი არის, ოღონდ ამისთვის პოლიტიკური ნებაა საჭირო.

ნინო ბურჯანაძეზე ბიძინა ივანიშვილმა განაცხადა, რომ დასავლური ყაიდის პოლიტიკოსი არ არის. თქვენ როგორ ფიქრობთ, ბურჯანაძე პრორუსია? 

- სახელმწიფო პროპაგანდის მსხვერპლი არ ვარ და ნინო ბურჯანაძეს ვერავითარ შემთხვევაში ვერ დავარქმევ პრორუსს, მაგრამ მას აქვს განსხვავებული შეხედულება ისევე, როგორც კახა კუკავას, ნიჭიერს კაცს, რომელსაც დიდი პატივს ვცემ. ქალბატონი ნინო  გამოცდილი და წონიანი პოლიტიკური ფიგურაა.  

ბიძინა ივანიშვილმა არ გამორიცხა მათთან ტექნიკური თანამშრომლობა. ეს რას ნიშნავს?

- ბევრ რამეს ნიშნავს... პოლიტიკაში შეიძლება არსებობდეს სტრატეგიული და ტაქტიკური მიზნებიდან გამომდინარე დახურული თემები, დახურული ურთიერთობები. გავითვალისწინოთ,  რომ საქმე გვაქვს ნამუსგარეცხილ ხალხთან, (ნაცებს და მათ პროპაგანდას ვგულისხმობ), როგორც ყველაფერი არ იჭმება, ისე ყველაფერი არ ითქმება. ვადასტურებ, რომ „სახალხო კრება“ და ქალბატონი ბურჯანაძე არ არიან ხელწამოსაკრავი ძალა. ვითარება ქმნის გადაწყვეტილების აუცილებლობას, ვნახოთ როგორ განვითარდება მოვლენები. მიმაჩნია, რომ პირველი რაც უნდა გააკეთოს ოპოზიციამ, ერთმანეთზე თავდასხმები შეწყვიტოს. ამას „ეროვნული ფორუმი“ არ მიესალმება. ამით საქვეყნო საქმე ფუჭდება და ხელს ითბობს ნაცმოძრაობა, ჩვენ ნაცმოძრაობა უნდა დავშალოთ,  ჩვენ კი არ უნდა დავიშალოთ. თუ არ გამოდის პოლიტიკური ბლოკი და ალაინსი, ეს არ ნიშნავს, რომ ოპოზიციური პარტიები ერთმანეთის მტრები ვიყოთ. ამას ხალხი დააფასებს. პოლიტიკაში ბევრი რამ კულუარებში წყდება. კულუარებში გადაწყვეტილი საქმეები ბევრს ცუდი ჰგონია, მაგრამ - პირიქითაა. კულუარებში ბევრი კარგი საქმე კეთდება და შეიძლება კულუარული ურთიერთობით უკეთ გამოვიდეს საქმე, ვიდრე ღიად. ეს პოლიტტექნოლოგიაში ძალიან ცნობილი რამაა.    

ზემოთ ბრძანეთ, კოალიციის სუბიექტებს მეგობრული დამოკიდებულება გვაქვსო. „რესპუბლიკელები“ ლიბერალური ძალაა „ფორუმი” კი - კონსერვატიული. კეთდება პროგნოზი, რომ განსხვავებულობა თქვენს პატრნიორობას გაართულებს.  
- ლიბერალიზმისა და ეროვნული ფასეულობების დაპირისპირება არასწორია. იაპონიაზე ლიბერალური ქვეყანა არ არსებობს, მაგრამ ის დამყარებულია ძველ იაპონულ მორალზე, ფასეულობებზე. ხშირად წამიკითხავს სტატიები, სადაც საკითხი ასე ისმებოდა - მართლმადიდებლობა თუ პროგრესი. ვინც საკითხს ასე სვამს, ის ქვეყნის მტერია. პროგრესი სწორედ ქრისტიანობამ მოიტანა. ლიბერალიზიმი და ადამიანის უფლებები ქრისტიანობიდან მოდის, აბა ქრისტიანობანდე ხალხი არენაზე გლადიატორების ჟლეტას უყურებდა. ქრისტიანობამ მოიტანა სუსტის დაცვა, თანადგომა და მისთვის ანგარიშის გაწევა. პროგრესი ქრისტიანობის წიაღში დაიბადა. თუმც მიუხედავად იმისა, რომ ლიბარალიზმი მომწონს,  ვერ ვიქნები  სექსუალური უმცირესობების უფლებების დამცველი.  შეხედეთ დღევანდელ საინფორმაციო საშულებებს - უზნეობის, არაერთგულების, გადახრების აღლუმია. არ ვამბობ, რომ მათ უნდა დავერიოთ და დავხოცოთ, მაგრამ უმცირესობა, თავის  უფლებებს რომ მახვევს, ამას ვერ დავუშვებ. ეს უკვე ფსევდოლიბერალიზმია. ჩემი უფლებების საზიანოდ შენი უფლებების წამოიწიოს წინ და იყოს დაცული,  ასე არ იქნება. დღეს სწორედ ეს ხდება - ქართულ ტელევიზიებში უზნეობის პროპაგანდა მიდის. ჩვენთან ასეთი მიდგომაა: ქალი უნდა იყოს სექსუალური და კაცი - ქარიზმატული. შენ კულტურას ეს ესადაგება? არ უნდა გაარკვიო? ქალს რომ მისი ქმრის თანდასწრებით ეუბნები, - სექსუალური ხარო, ამით რას ეუნები? ვინც ამას იტანს, ვაი იმის ქმრობას. ეს არ არის ქართული კულტურისა და ფსიქიკისათვის მისაღები. ქართული კულტურა და ცივილიზაცია უფრო ძველია ვიდრე დასავლური. ეროვნება აქვს ადამიანს და  ცხოველს არ აქვს. მე აკადემიკოსი ვიყო და მეორე კლასელმა ჭკუა მასწავლოს, ეგრე არ არის. ბევრი გვინახავს ახალგაზრდობაში გალიბერალებული და გასულელებული, მაგრამ ბოლოს ასაკში რომ შედის, ამბობს - რა სისულელე ყოფილა ეს ყველაფერიო.

მამისეულ სახლზე ტკბილი არაფერი არ არის. რად უნდა ამას ექსპერიმენტების ჩატარება საკუთარ ქვეყანაზე? „ფორუმი“ ამ ფასეულობების დამცველი იქნება ბოლომდე. ამისთვის არის „ეროვნული ფორუმი“ შექმნილი და ამიტომ გვინდა ჩვენს პარტნიორებთან ერთად მოვიდეთ ხელისუფლებაში. ჩვენ თუ განსხავებულები ვართ, ამით ერთმანეთს ვაწონასწორებთ, იქნებ განსხვავებულობა იყოს გამოსავალი ამ ქვეყნისთვის და არა ერთ ჭკუაზე ყოფნა? გვქონდეს ყველას ჩვენი მოსაზრება და ეს არ იყოს მტრობის ტოლფასი. არავის დავუძახებ, რომ მოღალატეა და ნურც მე დამიძახებენ - ბნელი ხარო. იმიტომ, რომ არ ვარ ბნელი ადამიანი. სიბნელე არ არის ის, რომ საკუთრი მამის სახლი გირჩევნია სხვის სასახლეს. ადამიანი ეს არის. რატომ ზის ნორა კვიციანი? ის დააშავა, რომ თავისი ძმა უყვარს. ვალერი გელბახიანს არ უშვებენ საკუთარ დედასთან, რომელიც გადადებულია სასიკვდილოდ. რა პოლიტიკაა? ადამიანები ვართ თუ არა? ჩამოუშვან ის კაცი, მით უმეტეს არაფერი  დაუშავებია. ამ კაცთან საკმაოდ მწვავე დაპირსიპირება და პოლემიკა მქონდა, მაგრამ როდესაც კაცს დედა უკვდება, შეუშვი რა თავის სახლში, ღმერთმა დიდხანს აცოცხლოს ვალერის დედა, მაგრამ უბედურება რომ მოხდეს, ის კაცი ხომ მთელი ცხოვრება მწყობრიდან იქნება გამოსული. კაცს უნდა საკუთარ დედასთან იყოს და ამის უფლებას ქართული სახელმწიფო ქართველ კაცს არ აძლვს.

ეს ფსევდოლიბერალები დედაშვილობას, და-ძმობას და მამაშვილობას ებრძვიან. ბიძინა ივანიშვილს, აქ დაბადებულ, ეთნიუკურად ქართველ კაცს, მოქალაქეობა წაართვევს. რატომ? გაუფუჭებს ბიძინა ივანიშვილი ამ ქვეყანას რამეს? რომ არ მოიპარავს და არ გაძარცვავს ხომ ცხადია. ხელისუფლებასთან იდეოლოგიის კი არა ფასეულობების გამო ჭიდაობა წავიდა. ზნეობრივი კატეგორიების დაცვას რომ ვითხოვ, რატომ მეუბნები რომ ბნელი ვარ? მაშინ მოდი და ვიჭიდავოთ. გავარკვიოთ ქართველი ხალხის ჭკუაზე მე ვარ თუ ეს ხელისუფლება. რატომ არის, რომ საღამოს ფილმს ვერ ვუყურებ? რატომ მატენი ინგლისურს? მომხრე ვარ, რომ ჩვენ ახალაგაზრდებმა მარტო ინგლისური კი არა, გერმანული, რუსული, ფრანგული, ესპანური, თურქული ისწავლონ, მაგრამ აქ ქართული უნდა იყოს გაბატონებული. აკვნიდან რატომ მასწავლი უცხო ენას? გარუსება და გათათრება მეტი ხომ არაფერი არ იყო. გადაგვარება არ ვარგა და ვინ გადამაგვარებს რა მნიშვნელობა აქვს? სააკაშვილი ხარ თუ თემურ-ლენგი ვერ მომერევი, ვერ გადამაჯიშებ! ამას არ გაპატიებ!

რომ არ აპატიოთ, ამისთვის რას აკეთებთ?

- როდესაც ბიძინა ივანიშვილს ჰკითხეს, - არჩევნები რომ გაყალბდეს, როგორ მოიქცევითო, მან უპასუხა, - ქუჩაში გამოვალო. ამ ხელისუფლებასთან ორი ხელით ბრძოლაა საჭირო. როცა საჭიროა, მოელაპარაკო, როცა საჭიროა ზემოქმედებისთვის ქუჩაში გახვიდე. ქუჩა ქვეყნის გადატრიალებას არ ნიშნავს. ამ კაცმა თქვა, - პატიოსნად წავალთ არჩევნებზე და ვიბრძოლებთ, რომ ხელისუფლებას მოვუგოთ. მანამდე ისეთი გარემო უნდა შევქმნათ, რომ ამათ გაყალბების სურვილი დაეკარგოთ.   მუქარა, - თუ გააყალბებ, ქუჩაში გამოვალ, უკვე წინ გადადგმული ნაბიჯია იმისკენ,  რომ ხელისუფლებამ არ გააყალბოს არჩევნები. ბიძინა ივანიშვილის განაცხადი ატომური მუქარასავითაა ხელისუფლებისათვის და იქნებ ჭკუაზე მოვიდეს.

სააკაშვილს ცხვირ-პირზე ეტყობა, რომ კარგი არაფერი უთქვამთ მისთვის აშშ-ში. როდესაც ობამამ უთხრა, იმედი მაქვს, რომ დემოკრატიულ და სამართლიან არჩევნებს ჩაატარებო, ესეც მუქარაა. 

მიშა ძალიან ცოდვა, საწყალი კაცია. დედამიწის ზურგზე არავის ენდობა. არავის უყვარს. მეგობარი არ ჰყავს და ყველას ეშინია მისი. როგორც კი ფეხი გადაუტრიალდება, ყველა წიხლს მიაყოლებს. საქართველოში შეიძლება შიშზე დაამყარო ძალაუფლება?! როგორი უვიცი, ჭკუამოკლე და ჭკუათხელი უნდა იყოს კაცი, რომ ქართველების დაშინება გაიხადოს მთავარ ამოცანად. არ შინდება ეს ხალხი. ცოტა ხანს გაჩერება იცის, მაგრამ მერე საარაკო ამბებს სჩადის.

ჩვენი ამოცანაა ქართველობა ფეხზე დავაყენოთ, საარჩევო ყუთთან მივიყვანოთ და დამთავრებულია მიშას საქმე. რატომღაც მგონია, რომ ამას მოვახერხებთ.

ნაცები ჩემი პირადი მტერი კი არა, ჩემი სამშობლოს მტრები არიან, რაც ყველაზე ძვირფასი გამაჩნია სააქაოს. ეს ღვთის მგმობი ხალხია. ქვეყანა არ უნდა გადავაყოლოთ ამ ხელისუფლებას, მაგრამ ამათ იმდენი ადამიანი გაამწარეს, ძალიან რთული იქნება ხალხის გაჩერება. ადამიანებს პირიდან ლუკმა ამოართვეს და უსამართლობაზე საშინელი არაფერია. ჩვენს ადამიანობაზეა დამოკიდებული, რომ მოვუგებთ, მერე როგორ მოვიქცევით. ვისაც აქ დაედგომება, დადგება. თავისუფალი ქართული სასამართლო გაარჩევს ყველაფერს. ნაცმოძრაობის წევრებზე დევნას არავინ აპირებს, მაგრამ ვისაც ქვეყნისთვის და კანონთან დაშავებული აქვს,  ის დასიჯება. გირგვლიანის მკვლელები რომ ციხეში შებრუნდებიან ამაში ეჭვი ეპარება ვინმეს? ზურა ვაზაგაშვილის მკვლელები რომ ციხეში წავლენ, ამას უნდა შეეგუონ და მოემზადონ ციხეში წასასვლელად. აგვისტოს ომში ქართული ჯარი რომ გაიყიდა, კოდორი რომ დაიცალა, ამაზე პასუხისგებაც მოუწევთ. ამქვეყნად არაფერი მარადიული არ არის და მით უმეტეს მიშა ვერ იქნება მარადიული და სანამ სიბოროტეს ჩაიდენს, კარგად გაანალიზოს შერჩება თუ არა. სიბოროტეში ვგულისხმობ ადამიანების გამწარებას, ცემა-ტყეპას, უსამართლოდ ციხეში ჩაგდებას და მკვლელობას. ტვინი გაანძრიეთ ნაცებო! ყველაფერი ინდივილუარურ რეჟიმში გადავა. აბა კოლექტიურად თქვენს გასამართლებას არავინ აპიარებს. ღმერთი არ გაგიწყრეთ და უკანონობა არ ჩაიდინოთ. გახსოვდეთ,  ჯვარცმას ყოველთვის აღდგომა მოსდევს!