დიდი შანსია, რომ ახალი საგადასახადო კოდექსის ამოქმედების შემდეგ უძრავი ქონება გაძვირდეს. ექსპერტებსა და სპეციალისტებს ასეთი პროგნოზის გაკეთების მიზეზად კოდექსის ერთ-ერთი მუხლი მოჰყავთ, რომლის თანახმად, თუ საკუთრებაში მყოფი ქონება საწყის ღირებულებაზე 30 ათასი ლარით ძვირად გაიყიდება, 20%-იანი მოგების გადასახადი ამოქმედდება.

ჯერჯერობით, ქონების რეალიზაცია მხოლოდ მაშინ იბეგრება, თუ საკუთრებაში 2 წელზე მეტი ვადით იყო; ანუ, ახალი კოდექსით დაბეგვრის არეალი იზრდება, რაც, სპეციალისტების მტკიცებით, უძრავ ქონებას გააძვირებს. მათივე განმარტებით, დაიბეგრება მემკვიდრეობით მიღებული ქონების გაყიდვაც.

ფინანსთა მინისტრის მოადგილე კი ირწმუნება, რომ უძრავი ქონების ყიდვა-გაყიდვისას ნამატი შემოსავლის დაბეგვრა არანაირ პრობლემას არ შექმნის. ირაკლი სირაძე თავგამოდებით ამტკიცებს, რომ ნებისმიერი კაპიტალით მიღებული ქონება ყველა ქვეყანაში იბეგრება.

“როცა ქვეყანაში ხელფასით მიღებული შემოსავალი იბეგრება, ასიათასობით ნამეტი შემოსავალი დაუბეგრავი არ უნდა დარჩეს”, - აცხადებს ფინანსთა მინისტრის მოადგილე.

გამოდის, რომ ახალი საგადასახადო კოდექსი უძრავი ქონების ბაზარზე ფასების ზრდის მაპროვიცირებელი გახდება, ეს კი, ისედაც კრიზისში მყოფ დარგს დიდად ვერ წაადგება. 2010 წლის დასაწყისიდან მოყოლებული უძრავი ქონების ღირებულება თანდათან ისედაც იზრდება, რაც კლიენტების უკმაყოფილებას იწვევს. დამატებით ფასების ხელოვნურმა ზრდამ, ვითარება, შესაძლოა, ღრმა კრიზისში დააბრუნოს.

პირველი კვარტალის შედეგების მიხედვით, მოთხოვნა უძრავ ქონებაზე 15-20%-ით არის გაზრდილი. მოთხოვნის შესაბამისად, ფასმაც მოიმატა, თუმცა ასეთი ცვლილება მხოლოდ დასრულებულ მშენებლობებს შეეხო. განსაკუთრებით, ვაკე-საბურთალოს ტერიტორიაზე, სადაც დასრულებული კორპუსების ნაკლებობაა.

მაგალითად, ამ დროისთვის ვაკეში დასრულებულ კორპუსში ფასი 1000-1700 დოლარს შორის მერყეობს. ამავე უბანში ადრე, კრიზისის პირობებში, ფასი 800 დოლარამდეც იყო დაწეული. ბაზარზე თანდათან მოთხოვნა იზრდება დასრულებული კორპუსების მიმართ. ასეა ძველ თბილისში - ლესელიძეზე, მთაწმინდასა და სოლოლაკში. ამ უბნებში უძრავ ქონებაზე მოთხოვნა მერიის პროექტებმა გააძლიერა.

ფასების ზრდა არ შეინიშნება დედაქალაქის გარეუბნებში, განსაკუთრებით – დიდ დიღომსა და გლდანში. აქ, პირიქით, ფასების შემცირების ტენდენციაა. ამ უბნების დასრულებულ კორპუსებში ბინა 360 დოლარამდეა.

“უძრავი ქონების მიმართ მოთხოვნის ზრდას იმანაც შეუწყო ხელი, რომ ბანკებმა კიდევ დაწიეს იპოთეკური სესხების მოცულობა. პრაქტიკულად, 13-14%-ის ფარგლებშია, რაც ნიშნავს, რომ სამშენებლო სექტორის მიმართ ინტერესი კიდევ უფრო გაიზრდება. ჩემი ვარაუდით, მეორე კვარტლისთვის უძრავ ქონებაზე მოთხოვნა 30%-მდე აიწევს. ასეთი ოპტიმიზმის საფუძველს მაძლევს ბანკების მიერ იპოთეკური სესხების შედარებით დაბალი ნიშნული, რაც მოთხოვნას კიდევ უფრო გაზრდის, ეს გარდაუვალია. თავისთავად, უძრავი ქონების ფასიც მოიმატებს”, - ამბობს ექსპერტი გიორგი ბარვენაშვილი.