[GBC]
10 მილიონად ნაყიდ კომპლექსს, 50 მილიონის ჩადების შემდეგ, 150 მილიონად გაყიდიან
„სანატორიუმის ტერიტორიაზე დაგეგმილია, როგორც კაპიტალური მშენებლობა, ასევე უკვე არსებული შენობების სარეკონსტრუქციო სამუშოები. მოხდება მთავარი შენობის, კაფეს, ფარეხის, პარკინგის მშენებლობა. სარეკონსტრუქციო სამუშაოები ჩაუტარდება აგარაკებს, რესტორანს, ფერმერების სახლს, სამეფო ხიდსა და ეკლესიას", - ნათქვამია „ყაზმუნაიგაზ-სერვისის" პრესსამსახურის მიერ გავრცელებულ განცხადებაში.
ყაზახური მხარის ინფორმაციით, კომპანიის საკუთრებაშია 39 ჰექტარი მიწის ნაკვეთი, ასევე ძველი შენობა და სამკურნალო-გამაჯანსაღებელი კომპლექსის შენობა-ნაგებობა (აუზი, სასადილო, კლუბი, სამი მოსასვენებელი კორპუსი, სამი აგარაკი, ორანჟერეა და კაფე-ბარი).
რაც შეეხება პრეზიდენტის სასახლეს, რომელიც რომანოვების სასახლესაც მოიცავს, კომპანიაში აცხადებენ, რომ სახელმწიფო საკუთრებაში დარჩა.
„სანატორიუმის ძველი შენობა სავალალო მდგომარეობაშია, კვლევებმა ცხადყო, რომ შენობას სერიოზული ხარვეზები აქვს. აქედან გამომდინარე, შენობის რეკონსტრუქციის პირვანდელი გეგმა შეიცვალა და დაიწყო მზადება ახალი გეგმის დასაპროექტებლად, რაც დროსთან და ხარჯებთან იყო დაკავშირებული", - აცხადებენ კომპანიაში.
„ყაზმუნაიგაზ-სერვისის" მონაცემებით, 2006 წლიდან დღემდე ყაზახურმა მხარემ 6,5 მლნ აშშ დოლარის ინვესტიცია განახორციელა, რაც საპროექტო სამუშაოებსა და „ლიკანი-ბორჯომის" შენახვას მოხმარდა. თანხა კომუნალურ გადასახადებზე, მომსახურე პერსონალისა და სხვა გადასახადების დაფარვას მოხმარდა.
ბორჯომი-ლიკანის ყოფილი სამკურნალო-პროფილაქტიკური და გამაჯანსაღებელი კომპლექსი „ყაზმუნაიგაზ-სერვისმა" საქართველოს მთავრობისგან 2006 წლის 26 ოქტომბერს 10 მლნ აშშ დოლარად შეისყიდა. გაფორმებული ხელშეკრულების თანახმად, კომპანიამ ლიკანში 50 მლნ აშშ დოლარის ინვესტიცია უნდა განახორციელოს.
