[მანანა ნოზაძე]

ტელე-რადიო კომპანია „თრიალეთის“ წარმომადგენლები ფილმ „აგვისტოს 5 დღის“ ერთ-ერთ ეპიზოდს აპროტესტებენ. მათი თქმით, რენე ჰარლინის ფილმში ტელეკომპანია „თრიალეთის" შესახებ არაობიექტური ინფორმაციაა ასახული.

ეპიზოდის მიხედვით, უცხოელი ჟურნალისტები ტელეკომპანიაში მასალის მიტანას ცდილობენ, მაგრამ  შენობა დაკეტილი ხვდებათ, რის დასადასტურებლადაც კადრში მოჩანს „თრიალეთის“ ლოგო და ჯაჭვით დაკეტილი კარი.

„თრიალეთის“ წარმომადგენლები აცხადებენ, რომ სინამდვილეში, მათი კარი არცერთი წუთით არ დაკეტილა. მეტიც, სწორედ ამ შენობაში იყო განთავსებული მედიაცენტრი, საიდანაც საომარ ამბებს ქართველი თუ უცხოელი ჟურნალისტები გადასცემდნენ.

ტელე-რადიო კომპანია „თრიალეთის“ მესვეურები ღირსებისა და საქმიანი რეპუტაციის შელახვის გამო, უახლოეს პერიოდში, ფილმის რეჟისორ რენე ჰარლინის, პროდიუსერების პაპუნა დავითაიასა და კობა ნაყოფიას წინააღმდეგ სასამართლოს მიმართავენ.

„თუ ფილმის რეჟისორს დაკეტილი კარის გადაღება უნდოდა, მას შეეძლო  გუბერნიის შენობა გადაეღო! ხელისუფლება საკუთარი სარეკლამო ფილმით  სამაგიეროს გვიხდის იმის გამო, რომ ჩვენს ეთერში შუქდება მიუკერძოებელი და ობიექტური ინფორმაცია“, - აცხადებენ ტელე-რადიო კომპანიის წარმომადგენლები.

„პრესაგე. ტვ“ ესაუბრა ტელეკომპანია „თრიალეთის“ დამფუძნებელ ბადრი ნანიტაშვილს, რომელიც ადასტურებს, რომ ფილმ „აგვისტოს 5 დღის“ შემქმნელებს ტელეკომპანია „თრიალეთის“ დისკრედიტაციასა და სახელის შებღალვაში ადანაშულებს  

- უკვე ვმუშაობთ სარჩელზე და დაახლოებით რამდენიმე დღეში სარჩელს სასამართლოში შევიტანთ. ამ საკითხში იურისტები გვეხმარებიან და თავად ისინი გადაწყვეტენ, ადგილობრივად შევიტანთ სარჩელს თუ დედაქალაქში. ამ ფილმით ყველაფერი ისე წარმოაჩინეს, თითქოს ტელეკომპანია „თრიალეთის“ თანამშრომლები ომის დროს გაიქცნენ და იქაურობა მიატოვეს. სინამდვილეში, ასე არ მომხდარა. ეს ტყულია, და თუნდაც ასე ყოფილიყო, ფილმის რეჟისორსა და გადამღებებს არ უნდა გაეკეთებინათ ასეთი რამ. კერძოდ, ეჩვენებინათ დაკეტილი ტელეკომპანია და აქცენტი გადაეტანათ ტელევიზიაზე. თუ  გაქცეულ ხელისუფლებას აჩვენებდნენ, ეს სხვა იქნებოდა, მაგრამ კერძო ტელევიზია, კერძო კომპანია არ უნდა გამოეჩინათ ასე და მსგავს მდგომარეობაში არ უნდა ჩაეყენებინათ.

სინამდვილეში რა მოხდა, რომ გაიხსენოთ ომის პერიპეტიები? რამდენად გამართულად მუშაობდა აგვისტოს ომის დროს თქვენი ტელევიზია?

- სინამდვილეში, ყველა ჟურნალისტი აქ იყო იმ დროს და ტელეკომპანია „თრიალეთში“ მედიაცენტრი გახლდათ განთავსებული, სადაც უცხოელი თუ საქართველოს ჟურნალისტები მუშაობდნენ. როდესაც გორიდან ხელისუფლება გავიდა, მას მიჰყვა ჯარი და უკვე რუსები შემოდიოდნენ, ჩვენი გადამცემი ააფეთქეს ანძაზე და ანძა აიღეს. შესაბამისად, გაჩერდა გადაცემები, ამის შემდეგ ტელევიზიის თანამშრომელთა გარკვეული ნაწილი გავიდა ქალაქიდან, მაგრამ ტელევიზიაში ისევ იყო რამდენიმე პიროვნება დარჩენილი. ასევე, დარჩა რამდენიმე უცხოელი ჟურნალისტი. აქ იყვნენ ყველანი, ამ შენობაში, და არანაირად დაკეტილი და ჯაჭვჩამოკიდებული არ ყოფილა.

 თქვენ აცხადებთ, რომ, თუ ფილმის რეჟისორს დაკეტილი კარის გადაღება სურდა, უმჯობესი იქნებოდა, გუბერნიის შენობა დაეფიქსირებინა.

- მართლაც, თუ ფილმის რეჟისორს დაკეტილი კარების ჩვენება სურდა, პირველ რიგში, უნდა გადაეღო წასული ხელისუფლება. კერძო ტელევიზია დაკეტავდა თუ არა კარებს, ეს ნამდვილად არ იყო რეჟისორის გადასაწყვეტი და ფილმში საჩვენებელი. პირველ რიგში, აქცენტი უნდა გაკეთებულიყო, იყო თუ არა გუბერნია დაკეტილი. მართლაც, ყველამ ვიცით, რომ გუბერნიიდან ყველანი წასულები იყვნენ.

კერძოდ ვინ იყო წასული?

- გუბერნატორი და  ხელისუფლების სხვა წევრები, პირველ რიგში, გუბერნატორი, რადგან გუბერნატორი თუ წავიდოდა, რა თქმა  უნდა, სხვებიც წავიდოდნენ.

რატომ დასჭირდათ მაინცდამაინც ტელეკომპანია „თრიალეთის“ საწინააღმდეგო კამპანია?

- ზუსტად ეგ მიკვირს. მადლობის ნაცვლად იყო? ომის შემდეგ სააკაშვილი ადგილობრივ ტელევიზიებსა და ჟურნალისტებს თავგანწირვისთვის მადლობას უცხადებდა, მათ შორის, ჩვენ ვიგულისხმებოდით. მართლაც, თავგანწირვა არ იყო, როცა მედიაცენტრი „თრიალეთში“ იყო? ყველა, უცხოელი თუ ადგილობრივი ჟურნალისტი, ელოდებოდა, რომ პირველი ბომბი მაინცდამაინც „თრიალეთს“ უნდა დასცემოდა, რახან აქედან ინფორმაცია გადაიცემოდა. ასეთი თავგანწირვის შემდეგ ამ სახით სამაგიეროს გადახდა არ უნდა მომხდარიყო.

ტელეკომპანიის სახელის დისკრედიტაციას კონკრეტულად რას უკავშირებთ?

- ვუკავშირებთ იმას, რომ ტელეკომპანია „თრიალეთში“ გადის სხვადასხვა სახის ინფორმაცია, ოპოზიციის თოქ-შოუები, სადაც ხელისუფლების ოპონენტებს ვუთმობთ ეთერს. ასევე, ვუთმობთ ეთერს და ვეხვეწებით ხელისუფლებას, - მოდით, და თქვენ ორმაგ, სამმაგ დროს დაგითმობთ. ჩვენ არც ოპოზიციური ვართ, არც პოზიციური, ჩვენ გვინდა, ვიყოთ სამართლიანი არხი. ვცდილობთ, სიმართლე გავაშუქოთ. ყველანაირად, ყველა კომენტარისთვის მივდივართ ხელისუფლებასთან, მათ შორის, გუბერნატორ არსოშვილთან.

თუ ვინმეს უჭირს და არ ეხმარებიან, მივდივართ გუბერნატორთან, ვცდილობთ ამ ფაქტის გაშუქებას, მაგრამ ტელეკომპანია „თრიალეთისთვის“ ჩაკეტილია კარები. არ უნდათ გაშუქდეს, არ უნდათ ვაჩვენოთ, არ სურთ, ოპოზიცია მოვიდეს ეთერში სასაუბროდ. რატომ? ვთქვათ, ისაუბრა ოპოზიციამ ეთერში, მოდი, და შენც ილაპარაკე. ხომ არ გეუბნები, არ მოხვიდე. ნებისმიერ დროს მოვიდნენ და დროის პრობლემა არ ექნებათ.

აცხადებთ, რომ აპირებთ  ფილმის პროდიუსერებს - პაპუნა დავითაიასა და კობა ნაყოფიას უჩივლოთ. ამ განცხადების შემდეგ ხელისუფლება თუ გამოგეხმაურათ?

- არა, არ გამომხმაურებიან. ველოდებით, რომ მათი მხრიდან „გამოხმაურება“ ისევ ისეთი მძიმე იქნება, როგორც ამას წინათ მოგვიწყეს. დღისით-მზისით ტელეკომპანიის დირექტორი, ჯონი ნანეტაშვილი პატრულმა დაიჭირა და სასტიკად სცემა, ტვინის შერყევა დამართა. ამ ფაქტს ოთხი კამერა უყურებდა მოედანზე, გუბერნიის წინ.

ასევე, კერძო საკუთრება წაგვართვეს. ისეთი რამ გაკეთდა ქარელის გამგეობის მიერ, რომ კერძო საკუთრება წაართვეს ტელევიზიის დირექტორს. იმის გამო, რომ ვერ შეძლეს ამ ტელეკომპანიის წართმევაც, ისე გაატარეს საჯარო რეესტრში, რომ დამთხვევაა ერთმანეთზე - ჩვენი ეს კერძო საკუთრება, ამავდროულად, ქარელის გამგეობამაც საკუთარ თავზე დაარეგისტრირა. ეს ყველაფერი გამიზნულად კეთდება. ასე რომ, ხელისუფლებისგან ასეთ მძიმე „გამოხმაურებას“ ველოდებით.

ხომ არ გგონიათ, რომ ასეთი განცხადებების შემდეგ თქვენზე ფიზიკური ზეწოლის საშიშროება კვლავაც არსებობს?

- დიახ, ზუსტად ამას ვამბობ, რომ საშიშროებას ველოდებით. ბოლოს და ბოლოს, ომს დაველოდეთ და რუსულ ბომბს ველოდით,  თავზე რომ დაგვცემოდა და ამათაც დაველოდებით. ცემასაც ავიტანთ, ტყვიასაც და ყველაფერსაც. ხელისუფლებისგან ასეთ რეაქციას ველი.

 არ გიფიქრიათ, რომ ტელეკომპანია „თრიალეთის“ დისკრედიტაცია ფილმის პროდიუსერების დონეზე არ გადაწყდებოდა და პაპუნა დავითაია და კობა ნაყოფია ნაკლებად იქნებოდნენ ამის ინიციატორები? ვინ იყო უშუალოდ დაინტერესებული თქვენი ტელეკომპანიის რეპუტაციის შელახვით, რახან ამას ასეთ კლასიფიკაციას აძლევთ?

- ვერავის დავასახელებ, მაგრამ ვფიქრობ, პირველი პირების დაინტერესება უნდა იყოს. იმიტომ, რომ როდესაც მინისტრმა პაპუნა დავითაიამ გადაწყვიტა, რომ ამ ფილმის პროდიუსერი გამხდარიყო, ალბათ ზემოდან ჰქონდა ასეთი დავალება. თორემ ამას თავისით ვერ გადაწყვეტდა. ამდენად, არ ვიცი, ამ საქმეში იყო თუ არა ჩარეული პრეზიდენტი, ან სხვა ვინმე ვერ დავაბრალებ, მაგრამ მგონია, რომ იყვნენ უფრო ზემდგომი ორგანოები.

ბოლო დროს აქტუალური გახდა საერთაშორისო ორგანიზაციების ჩართვა მსგავს საკითხებში. მომხდარის შესახებ ვის აცნობებთ?

- დიახ, მსურს შეხვედრები გავმართოთ ამერიკისა და სხვა საელჩოებთან, რათა ამ საკითხთან დაკავშირებით დაველაპარაკო და მათგან მხარდაჭერა მივიღო. ამის შემდეგ ტელევიზიის მთელი კოლექტივი უფრო დაცულად ვიგრძნობთ თავს.

თვითონ ფილმი თუ გინახავთ? რამდენად დამაჯერებლად იყო გადმოცემული აგვისტოში მომხდარი რეალობა, რაც თქვენი ტელევიზიის თვალწინ ვითარდებოდა?

- სიმართლე გითხრათ, ფილმი არ მინახავს. უბრალოდ, ამ კადრით აღშფოთებული რამდენიმე პიროვნება მოვიდა და მითხრა, რომ ფილმში ასეთი ცრუ კადრი აჩვენეს. მოგვიანებით, მხოლოდ და მხოლოდ ის მონაკვეთი ვნახე, სადაც ტელეკომპანია „თრიალეთია“ ნაჩვენები და ჩვენს შესახებ კადრებია გადაღებული. დანარჩენი, არაფერი ვიცი. რაც შეეხება ხალხის რეაქციას, ამის შესახებ ბევრი იწერება, რომ ეს ფილმი უფრო პიარს წააგავდა, ვიდრე რეალობას.

ვინ აიყვანეთ ადვოკატებად?

- როინ ხიჯაკაძე და ეკა ბესელია მუშაობენ ამ საკითხზე. ასევე, იურისტთა ასოციაციამ  გამოგვიცხადა მხარდაჭერა.

თქვენ არაერთგზის მოგიწიათ სასამართლოსთან ურთიერთობა. ამ გამოცდილებიდან, სასამართლოს იმედი გაქვთ?

- დიახ, უამრავი საკითხის შესახებ შეგვიტანია სარჩელი. თუნდაც პროკურატურაში, ცემის ფაქტებთან დაკავშირებით, თუნდაც ჟურნალისტისა და ოპერატორის ცემის ფაქტზე სტალინის ძეგლის აღების დროს. ვერანაირ შედეგს ვერ მივაღწიეთ. უკვე ერთი წელიწადი გავიდა, რაც გამოძიება მიმდინარეობს. რაც შეეხება ჩემი ძმის, ჯონი ნანიტაშვილის ცემის ფაქტს, რომელზეც გამოძიება მიმდინარეობდა, ვიგებთ, რომ თურმე ისე შეუჩერებიათ გამოძიება, შეტყობინებაც არ გამოგვიგზავნეს. სახალხო დამცველის განცხადებით უნდა ვიგებდეთ ამ ამბავს?

ასევე, პატრულზე წინააღმდეგობის გაწევის მოტივით დააჯარიმეს ტელევიზიის დირექტორი ჯონი ნანიტაშვილი. სააპელაციოში გავასაჩივრეთ ეს საკითხი და ვითხოვდით, თუ მოსამართლეს მართლაც სიმართლის დადგენა აინტერესებდა, ყველაზე მარტივად ამას კადრების ამოღებით მიაღწევდა. ამის თაობაზე მივმართეთ „თი-ბი-სი“ ბანკსაც, ტოტალიზატორსაც, სადაც გვითხრეს, რომ, დიახ, გვაქვს ეს კადრები, რაც მოედანზე განთავსებულმა კამერამ ჩაიწერა, მაგრამ ვერანაირად ვერ მოგცემთ, თუ პოლიცია ან სასამართლო არ დაგვავალებსო.

ასე რომ, ნუ დაგვღუპავთო. არადა, შეეძლოთ ჩვეულებრივად ამოეღოთ ეს კადრები, ენახათ, მოხდა თუ არა წინააღმდეგობის გაწევა. აქედან გამომდინარე, გეტყვით, რომ ალბათ, „თრიალეთის“ საკითხთან დაკავშირებითაც სასამართლოს იმედი ვერ გვექნება. ჩემი აზრით, ამ ქვეყანაში სამართლიანი სასამართლო არ არსებობს. ამიტომ მოგვიწევს საერთაშორისო სასამართლოს მივმართოთ.

„პრესაგე.ტვ“ დაუკავშირდა „აგვისტოს 5 დღის“ ერთ-ერთ პროდიუსერს, კობა ნაყოფიას, რომლის წინააღმდეგაც ტელეკომპანია „თრიალეთის“ დამფუძნებელი სარჩელის აღძვრას აპირებს.

კობა ნაყოფია ტელეკომპანია „თრიალეთის“ პოზიციას აბსურდულად მიიჩნევს.

- „აგვისტოს ხუთი დღე“ მხატვრული ფილმია. ამდენად, ამ კადრების გადაღება შეგვეძლო. ამ თემაზე კომენტარის გაკეთება უსაფუძვლოდ მეჩვენება“, - აცხადებს კობა ნაყოფია.

რაც შეეხება ფილმის მეორე პროდიუსერს, დიასპორის მინისტრს, პაპუნა დავითაიას, იგი მობილურს არ პასუხობს, პრესსამსახურის მეშვეობით კი გვიცხადებს, რომ ამ თემაზე კომენტარის გაკეთებას არ აპირებს.