ინტერვიუ "თავისუფალი დემოკრატების" ლიდერ ირაკლი ალასანიასთან.

- ბატონო ირაკლი, უკვე ოფიციალურად გამოცხადდა, რომ "თავისუფალი დემოკრატები", "რესპუბლიკური პარტია" და ბიძინა ივანიშვილის გუნდი ერთიანი პოლიტიკური სტრუქტურითა და პროგრამით იმოქმედებენ. პოლიტიკაში გამოჩენამდე თუ იცნობდით ბიძინა ივანიშვილს? როდის შედგა თქვენი პირველი კომუნიკაცია? თქვენთვის თუ იყო ცნობილი პოლიტიკაში მოსვლის შესახებ მისი გადაწყვეტილება მანამ, სანამ ამ განაცხადს ღიად გააკეთებდა?

- არა, მე იგი პოლიტიკაში წასვლასთან დაკავშირებული განცხადების შემდეგ გავიცანი. ივანიშვილმა შეხვედრის თხოვნით მომმართა და ჩვენი პირველი შეხვედრაც შედგა. მანმადე კი, ბუნებრივია, ვიცოდი მისი საქმეების შესახებ ბოლო ათწლეულების განმავლობაში: თუ როგორ ეხმარებოდა ივანიშვილი ქართულ კულტურას, ქართულ სულიერებას, ქართულ მემკვიდრეობას და აქედან გამომდინარე, ძალიან პოზიტიური განწყობა მქონდა მის მიმართ.

- თქვენ საკმაოდ ფრთხილი ხართ პოლიტიკური პარტნიორების არჩევის საკითხში. არაპოლიტიკოს ბიძინა ივანიშვილთან პოლიტიკური პარტნიორობა ესოდენ მოკლე დროში, ასე ადვილად რა ფაქტორებმა გადაგაწყვეტინათ? 

- ამ ადამიანს ძალიან დიდი გამოცდილება აქვს სამუშაო ადგილების შექმნის, ჩვენს ქვეყანას კი ყველაზე მეტად სწორედ სწორი ეკონომიკური და სოციალური პოლიტიკა სჭირდება, რაც გააჩენს შესაძლებლობას, ადამიანები დასაქმდნენ. რეალურად, ქვეყანაში ყოველ სამ ადამიანში ორი უმუშევარია. ესაა უმწვავესი პრობლემა, რომელსაც ყოველდღიურად ვაწყდებით. რაც შეეხება მეორე მიზეზს, ესაა სოფლის მეურნეობის სტრატეგიულ დარგად აღქმა ჩვენი, ორივეს მხრიდან. დედაქალაქის მიღმა მცხოვრები მოსახლეობის 55% ყოველთვის სოფლის მეურნეობით იყო დაკავებული, ახლა კი ეს დარგი ტოტალურად დავიწყებული და დანგრეულია. საგარეო პოლიტიკური და უსაფრთხოების კუთხით მას იგივე ხედვა აქვს, რაც მე: საქართველოს ადგილი ევროპულ ოჯახში, ევროატლატლანტიკურ სივრცეშია და ჩვენ რუსეთთან პრაგმატული ურთიერთობები უნდა გვქონდეს. ყველა ეს საკითხი ქმნის ქართულ ოცნებას და მომავალ საქართველოს, როგორც ეროვნულ სახელმწიფოს. სწორედ ეს გახდა საფუძველი იმისა, რომ ჩვენ პოლიტიკური პარტნიორები ვართ. 

- თქვენი აზრით, რატომ გააკეთა ბიძინა ივანიშვილმა არჩევანი თქვენზე და "რესპუბლიკელებზე" და არა სხვა ძალებზე? 
 
- როგორც უკვე ვთქვი, აქ გადამწყვეტი ღირებულებითი თანხვედრაა ისეთ საკითხებში, როგორც არის სასამართლო სისტემის დამოუკიდებლობა, ელიტური კორუფციის აღმოფხვა, სოფლის მეურნეობის, როგორც სტრატეგიული დარგის განვითარების ხედვა და სხვა. რაც მთავარია, ჩემი აზრით, მისი პოლიტიკაში მოსვლა, სულ მცირე, მომავალი საპარლამენტო არჩევნებისთვის კონკურენტულ გარემოს ქმნის. ასე რომ, ბევრ ფუნდამენტურ საკითხზე საერთო ხედვები გვაქვს. ალბათ, ეს გახდა მისთვისაც ამ ნაბიჯის გადადგმის საფუძველი.

- მაინც რაში სჭირდებოდა ბიძინა ივანიშვილს "რესპუბლიკელები" და "თავისუფალი დემოკრატები", თუ საუბარია იმაზე, რომ მას საზოგადოებაში მხარდაჭერა ისედაც აქვს თქვენს მიერ ზემოაღნიშნული საქველმოქმედო და სასიკეთო საქმეების გათვალისწინებით? არ შეეძლო მას, დამოუკიდებლად ემოქმედა? 

- ივანიშვილს ისევე სჭირდება ის პოლიტიკური გამოცდილება, სუფთა პოლიტიკური წარსული და პოლიტიკური ავტორიტეტი, რომელიც ჩვენ გაგვაჩნია ქვეყნის გარეთ წარსულში დიპლომატიური საქმიანობის გამო, როგორც ჩვენ - მისი გამოცდილება ბიზნეს-გარემოში და მისი უნარი, სამუშაო ადგილები შექმნას. ასე, რომ, ეს ორივე მხარისთვის თანაბრად სასარგებლო პოლიტიკური კავშირია, თუმცა ის ჯერ კიდევ უნდა შედგეს, ვინაიდან ჩვენ ჯერ პოლიტიკურ ბლოკებზე არ ვლაპარაკობთ. არჩევნებამდე დიდი დროა დარჩენილი. ჩვენ პარტნიორები ვართ, ხოლო თუ როგორ პოლიტიკურ ერთობას შევქმნით, დამოკიდებულია დროზე და ამაზე ლაპარაკი ჯერ ნაადრევია. 

- "რესპუბლიკელებსა" და "თავისუფალ დემოკრატებს" შორის პოლიტიკური პარტიორობის მცდელობა ადრეც ყოფილა, იქნებოდა ეს ალიანსის თუ მოგვიანებით "რვიანის" ფორმატში, თუმცა ამან დიდხანს ვერ გასტანა. რა იძლევა საფუძველს, ვიფიქროთ, რომ ივანიშვილის გვერდით თქვენი ერთობა წარმატებული გამოდგება?

- "რვიანს" კონკრეტული ამოცანა ჰქონდა. ეს არ იყო პოლიტიკური ერთობა, ამიტომ კითხვა არასწორი მიმართულებით დასვით. "რვიანის" კონკრეტული ამოცანა იყო, საარჩევნო გარემოსთან დაკავშირებით მოლაპარაკება წარმატებით დაგვესრულებინა. თქვენ იცით, რომ "რვიანის" ორი წევრი, სამწუხაროდ, ხელისუფლებას არასაკმარის შემოთავაზებებზე დათანხმდა. ამან "რვიანის" საქმიანობის გაგრძელება შეუძლებელი გახადა, ვინაიდან მოლაპარაკება დასრულდა. 

რაც შეეხება ალიანსს, ეს ჩვენი პირველი საარჩევნო გამოცდილება იყო და ვთვლი, რომ მან თავისი პირველადი ამოცანა შეასრულა. ჩვენ ადგილობრივ არჩევნებზე ერთად გავედით. ახლა უკვე იმ გამოცდილებას, რომელიც მაშინ მივიღეთ, დამოუკიდებლად "თავისუფალი დემოკრატების" პარტიას ვახმართ და ახალ პარტნიორებთან ერთად საპარლამენტო არჩევნებზე გასასვლელად ვემზადებით.

- ახალ პოლიტიკურ პარტნიორებთან ერთად რუსეთთან ურთიერთობების დალაგებაზე საუბრობთ. როგორ ფიქრობთ, რამდენად და რა ფაქტორების გათვალისწინებით მოახერხებს ამას ბიძინა ივანიშვილი?
 
- ერთი ადამიანი ამას ვერ მოახერხებს. ეს არც ივანიშვილის გასაკეთებელია, არც ალასანიასი. ეს ქართული საზოგადოების გასაკეთებელია. იმას ვგულისხმობ, რომ ჩვენთვის ყველაზე მნიშვნელოვანი თავდაცვა იმ საფრთხეებისგან, რომელიც ჩვენს ირგვლივ არსებობს (და პირდაპირ ვთქვათ, რუსეთის პოლიტიკა დღეს საქართველოს ინტერესებს აზიანებს), პირველ რიგში, ის იქნება, რომ ქართული საზოგადოება ფუნდამენტურად ინსტიტუციურ დემოკრატიად შედგეს. ეს ჩვენი უმთავრესი თავდაცვა იქნება იმიტომ, რომ ამ შემთხვევაში ევროპასთან უფრო ახლოს ვიქნებით ინტეგრირებული და რუსეთთან საურთიერთოდ მეტი ძალა გვექნება. გარდა ამისა, როცა მოსკოვთან პრაგმატულ ურთიერთობაზე ვსაუბრობთ, ეს ნიშნავს თუნდაც იმას, რომ რუსეთის მსოფლიო სავაჭრო ორგანიზაციაში გაწევრიანება გამოვიყენოთ და რუსული ბაზარი დავიბურნოთ. ეს ქვეყნის სოფლის მეურნეობისთვის, ეკონომიკისთვის ძალიან მნიშვნელოვანია. ჩვენი ბიზნესწარმომადგენლები საერთოდ დაუცველნი არიან რუსულ ბაზარზე, არადა, რუსი ბიზნესმენები საქართველოში თავს საკმაოდ დაცულად გრძნობენ და საკმაოდ მსხვილი ბიზნესები აქვთ. თბილისის წყალკანალი, ენგურჰესი, ოქროს საბადო - ეს ყველაფერი რუსული კაპიტალის ხელშია, - ბენდუქიძის გავლით, ბუნებრივია. აქედან გამომდინარე, მეც მინდა, რომ ჩვენი ბიზნესმენები დაცულები იყვნენ და რუსულ ბაზარზე ხელები გახსნილი ჰქონდეთ. მეორე: რუსეთთან ურთიერთობების პრაგამატულ ჭრილში გადაყვანა აუცილებელია იმისთვის, რომ ჩვენ აფხაზ და ოს ძმებთან ურთიერთობისთვის სივრცე გაგვეხსნას. რაც მთავარია, საბოლოოდ ჩვენი მიზანი ქვეყნის რუსული შეიარაღებული ძალებისგან გაწმენდა და გათავისუფლება, დეოკუპაციაა, ამის მიღწევა კი კონფრონტაციით შეუძლებელია. ამიტომ რუსეთთან პრაგმატულ ურთიერთობებზე გადასვლა ჩვენი ქვეყნის ეროვნული ინტერესებისთვის აუცილებელია. 

საბოლოოდ იმას ვიტყვი, რომ ბოლო 8 წლის განმავლობაში ძალიან ბევრი რამ გაკეთდა და დღეს უკეთეს ადგილას არის საქართველო, ვიდრე 2003 წელს იყო, ისევე, როგორც მაშინ უკეთეს ადგილას იყო, ვიდრე 90-იან წლებში. ეს ნიშნავს, რომ პროგრესულად ვვითარდებით, წინ მივდივართ, მაგრამ რვა წლის განმავლობაში ამ ხელისუფლებამ ტერიტორიები დაკარგა და დევნილების რაოდენობა კიდევ უფრო გაზარდა. ეს ყველაზე მტკივნეული და მწვავე პრობლემაა, რომელიც ყველა ქართველს აწუხებს. ამიტომ შემდეგი ხელისუფლების ამოცანა იქნება, ყველა ის პოზიტიური ცვლილება, რომელიც გვქონდა, იქნება ეს ინფრასტრუქტურული პროექტები, ორგანიზებულ დანაშაულთან ბრძოლა თუ საჯარო სამსახურში კორუფციის აღმოფხვრა, შევინარჩუნოთ და ამაზე დავაშენოთ ჩვენი ქვეყნის განვითარების ახალი ეტაპი, რომელიც, პირველ რიგში, ჩვენს აფხაზ და ოს ძმებთან ურთიერთობის აღდგენას, ნდობითი მოლაპარაკების დაწყებას და გამთლიანებისკენ გადასადგმელ ნაბიჯებს მიეძღვნება.

- რამდენიმე დღის წინ ჩვენთან "ვარდების რევოლუციის" მე-8 წლისთავზე საუბრისას მიხეილ სააკაშვილის მთავარ შეცდომად ერთპარტიული მმართველობის დამყარება დაასახელეთ. არადა, თქვენი ახალი პოლიტიკური პარტნიორო ბიძინა ივანიშვილი ღიად აცხადებს, რომ პარლამენტში კონსტიტუციური უმრავლეოსობით აპირებს მოსვლას... 

- როდესაც ბიძინამ 2/3 ახსენა, ეს იმას ნიშნავდა, რომ მისთვის ამოცანაა, ჩვენ, ანუ ოპოზიციურ ძალებს პარლამენტში ისეთი წარმომადგენლობა გვქონდეს, რომელიც "ნაციონალურ მოძრაობას" უმცირესობაში მოაქცევს და მას არ ექნება იმ გეგმის განხორციელების საშუალება, რომ სააკაშვილმა პრეზიდენტობის ვადის ამოწურვის შემდეგ საქმიანობა პრემიერის ან თუნდაც პარლამენტის თამჯდომარის რანგში გააგრძელოს. გარდა ამისა, იმ ცვლილებებისთვის, რომელიც ჩვენს ქვეყანას სჭირდება - კონსტიტუციური ცვლილებებისთვის, სასამართლოს დამოუკიდებლობის მიღწევისთვის, საპარლამენტო ზედამხედველობის გაძლიერებისთვის, რა თქმა უნდა, უმრავლესობაში ყოფნა ამ პერიოდში ძალიან მნიშვნელოვანი იქნება. ასე, რომ ეს არის სურვილი, რომელიც შესაძლებელია, განხორციელდეს, მაგრამ თავისთავად ჩემთვისაც, ბიძინასთვისაც და ჩვენი სხვა პარტნიორებისთვისაც მრავალპარტიული პარლამენტი გამოსავალი და პასუხია ძალიან ბევრ პრობლემაზე, რომელიც დღეს ქვეყანაში ერთპარტიულმა მმართველობამ შექმნა. პარლამენტი მრავალპარტიული უნდა იყოს და სრული უფლება ჰქონდეს, აღმასრულებელი ხელისუფლების ყველა შტოს ზედამხედველობა გაუწიოს.

- მაგრამ მიხეილ სააკაშვილიც რეფორმების გატარების აუცილებლობით ხსნიდა საკონსტიტუციო ცვლილებებს. თუ ეს გუნდი პარლამენტში ორი მესამედით მოვა, რა გარანტიაა იმისა, რომ სამომავლოდ ხელისუფლების მონოპოლიზაციას ისიც არ მოახდენს?

- პირველ რიგში, ამის გარანტიაა პოლიტიკური ნება, რომელიც ჩვენს პარტიაში, ჩვენს პარტნიორ პარტიაში და თავად ბიძინა ივანიშვილში არსებობს, ასევე ის გამოცდილება, რომელიც ჩვენ გვაქვს სახელმწიფო სამსახურში და სახელმწიფო სამსახურიდან წასვლის შემდეგ და მთავარი სისტემა, რომელიც აღმასრულებელ, სასამართლო და საკანონმდებლო ხელისუფლებას დააბალანსებს, მაგრამ ყველაფერ ამაზე უფრო მაღალი არბიტრი თვითონ მოქალაქე იქნება.

- რომელსაც საამისოდ ბერკეტი არ აქვს...

- რომელმაც შიში უნდა დასძლიოს და შემდეგ არჩევნეზე წელში გამართული მივიდეს. არ უნდა შეეშინდეს, რომ მისი ნათესავი სამსახურს დაკარგავს, თუ ღიად და გულის კარნახით მიიღებს გადაწყვეტილებას, რომელ პარტიას დაუჭიროს მხარი. ამიტომ მთელი ჩვენი საქმიანობა არჩევნებამდე მიძღვნილი იქნება საარჩევნო გარემოს ამ პრინციპული ელემენტების შეცვლისაკენ. ჩვენი ამოცანაა, ამმხრივ არჩევნებამდე ისეთი ძლიერი ინფრასტრუქტურა შევქმნათ, კომისიის წევრების, დამკვირვებლების და მონიტორინგის ჯგუფების შექმნით, რომელიც ხალხს საშუალებას მისცემს, თავისუფალი არჩევანი გააკეთოს. 

- კონსტიტუცია ახსენეთ. თქვენი გუნდის გამარჯვების შემთხვევაში რა ნაბიჯების გადადგმას აპირებთ ქვეყნის მთავარ კანონთან მიმართებაში?

- ეს ჯერ გადაწყვეტილი არ არის. ეს ბუნებრივია, რადგან ალიანსი ჯერ არ ჩამოყალიბებულა. პირადად ჩემი ხედვით კი, საქართველო საპრეზიდენტო რესპუბლიკა უნდა იყოს, ძლიერი საპარლამენტო ზედამხედველობით და გარანტირებულად დამოუკიდებელი სასამართლო სისტემით. თუმცა ვთვლი, რომ ეს გადაწყვეტილება მისაღები აქვს ქართულ საზოგადოებას. კონსტიტუციაზე შეთანხმება მართლაც ყოვლისმომცველი უნდა იყოს და მგონია, რომ ეს რეფერენდუმის გზით უნდა მოხდეს.

- თუ გავითვალისწინებთ, რომ ივანიშვილი პოლიტიკოსად ახლა ყალიბდება, ალბათ, ძალიან დიდი მნიშვნელობა აქვს მის გარემოცვას. თქვენთვის რამდენად მისაღებია ბიძინა იივანიშვილის მრჩეველთა საბჭო, ის გუნდი, რომელიც მან ჯერ-ჯერობით შემოიკრიბა და რომელიც, პირდაპირ ვთქვათ, ძალიან "ჭრელია". ხომ არ ფიქრობთ, რომ ამ "სიჭრელემ" შეიძლება, ხელისუფლებაში მოსვლის შემდეგ თავად ამ გუნდის შიგნით ძალაუფლებისთვის ბრძოლა განაპირობოს?

- თქვენ სწორად აღნიშნეთ, ეს არის ივანიშვილის მრჩევლთა საბჭო და ივანიშვილს უნდა აწყობდეს, მოსწონდეს ან არ მოსწონდეს იგი. ეს ჩემი საქმე არ არის. მისი მრჩეველთა საბჭოა და ალბათ, მას მოსწონს.

- მე გკითხეთ, თქვენთვის რამდენად მისაღებია იგი... …

- ჩვემთვის მისაღებია ბიძინა ივანიშვილი, როგორც პარტნიორი და მისი მრჩევლები ჩემი საქმე არ არის.

- გასაგებია... რაც შეეხება საზოგადოების დამოკიდებულებას ბიძინა ივანიშვილისადმი... ხომ არ ფიქრობთ, რომ საზოგადოება მასში "ახალ მხსნელს" ეძებს, შესაბამისად, როგორც წინა ხელისუფლებების ქვეყნის სათავეში მოყვანის შემთხვევაში, მოსალოდნელია, ისიც უმრავლესობით აირჩეს? რამდენად სწორად მიგაჩნიათ ზოგადად ეს მიდგომა?

- ვფიქრობ, მესიების მოლოდინი საქართველოში დასრულდა. ბოლო 20 წლის განმავლობაში ქართული საზოგადოება პოლიტიკურადაც მომწიფდა. არც მე, არც ივანიშვილს და არც ქართულ საზოგადოებას ახალი მესიების ძიება არ გვჭირდება. ის არის აბსოლუტურად ჩვეულებრივი ადამიანი, ისეთივე, როგორიც ყველა ჩვენგანია. ადამიანი, რომელმაც ბიზნესში ძალიან დიდ წარმატებას მიაღწია და რომლის გამოცდილება ჩვენი სახელმწიფოებრიობისთვის ძალიან გამოსადეგარი იქნება. ეს არის ერთადერთი, რაც, ჩემი აზრით, ყველას კარგად უნდა ჰქონდეს გაცნობიერებული. ჩვენ ერთად, თითოეულმა მოქალაქემ უნდა შევქმნათ ქართული ოცნება და უკეთესი საქართველო.

- მაგრამ საზოგადოება მას არ იცნობს, როგორც პოლიტიკოსს... 

- გაიცნობს.

- და მანამდე რითია გაპირობებული, თქვენი აზრით, ის საზოგადოებრივი მხარდაჭრა, რომელიც, თქვენივე თქმით, ივანიშვილის მიმართ არსებობს და თქვენს მიერ არაერთხელ გამოცხადებულ "ახალ რეალობას" ქმნის? 

- განპირობებულია, ალბათ, იმით, რომ 15-20 წლის განმავლობაში მას საქართველოში ძალიან ბევრი დიდი საქმე აქვს გაკეთებული და ამ სიკეთეს პოლიტიკური ანგაჟირების გარეშე აკეთებდა. ეს, რა თქმა უნდა, საზოგადოებაში მის მიმართ ბუნებრივ სიმპათიას იწვევს.

- მაგრამ ქველმოქმედება და წარმატებები ბიზნესში ავტომატურ წარმატებას პოლიტიკაში არ ნიშნავს...

- რა თქმა უნდა, არ ნიშნავს. ეს ორი საკითხი ერთმანეთთან პირდაპირ კავშირში არ არის, მაგრამ მე დარწმუნებული ვარ, რომ მაღალი მორალის მქონე, კეთილი ადამიანი ბინძური ქართული პოლიტიკის გამოსწორებაში პოზიტიურ წვლილს შეიტანს.

- ნატო-ში ნტეგრაციაზეც მინდა, გკითხოთ. მას შემდეგ, რაც ბიძინა ივანიშვილი პოლიტიკურ არენაზე გამოჩნდა და თქვენი თანამშრომლობა გადაწყდა, მისი მხრიდან რამდენჯერმე გაკეთდა განცხადება იმის შესახებ, რომ ნატო-ს პერსპექტივამ ძალიან შორს გადაიწია. ამის საფუძველზე ხშირად საუბრობენ იმაზე, რომ თქვენ პოლიტიკური კურსი შეიცვალეთ...

- კი, ეს არის სახელისუფლებო პროპაგანდა. 

- მაშინ მოდით, წერტილი დავუსვათ მსგავს საუბრებს ცალსახა პასუხით კითხვაზე, რჩება თუ არა ნატო თქვენს პრიორიტეტად?

- ნატო ჩვენი საზოგადოების არჩევანია. ჩრდილოატლანტიკურ სივრცეში ჩვენს გაწევრიანებას რუსეთი ვერანაირად ვერ შეაფერხებს და მას არასდროს ექნება ჩვენი ინტეგრაციის დაბლოკვის საშუალება. ეს დამოკიდებულია საქართველოზე და თვითონ ალიანსზე. ჩვენ გვაქვს ნატო-საქართველოს კომისია, რომლის მუშაობასაც მივესალმებით და მხარს ვუჭერთ. გარდა ამისა, მხარს ვუჭერთ იმასაც, რომ საქართველო მონაწილეობდეს როგორც ნატო-ს წვრთნებში, ისე იმ საერთაშორისო ოპერაციებში, რომელიც ნატო-ს ეგიდით ხორციელდება, რადგან ეს ჩვენს თავდაცვისუნარიანობას, ჩვენს უსაფრთხოებას სჭირდება. ჩვენთვის ძალიან მნიშვნელოვანია ნატო, რადგან ის მხოლოდ სამხედრო ალიანსი არ არის. ესაა პოლიტიკური ალიანსი და ნატო-ში გაწევრიანება ნიშნავს იმას, რომ ჩვენს ქვეყანაში სტაბილური დემოკრატიული ინსტიტუტები სრულფასოვნად ჩამოყალიბდეს. ეს ყველაფერი ჩვენს ნაციონალურ ინტერესებს პირდაპირ ეხმიანება და "თავისუფალი დემოკრატები" ყოველთვის იქნებიან ჩართული საქართველოს სახელმწიფო ამბიციების განხორციელებაში.

- თქვენ ხშირად მართავთ შეხვედრებს დასავლური პოლიტიკური ძალების წარმომადგენლებთან. რა დამოკიდებულება აქვთ მათ ბიძინა ივანიშვილის ფაქტორის მიმართ? თუ გქონიათ ამაზე საუბარი?

- დიახ, ამაზე არაერთხელ გვქონია საუბარი, მათ შორის - რამდენიმე დღის წინ კონგრესმენთა ჯგუფთან, რომელიც თბილისში იყო ჩამოსული დრაიერის ხელმძღვანელობით. დიდი ინტერესია, თუმცა ინფორმაციის ნაკლებობა აქვთ. ამიტომაც ძალიან მნიშვნელოვანია, რომ ასეთი შეხვედრები ხშირი იყოს და ამერიკულ და ევროპულ მხარეებს სრული ინფორმაცია მივაწოდოთ. სააკაშვილის პროპაგანდა, თითქოს ეს ძალა რაიმე ფორმით დაკავშირებული იყო, ასე ვთქვათ, არადასავლურ საგარეო პოლიტიკურ ძალებთან, ჩავარდა. ამის არავის სჯერა, მაგრამ, რა თქმა უნდა, ინტერესი არის იმის თაობაზე, თუ როგორი სახელმწიფოს შექმნას ვაპირებთ ჩვენ და ბიძინა ივანიშვილი. ამაზე პასუხები იქნება სწორედ ის პოლიტიკური შეთავაზებები, ალტერანტივები, რომელსაც ქართულ საზოგადოებასაც და დასავლეთსაც შევთავაზებთ. ასე, რომ, მომავალი თვეების განმავლობაში ჩვენი მხრიდან ძალიან ბევრი შეხვედრა და რაც მთავარია, პოლიტიკური მესიჯი იქნება გასაჟღერებელი.