"თავისუფალი დემოკრატების" წარმომადგენლი, საპარლამენტო ფრაქცია "ერთობა სამართლიანობისთვის" თავმჯდომარე გია ცაგარეიშვილი აცხადებს, რომ "თუკი ხელისუფლება გააგრძელებს ივანიშვილზე ზეწოლას, საერთაშორისო საზოგადოების მხრიდან უმწვავეს პასუხს მიიღებს".

რა გარანტია არსებობს იმისა, რომ საერთაშორისო საზოგადოება მხარს დაუჭერს ივანიშვილი-ალასანიას პოლიტიკას და რა ფორმას მიიღებს მათი ურთიერთობა, მით უმეტეს უკვე დაშლილ "ექვსიანთან" ერთად, ამ საკითხებთან დაკავშირებით "მთელი კვირა" გია ცაგარეიშვილს ესაუბრა.

"მთელი კვირა": "ექვსიანი" ალასანიას გადაწყვეტილებით დაიშალა და დღეს აღმოჩნდა, რომ თქვენ ისევ ერთად ხართ, ოღონდ - ივანიშვილთან. ეს თქვენთვის რამდენად მისაღებია?

გია ცაგარეიშვილი: ჩვენ "ექვსიანი" დავშალეთ იმიტომ, რომ ეს ფორმატი, "თავისუფალი დემოკრატების" აზრით, იმ შედეგის მომტანი არ იყო, რა შედეგსაც ჩვენ საზოგადოებას დავპირდით დაახლოებით სამი თვის წინ კალათბურთის სასახლეში გამართულ შეხვედრაზე.

თუ შენ ადამიანებს ჰპირდები ერთს და აკეთებ მეორეს, ეს ჩემთვის აბსოლუტურად მიუღებელი და გაუგებარია. ამიტომ, ვფიქრობ, უნდა გეყოს სითამამე, გამოხვიდე და პირდაპირ თქვა, რომ ამ პროექტმა არ გაამართლა მრავალი მიზეზის გამო, მაგრამ ჩვენ ვაგრძელებთ ჩვენს გზას. ვისაც უნდა, რომ ამ ბრძოლაში გამოგვყვეს, ჩვენ ვართ ერთად.

ბატონმა ალასანიამ რამდენჯერმე გაუსვა ხაზი იმ პრობლემებს, რაც საზოგადოებისთვის მეტ-ნაკლებად უხილავი იყო. პარტიაში ვთვლიდით, რომ ეს იყო უსამართლო დამოკიდებულება იმ უამრავი ადამიანის მიმართ, რომელიც იმედის თვალით უყურებდა ამ პროექტის განხორციელებას.

"მ.კ": როდესაც "რვიანი" დაიშალა, ეს ხომ უკვე ჩანდა და რატომ მაშინ არ მიიღეთ ეს გადაწყვეტილება?

გ.ც: მე არ დავმალავ, რომ "რვიანის" დაყვანამ "ექვსიანამდე" ამ ყველაფერში მაპროვოცირებელი როლი ითამაშა. იმიტომ კი არა, რომ "ქრისტიან-დემოკრატები" იყვნენ რეიტინგული პარტია ან "ახალი მემარჯვენეები" ავტორიტეტული გაერთიანება, უბრალოდ, მათ ძალიან ცუდი რამ გააკეთეს და ეს არის ის, რასაც მე მათ ვერ ვპატიობ. მათ გული გაუტეხეს საზოგადოებას იმ პროცესზე, რომელსაც უნდა დარქმეოდა თავისუფალი, დემოკრატიული, გამჭვირვალე არჩევნების შედეგად არჩევნების შეცვლა.

თავი გავანებოთ გარიგებებსა და რაღაც მილიონებს, რომელიც იყო თუ არა, არავინ ვიცით, მაგრამ გუმანით ვგრძნობთ, რომ ამ ბინძური გარიგების უკან დგას ვიწრო პარტიული და ვიწრო ადამიანური ინტერესები, რომ ვიღაცამ საზოგადოების იმედის ხარჯზე ფული იშოვოს და მე და ჩემი პოლიტიკური ძალა მათ ამას ვერ ვპატიობთ.

თანაც ხელისუფლებამ შეძლო და ამ ორი სატელიტური პარტიის დახმარებით შექმნა პარალელური პროცესი. მე ეს მომწონს თუ არა, ეს პროცესი შექმნა.

"მ.კ": საზოგადოებას ალასანიას გადაწყვეტილებაზეც გაუცრუვდა იმედი, როდესაც თქვა, რომ "ექვსიანი" დაშალეთ...

გ.ც: ჩვენ ეს უნდა გაგვეკეთებინა. თქვენ გინდათ, რომ საზოგადოება ჩვენც ტყუილში გვემყოფებინა? ეს ხომ არავის არ უნდა?

"მ.კ": ალასანიას არგუმენტი იყო ძალიან არადამაჯერებელი.

გ.ც: შეიძლება, ვიღაცისთვის არგუმენტი არადამაჯერებელი იყო, მაგრამ ეს იყო სიმართლე. როდესაც იყო უამრავი მოწოდება, რომ გავსულიყავით ქალაქიდან და მაინც არ გაკეთდა, რაღას უნდა დავლოდებოდით?

"მ.კ": თქვენ მათ შესთავაზეთ რეგიონებში გასვლა და უარი გითხრეს?

გ. ც: მათი პასუხი იყო, რომ მოდით, ჯერ ჩამოვაყალიბოთ, ვინ ვართ და შემდეგ დავიწყოთ ურთიერთობა საზოგადოებასთანო. ჩვენ კი ამას პირიქით ვუყურებდით. წელიწადნახევრით ადრე გაერთიანების შექმნა და ვიღაცისთვის კარის ჩაკეტვა იმ ქვეყანაში, სადაც ზუსტად ჩვენი განცხადებიდან ერთ დღეში პოლიტიკაში შემოვიდა ბიძინა ივანიშვილი, შეიძლება? ეს ხომ არაპროგნოზირებადი ქვეყანაა და ჩვენ რომ დავუჯერეთ ჩვენს პარტნიორებს ადგილობრივი თვითმმართველობის არჩევნების წინ, როდესაც "ალიანსს" ვაყალიბებდით და დაიკეტა სივრცე, მთელი ოპოზიციური სპექტრი მტრად მოვიკიდეთ და დარტყმის ობიექტი აღმოვჩნდით.

ამიტომაც საზოგადოების გადასაწყვეტია, რა ერჩივნა, მწარე სიმართლე თუ იმის ძახილი, რომ ჩვენ თვითკმარები ვართ და ბოლოს ყველანი ისევ იმედგაცრუებულები დავრჩენილიყავით?

"მ.კ": თქვენი ეს გადაწყვეტილება ივანიშვილთან შეთანხმებული იყო?

გ.ც: არა. მესმის, რომ ალასანიას და ივანიშვილის განცხადებები უცნაურად დაემთხვა ერთმანეთს. თუ თქვენს მკითხველს უნდა, იფიქროს, რომ ეს არის დამთხვევა, მაშინ ეს არის დამთხვევა. თუ უნდა, იფიქროს, რომ ეს იყო შეთანხმება, ასე იფიქროს.

"მ.კ": რეალურად რა იყო?

გ. ც: ეს იყო ჩვენ მიერ მიღებული ძალიან მძიმე გადაწყვეტილება, მაგრამ ივანიშვილთან შეთანხმებული არ ყოფილა.

"მ.კ": გამოცდილების გათვალისწინებით მიიღეთ?

გ. ც: რა თქმა უნდა, მათ შორის გამოცდილების გათვალისწინებით. ჩვენ ხომ ის საზოგადოება ვართ, რომლებიც ჩვენს შეცდომებზე ვსწავლობთ. საერთოდ გონიერი ადამიანი სხვის შეცდომებზე სწავლობს, მაგრამ ჩვენ სხვის შეცდომებზე რომ ვერ ვისწავლეთ, გადავწყვიტეთ, რომ უკან გაგვეხედა. რატომ უნდა ჩავკეტოთ სივრცე არჩევნებამდე წელიწადნახევრით ადრე?

ეს მუდმივი მოწოდება, რომ დღეს გავაკეთოთ საარჩევნო ბლოკი, როდესაც არჩევნებიც არ ვიცით, როდის ჩატარდება, გონივრული არა მგონია. ეს არის ჩვენი, "თავისუფალი დემოკრატების" მოსაზრება და ამას არ გადავუხვევთ.

მე არ გამოვრიცხავ, რომ ბატონი ბიძინას განცხადების გაკეთება ამ თემატური გაერთიანების დაშლამაც განაპირობა. მაგრამ ის, რომ ჩვენი გადაწყვეტილება იყო მართალი და ყველას წინაშე ვიყავით მართალი და ჩვენ ჩვენი იდეების ერთგულნი დავრჩით, ეს ყველაფერი გამოჩნდა ივანიშვილის განცხადებაში, რომელმაც თქვა, რომ ყველა პარტიასთან მაქვს კითხვები, მაგრამ არ მაქვს ეს კითხვები ირაკლი ალასანიასთან. ასეთი შეფასება კი ჩემთვის ნამდვილად სასიამოვნოა, რადგან ეს პარტია ჩვენი შექმნილია და, როდესაც ასეთი ავტორიტეტული ადამიანი დადებითად გაფასებს, ნამდვილად გასახარია.

კიდევ ერთი დამთხვევა, ბატონი ივანიშვილის განცხადებამდე ბატონი ვეფხვაძე გამოდის და მეუბნება, თქვენ ბოდიში გაქვთ მოსახდელიო და მე მათი ქმედება ქართულ პოლიტიკაში "ჯაყოიზმად" შევაფასე. მეორე დღეს ბატონი ივანიშვილი ამბობს, რომ თეთრს თეთრი უნდა დაერქვას და შავს შავიო.

სააკაშვილის მიერ გაკეთებული ეს რაღაც შუალედი უკვე ძალიან მიუღებელია. მე ამ ე.წ. უმცირესობას და ე.წ. ოპოზიციას ვამსგავსებ რაღაცა სარტყელს, რომელიც ხელისუფლებას რეალური ოპოზიციის დარტყმებისგან იცავს.

ფილმი "სერენადა" ხომ გაქვთ ნანახი, ერთი გამხდარი კაცი მსუქანს რომ ურტყამს და ვერაფერს აკლებს იმიტომ, რომ ამ მსუქან კაცს ბევრი ქონი აქვს და მისი მუშტი ნერვებამდე ვერ მიდის. ამ კაცის ქონად, ცელულიტად მოგვევლინა ე.წ. ოპოზიცია და იცავს ხელისუფლებას. ჩვენ ვურტყამთ და ამ ქონში ვერ ვატანთ და, თუკი არ ვიტყვით, რომ თეთრი თეთრია და შავი შავი, ვერც გავატანთ. თუკი არ ვიტყვით, რომ მთელი უმცირესობა ემსახურება ხელისუფლებას და ხელს უწყობს სააკაშვილის მუდმივ ზეობას.

მე პირში მთქმელი კაცი ვარ და ამის გამო ბევრი პრობლემა შემქმნია, მაგრამ მე შეცვლას არ ვაპირებ და ამ ბატონებს პირობას ვაძლევ, რომ არ გავჩერდები და ყველას ვამხელ. თქვენ გამო, იმიტომ, რომ თქვენ ხართ შეკრულები ხელისუფლებასთან, ჩემს ქვეყანას თავს ლაფი ესხმება და ადამიანები ვერ იგებენ სიმართლეს. თქვენ ემსახურებით ეშმაკის საქმეს და ამის გამო ადრე თუ გვიან პასუხს აგებთ.

ეს არის უდიდესი პრობლემა და ვფიქრობ, არანაკლები პრობლემა, ვიდრე არის ხელისუფლება. მაინტერესებს, ეს ადამიანები ვინ არიან, სააკაშვილის რეჟიმის შემადგენელი ნაწილები არ არიან? ისინი არიან ხელისუფლების დანამატები და გაგრძელებები და დროა, ყველაფერს თავისი სახელი დაერქვას.

"მ.კ": ივანიშვილს პარტიის შექმნის საშუალებას არ აძლევენ და თქვენი პარტია ხომ არ იქნება ივანიშვილის პარტია?

გ.ც: მოდით, "თავისუფალ დემოკრატებს" ვიღაცის პარტიას ნუ უწოდებთ. ჩვენი პარტია არის დაახლოებით იმ შვიდი ათასი ადამიანის, ვინც ამ პარტიაშია გაწევრიანებული. ჩვენს პარტიაში ყველა საკითხი გამგეობაზე წყდება. არ არსებობს ძალიან უმნიშვნელო საკითხიც კი, რომელიც გამგეობაზე არ გადის. ირაკლი ალასანია არის ის ადამიანი, რომელსაც სურს, რომ თანაზიარი გახადოს ყველა ნებისმიერი გადაწყვეტილების. რა თქმა უნდა, ის არის ლიდერი, მაგრამ ჩვენ გადაწყვეტილებებს კენჭიყრით კი არა, კონსენსუსით ვიღებთ. ეტყობა, ბატონ ივანიშვილს ჩვენში ყველაზე მეტად ეს მოეწონა და ჩვენი ურთიერთობა სწორედ ამ პატივისცემას დაეფუძნება.

"მ.კ": თანამშრომლობა რა ეტაპზეა, რას უნდა ველოდოთ?

გ.ც: შეხვედრები ინტენსიურად მიმდინარეობს და იმედი გვაქვს, რომ ყველაფერი ძალიან კარგად დასრულდება. ჩვენ გვაქვს ჩვენი შეხედულებები და ერთმანეთის შეხედულებებსა და მოსაზრებებს პატივს ვცემთ. ეს რაში გადაიზრდება, ჯერ არ ვიცით. ეს იქნება კოალიცია, ბლოკი თუ სხვა რამ, ამას უახლოეს დღეებში გაიგებთ. ჩვენ არ გვაქვს იმის ფუფუნება, რომ ეს დროში გავწელოთ. ჩვენ რეგიონებში გვაქვს უამრავი საქმე, პროგრამულ ნაწილზე გვაქვს სამუშაო და ასევე საერთაშორისო ორგანიზაციებთან.

"მ. კ": ხომ არ გაქვთ ინფორმაცია, მასთან შეხვედრაზე ელჩებმა რა უთხრეს?

გ. ც: მათი საუბრის შინაარსი თავად მათ უნდა გაახმოვანონ, თუკი ამის სურვილი აქვთ. მაგრამ, მე იმის თქმა შემიძლია, რომ, თუკი ხელისუფლება გააგრძელებს ივანიშვილზე ზეწოლას, საერთაშორისო საზოგადოების მხრიდან უმწვავეს პასუხს მიიღებენ.

ის პოლიტიკური ვაკხანალია, რაც ხელისუფლებამ დაატრიალა, ის მხდალის სახე, რაც ამ ხელისუფლებამ აჩვენა, ამაზრზენი სანახავია. ადამიანს ართმევ მოქალაქეობას, იმ კაცს, რომელმაც სამება ააშენა, ყველაფერს რომ თავი გავანებოთ და რუსის დეზერტირი ჯარისკაცი რომ გადმოვიდა, აქ ზარზეიმით ჩამოაბრძანეს და საქართველოს მოქალაქეობა მისცეს. ვიღაცა გზააბნეული ჟურნალისტი აქ რომ ჩამოვა, "პიკში" მუშაობას დააწყებინებენ და მოქალაქეობას მისცემენ და დაბადებით ქართველს, მეცენატს, რომელიც საქართველოში ასობით მილიონს ხარჯავს, თურმე მოქალაქეობა არ ეკუთვნის. სააკაშვილმა უნდა გადაწყვიტოს, ვინ უნდა იყოს ქართველი და ვინ არა?

"მ.კ": როგორც ვიცით, ივანიშვილს მოქალაქეობის მინიჭების თხოვნით არ მიუმართავს და მიმართოს, იქნებ აძლევენ?

გ.ც: დარწმუნებული ვარ, ბატონი ბიძინა ამ ნაბიჯსაც გადადგამს ისევე, როგორც სხვა ადეკვატურ ნაბიჯებს.

არც ერთი ნაბიჯი უკან არ იქნება. ჩვენ უკან დასახევი გზა მოჭრილი გვაქვს ყველას ერთად, მათ შორის "თავისუფალ დემოკრატებსაც" და ბიძინა ივანიშვილსაც. ჩვენ უკან აღარ გავიხედავთ და ხელისუფლების გეგმაში არ ჩავებმებით.

ხელისუფლებას თავის მარიონეტებთან ერთად ძალიან უნდა, რომ ჩვენ ქუჩაში გავიქცეთ, შემდეგ იქ პროცესების მარგინალიზაცია მოხდეს და ადამიანები დახოცონ, რუსეთთან კავშირში დაგვადანაშაულონ. კარგად იცოდეს ხელისუფლებამ, რომ ჩვენ ამას არ ვიზამთ.

სააკაშვილი-მერაბიშვილიის გადამკიდე ლაკი ლუჩიანო და ალ კაპონე მიწაში ტრიალებენ. თქვენ იცით ერთი ისტორია, მეოცე საუკუნის დასაწყისში რევოლუციონერმა კამომ დააყაჩაღა ბანკი და სხვა ბოლშევიკებთან ერთად ფული გაიტაცა. ეს ადამიანები არიან კამოს ტრადიციების გამგრძელებლები. ტყავის ქურთუკებში ჩაცმული, მაუზერმომარჯვებული ყაჩაღები და არ ვიცი, რატომ გაგიკვირდათ, ბანკ "ქართუს" სამი მილიონი რომ წაგლიჯეს?

ისე, მე კი მახსოვს ბატონი გოკა გაბაშვილის მამა, ახლა იტალიაში ელჩი რომაა, მაუზერით როგორ ედგა თავზე ამ შენობაში დაკავებულ პირველი პრეზიდენტის მომხრეებს და როგორც უყვიროდა, სულს ამოგხდითო. ხომ ხედავთ, კვიცი გვარზე ხტის. მაგრამ ჩვენ ასეთი რამეების არ გვეშინია. ჩვენ ვერ დაგვაჩოქებთ.