„ექვსიანი“ ყოფნა-არყოფნის ზღვარზეა. „კონსერვატორები“, „ხალხის პარტია“, „საქართველოს გზა“ და „რესპუბლიკელები“ „ექვსიანის“ ერთ ბლოკად ჩამოყალიბებას ითხოვენ. „ეროვნული ფორუმი“ ერთიანი ბლოკის წინააღმდეგია, „თავისუფალი დემოკრატები“ ნაადრევად მიიჩნევენ რაიმე ტიპის ერთობაზე (გარდა საარჩევნო გარემოზე მუშაობის) საუბარს. საკუთარ მოთხოვნას ყველა საკუთარი არგუმენტით ამყარებს, თუმცა უფრო მყარი არგუმენტი, ვფიქრობთ, უახლოესი წარსულია, რომელმაც ნათლად გვაჩვენა, რომ ოპოზიციის სიჭრელემ და ერთობამ პოლიტიკურ სპექტრს წარმატება ვერ მოუტანა. ამდენად, გამორიცხული არაა, რომ „ექვსიანიც“, ისევე, როგორც „რვიანი“ წარსულს ჩაბარდეს.

როგორ ხედავს „ექვსიანის“ მომავალს ერთობის შემთხვევაში და რა არგუმენტები აქვს  კონსერვატული პარტიის ლიდერს, ამ კითხვებზე პრესაგე.ტვ-მ პასუხები ზვიად ძიძიგურისგან მოისმინა.

როგორც ჩანს, „ექვსიანში“ ისე არ დალაგდა პროცესები, როგორც საჭირო იყო. სხვა რით შეიძლება ახსნათ ის, რომ ვერის საკალათბურთო სასახლეში  მიცემული დაპირებები არ სრულდება?

- „ფორუმის“ ღონისძიებამ კიდევ ერთხელ დაგვაყენა საჭიროების წინაშე, რომ მოსახლეობას განვუმარტოთ რა ტიპის ერთობაა „ექვსიანში“, რა ინტეგრაციის ხარისხია და რა გეგმებზე ვართ წამსვლელები. ჩვენ ჩვენი მხარდამჭერები გვყავს და ფაქტობრივად, ისინიც დაბნეულები არიან. ამიტომ ვფიქრობ, რომ კონსერვატიული პარტიის, ხალხის პარტიის მოსაზრება გახლავთ, რომ აუცილებელია ერთიანი სტრუქტურით, ერთიანი შტაბით და ფინანსებით გაგრძელდეს საქმიანობა. თუ ჩვენ გვინდა ისეთი ძალა, როგორიცაა „ნაციონალური მოძრაობა“ და მიხეილ სააკაშვილის მთელი ხელისუფლება დავამარცხოთ, ამისთვის ერთი დღის დაკარგვაც არ შეიძლება. ახლა არის დრო, ჯერ კიდევ საკმარისი იმისათვის, რომ ჩვენ ჩვენი მხარდაჭერების მობილიზაცია დავიწყოთ. ამიტომ ეს აუცილებლობა „ექვსიანის“ წინაშე დგას.

„ფორუმის“ ამ ღონისძიებამ ეს ნათლად დაგვანახა - თუ ხარ პოლიტიკური კოალიცია და ამ დროს ერთი პარტია ერთ ღონისძიებას ატარებს, მეორე - მეორეს და მესამე - მესამეს, ეს ალტერნატიულ ძალად ვერ ჩამოყალიბდება, ეს გამორიცხული ამბავია.

ამიტომ, პოლიტიკური ექვსიანის მხრიდან, უმოკლეს ხანში, ჩემის აზრით, უნდა გადაიდგას სწორედ ასეთი ნაბიჯები. თუ ასეთი ნაბიჯები არ იდგმება, მაშინ ესეც ღიად უნდა ეთქვას საკუთარ მოსახლეობას -  რა არის ეს კოალიცია, არსებობს თუ არ არსებობს, აპირებს დაშლას თუ არა და ა. შ.

მაინც, რა ტიპის კოალიციის ჩამოყალიბებაზე გაქვთ აქცენტი?

- რა თქმა უნდა, ბლოკი ჯერ ვერ ჩამოყალიბდება, რადგან ბლოკის ჩამოყალიბება ხდება არჩევნების გამოცხადების შემდეგ, მაგრამ უნდა ჩამოყალიბდეს კოალიცია, რომელიც მოგვიანებით, მაღალი ალბათობით, გადაიქცევა ბლოკად. საერთოდ, ასეთი ტიპის კოალიცია თუ არ ჩამოყალიბდა, შეუძლებელია მას ალტერნატიული თვისებები გაუჩნდეს. მე ვიყავი „მრგვალი მაგიდის“ წევრი, რომელიც შვიდი პარტიისგან შედგებოდა და რომელშიც ერთი შტაბი იყო, ერთი ფინანსი, ერთი პიარი, ერთიანი ხელმძღვანელობა და ერთნაირი პოლიტიკური გეგმები ჰქონდათ და ასე მოვიდნენ ხელისუფლებაში. მეორე - როდესაც სააკაშვილმა გააკეთა კოალიცია,  მაშინაც გახლდით ამ კოალიციის წევრი, მასაც ჰქონდა ერთი შტაბი, ერთი ფინანსი, ერთი პიარი და ისიც წარმატებული კოალიცია აღმოჩნდა, მესამედ, როცა ლევან გაჩეჩილაძე იყო საერთო კანდიდატი, თერთმეტი პარტია ერთი შტაბის, ერთი ფინანსის, ერთი პიარის პირობებში მუშაობდა და მასაც მაღალი შედეგი ჰქონდა. მაშინ, მართალია ხელისუფლების შეცვლა ვერ მოხერხდა, მაგრამ ეს უკვე სხვა თემაა, მაგრამ ამ კოალიციას ხალხის მხარდაჭერა მაღალი ჰქონდა.

ამ შემთხვევაში, იმ კოალიციას, რომელსაც თქვენ ითხოვთ, რა მოთხოვნა უნდა ჰქონდეს?

- ის მოთხოვნა უნდა დააყენოს, რა მოთხოვნაც გაქვთ თქვენ, როგორც ამ ქვეყნის რიგით მოქალაქეს ხელისუფლების მიმართ - მოთხოვნა უნდა გაკეთდეს სოციალური ტიპის თემებზე, ტერიტორიული მთლიანობის თემებზე, საგანმანათლებო და ჯანდაცვის სფეროებზე.

„ექვსიანში“ შემავალი პარტიებიდან ზოგი მემარჯვენეა, ზოგი ცენტრისტული და ზოგიც - მემარცხე. ერთიანი ბლოკის შემთხვევაში რამდენად თანხვედრი იქნება თითოეული თქვენგანის მოთხოვნები?

- ეგ პრობლემა არ არის, როდესაც შენს ქვეყანაში ნაგვის და დენის გადასახადს ერთმანეთზე მიაბავენ, იქ  გინდ მემარჯვენე იყავი და გინდ - მემარცხენე. მთავარია ნორმალური იყო, ასეთ შემთხვევაში გაგიჩნდება პროტესტის გრძნობა და იმ ხალხთან უნდა დადგე, ვინც ამას აპროტესტებს. როდესაც საჯარო დაწესებულებაში, მაგალითად - მუნიციპალურ ბაღებში, აწესებენ გადასახადს და მოულოდნელად, სადღაც ჰაერიდან მოდის და არავინ იცის ეს გადასახადი სად მიდის დღეს, ამასთან დაკავშირებით, გინდ მემარჯვენე იყო, გინდ მემარცხენე, შენი პროტესტი უნდა დააფიქსირო. როდესაც საწვავის ფასი საქართველოში ისეთია, როგორიც იტალიაში ან საფრანგეთში, მაშინაც, მემარჯვენე ხარ თუ მემარცხენე - უნდა გააპროტესტო.

და ვინ უშლის ამ კოალიციის შექმნას ხელს და რატომ?

- არ ვიცი, მგონი, ჩვენ თვითონ ვუშლით ხელს ერთმანეთს და ეს არის ძალიან სერიოზული.

დააყენეთ ეს წინადადება „ექვსიანში“?

- სანამ ვერის საკალათბურთო სასახლეში მოხდებოდა კოალიციის გამოცხადება,   მანამდე იყო ამასთან დაკავშირებით შეთანხმება - ასეთი ტიპის სამუშაოები უნდა ჩაგვეტარებინა და ამისთვის უნდა მიგვეღწია. ახლა მოხდა ის, რომ გავიდა ამდენი დრო და ჯერ კიდევ მიდის მუშაობა. თითქმის მთელი ზაფხული განმავლობაში ვიკრიბებოდით და გაირკვა - თურმე, ამ კოალიციაში შემავალ პარტიებს, მიუხედავად იმისა, რომ ასეთი ტიპის განცხადებებია ხმამაღლა გაკეთებული, სურვილი აქვთ ცალ-ცალკე, ზოგმა მარში ჩაატაროს,ზოგმა თავისი დამოუკიდებელი ღონისძიებები და ეს არის დამაბნეველი.

ვის გულისხმობთ?

- ყველა ატარებდა - ალასანიაც, რესპუბლიკელები და მერე ჩვენც ჩავატარეთ, როდესაც უკვე კოალიციური ინტეგრაციისკენ ნაბიჯები არ გადაიდგა. ეს, რა თქმა უნდა, ხელს უშლის და აშორებს, რომ ამ კოალიციამ ალტერნატიული სახე მიიღოს. ამიტომაც, გარკვეულობა და სიცხადე ჯობია ყველაზე მეტად ბუნდოვანებას. ოპოზიციონერს არ აქვს უფლება იყოს ბუნდოვან მდგომარეობაში. მე პირადად არ მინდა ბუნდოვან მდგომარეობაში ყოფნა, ამიტომ, სიცხადე მინდა შევიტანო ამ საკითხში და ყველგან, სადაც არის საჭირო დაფიქსირება, ვაფიქსირებ, რომ მოსახლეობამაც იცოდეს და თვითონ კოალიციაში შემავალმა პარტიებმაც დააჩქარონ გადაწყვეტილების მიღება. ერთადერთი რაც ჩვენ გაგვაჩნია, ეს არის დრო, მაგრამ ჩვენ ამ დროსაც ვფლანგავთ.

ამდენი ხნის განმავლობაში რატომ ვერ გაარკვიეთ, რა გინდათ თითოეულს, თქვენ რაც გინდათ ცხადად ამბობთ, მაგრამ დანარჩენები რას ამბობენ?

- თქვენ ასეთი ტიპის კითხვას მისვამთ, სხვის ნაცვლად უნდა ვილაპარაკო, მე კი არ მაქვს ჩვევად  სხვის მაგივრად ლაპარაკი.

მიზეზები თქვენთვის უცნობია?

- არ ვიცი, ჩემი მოსაზრება მაქვს. ეტყობა მათ სხვა მოსაზრებები გააჩნიათ და ეს მოსაზრებები არც მე ვიცი და არ იცის საზოგადოებამ. მე მინდა ისე, როგორც საზოგადოებას ამ მოსაზრებების მოსმენა, მაინტერესებს ეს ამბები. აქედან გამომდინარე ვამბობ, ეს პოლიტიკური „ექვსიანი“ აკეთებს ასეთი ტიპის ნაბიჯს და განცხადებას და მიდის ინტეგრაციის მეტ ხარისხზე თუ არ მიდის. ისიც პატიოსანი საქციელია, თქვან - ჩვენ არ გამოგვივიდა კოალიციურ რეჟიმში თანაცხოვრება, ყველას ჩვენ-ჩვენი გზა და მიმართულება გვაქვს ამ პოლიტიკურ უდაბნოში და ასე გავაგრძელოთ საქმიანობა. ყველაზე ცუდი, რაც შეიძლება შევთავაზოთ მოქალაქეებს, არის ბუნდოვანება.

გუბაზ სანიკიძემ გარკვევით თქვა, ერთიანი ვართ საარჩევნო გარემოსთვის ბრძოლის საკითხში, დანარჩენ საკითხებში თავისუფლება გვაქვს ყველა პარტიასო, თქვენ ეს არასაკმარისად მიგაჩნიათ?

- ეს ჩემთვის იყო ძალიან დიდი მოულოდნელობა, ვინაიდან საკალათბურთო სასახლეში ჩვენ განვაცხადეთ, რომ ჩვენთვის მთავარია არა საარჩევნო გარემო, არამედ საარსებო გარემო. ჩვენ გამოვაცხადეთ, რომ გვაქვს ამბიციური გეგმა მილიონი მხარდამჭერის ორგანიზებისა არა საარჩევნო გარემოსთან მიმართებაში, არამედ საერთოდ იმ თემებზე, რომელიც მოსახლეობისთვის არის მტკივნეული. ამ თემებზე უნდა გვქონოდა ერთობლივი მუშაობა და, როდესაც რამდენიმეთვიანი ასეთი ტიპის თანამშრომლობის შემდეგ ტელევიზიით ვისმენ, რომ თურმე შეცვლილია რაღაც დღის წესრიგი, ამის შემდეგ ჩნდება ეს ბუნდოვანება ჩემთვისაც და სხვისთვისაც. მე კი, ეს ბუნდოვანობა არაფერში მჭირდება.

კომუნიკაციის პრობლემა გაქვთ ერთმანეთში?

- არავითარი კომუნიკაციის პრობლემა არ არის, კომუნიკაცია კვირაში სამჯერ გვქონდა, მაგრამ ამის მიუხედავად ვგებულობ რაღაცას ტელეეკრანიდან. აქ არ არის კომუნიკაციის პრობლემა.

ასეთ სიტუაციაში რამდენად საიმედოდ მიგაჩნიათ თქვენი პარტნიორები?

- მე არ ვარ კატეგორიული სხვასთან მიმართებაში, მინდა საზოგადოებამაც გაიგოს და მეც გავიგო, რა ტიპის ერთობა წარმოუდგენიათ პოლიტიკური „ექვსიანის“ წევრებს, მე როგორიც წარმომიდგენია, ვამბობ თქვენთანაც და სხვებთანაც, სხვებსაც მოვუწოდებ იგივე თქვან და გააკეთონ.

გუბაზ სანიკიძე ჩვენთან ინტერვიუში ამბობს: „ქართველთა მარში“ ჩაიშალა, მაგრამ „ფორუმის“ მარში ბრწყინვალედ ჩატარდა. ვეჭვობ დღეს  რომელიმე პოლიტიკურ ძალას პარტიის ხუთი ათასი წევრი ჰყავდეს“,  ანუ,  ეს ხომ არ არის მინიშნება იმაზე, რომ „ექვსიანში“ ლიდერის არჩევის პრობლემა დგას?

- აქამდე ვფიქრობდით, რომ პირიქით - ყველაფერი ერთობლივად უნდა გაგვეკეთებინა. ჩვენ ამ დღეებში გვექნება შეხვედრა და მაშინ გავიგებ ჩემი კოლეგებისგან, რას ფიქრობენ და როგორ ფიქრობენ. მე  ვფიქრობ, რომ პოლიტიკურ  ერთობას შეუძლია სააკაშვილის დამარცხება, გათითოკაცებულ პოლიტიკურ სპექტრს ამის გაკეთება არ შეუძლია.

მაქვს ინფორმაცია, რომ ფორუმი მოლაპარაკებებს აწარმოებს ლევან გაჩეჩილაძესთან და ნინო ბურჯანაძესთან. ამ შემთხვევაში, „ექვსიანის“ კარი რამდენად იქნება ღია ამ პოლიტიკოსებისათვის?

- ექვსიანის კარი რომ გააღო, ამისათვის, ჯერ, „ექვსიანი“ უნდა არსებობდეს. სწორედ ამას ვკითხულობ - თუ „ექვსიანი“ არსებობს, რა ფორმით არსებობს და რა არის ეს შენობა - კარკასია, საძირკველია თუ  მარტო სწორი ადგილია. ეს მაინტერესებს - კარი რომ გააღო, შენობა უნდა გქონდეს. რა არის ეს ექვსიანი - ამაშია საქმე, თორემ ის, რომ გაფართოება და დიდი ალტერნატიულ ძალის  ფორმირება, რაც უფრო დიდი და ეფექტური ძალა იქნება უმჯობესია, ამას რა თქმა უნდა მოწინააღმდეგე არ შეიძლება ყავდეს იმ ძალებიდან, ვისაც სააკაშვილის ხელისუფლების  შეცვლა უნდა.

ფორმალურად, რაღაცის გამოცხადება საკმარისი არ არის... ყველაზე მნიშვნელოვანია ფინანსები, რადგან უნდა აწარმოოთ აქტიური კამპანია. არსებობს თუ არა დღეს  ეს ფინანსები?

-ფინანსი დღეს არ არსებობს, ფინანსი ისევეა მოსაძიებელი, როგორც მხარდამჭერების ნდობა და მათი გააქტიურება, ეს არის სამუშაო თემა და სწორედ ამისთვისაც არის ადრე დასაწყები საარჩევნო კამპანია. ჩვენ ვხედავთ, რომ სააკაშვილმა დაიწყო. სააკაშვილს არც ფინანსის პრობლემა აქვს, არც სტრუქტურის, არც ორგანიზაციის, არც მართველობაში აქვს რაიმე ტიპის პრობლემა და მაინც დაიწყო ერთი წლით ადრე და ამ დროს ოპოზიციას ჯერ პრობლემა აქვს რომ რაღაცნაირად ჩამოყალიბული სახე მიიღოს. სწორედ ეს არის, რაც მაწუხებს. დრო არის ჩვენი კოზირი და ამ კოზირსაც ვუშვებთ ხელიდან ჩვენი დაყოვნებით. ეს მაწუხებს. ამიტომ ვფიქრობ, რომ დიდხანს არ უნდა გაგრძელდეს

სადამდე აქვს „ექვსიანს“ ბოლო ვადა, რომ ნათლად დააფიქსიროს საკუთარი პოზიცია?

-რაც შეიძლება მალე! არ ვიცი, „რაც შეიძლება მალე“ ერთი დღეა, ერთი კვირა თუ  ათი დღეა მაგრამ ჩემი აზრით, ნორმალურ ფარგლებს არ უნდა გაცდეს.