პარლამენტარ ნუკრი ქანთარიას თქმით, 21 მარტს, ,,ნაცმოძრაობის” მიტინგის მშვიდობიანად დასრულება იმის დამადასტურებელია, რომ ქვეყანას დემოკრატიული და ნორმალური ხელისუფლება ჰყავს. ,,ქართული ოცნება” აბსოლუტურად გაჩანაგებული პოლიტიკური ველის დროს შეიქმნა. მაშინ მიტინგზე მისვლა დიდი რისკის შემცველი იყო, მაგრამ ყველაფერი ეს ისტორიას ჩაბარდა - არჩევნები არჩევნებად დარჩა, მიტინგი მიტინგად, სიტუაცია ნორმალურ ვითარებაში მოექცა, მთავრობაც და ხელისუფლებაც იმაზე ფიქრობს, თუ როგორ გადაჭრას წინა ხელისუფლებისგან დანატოვარი პრობლემები. ახლა შიშის გარეშე ვცხოვრობთ, მაგრამ მათზე, ვინც კანონს გადაუხვევს, უმკაცრესი რეაგირება იქნება”, - აცხადებს ნუკრი ქანთარია.

- ბატონო ნუკრი, ,,ნაციონალები” ხელისუფლებას უნიათოს ეძახიან და უმოქმედობაში ადანაშაულებენ...

- დღეს საქართველოს ნორმალური ხელისუფლება ჰყავს - წინა ხელისუფლებისგან განსხვავებით, დანაშაული არ ჩაგვიდენია. რაც ახლოვდება 2016 წლის საპარლამენტო არჩევნები, მით უფრო ხშირდება მთავრობის კრიტიკა, ზეწოლა. ,,ნაციონალები”, თუ სამიზნე არ ექნებათ, ვერ წარმოჩინდებიან,

- შეიძლება, მაგრამ ისე ჩანს, რომ ,,ნაციონალები” სამიზნეს სწორად ირჩევენ...

- ყველაფრის მთავრობაზე გადაბრალება მათი მავნებლური ჩვევაა: ყველაფერი - სეტყვა წამოვა თუ თოვლი მოვა, ,,ქართული ოცნების” ბრალია.

- ბატონო ნუკრი, თბილისის მერიაში გამოვლენილი კორუფციული გარიგებები სეტყვაა თუ თოვლი?

- კორუფცია ყველგან ხდება, მთავარია, თვალი არ დახუჭო.

- კი ბატონო, მაგრამ გულდასაწყვეტია, რომ მანკიერება “ოცნებასაც” შეეპარა...

- “ნაციონალები” მაქსიმალურად ცდილობენ, ხალხში ნიჰილიზმი გამოიწვიონ. ჩვენი მთავრობა ისეთ სასიკეთო საქმეებს აკეთებს, რაც მათ არათუ გაუკეთებიათ, არც დასიზმრებიათ. ამიტომაც, ხშირად არაბუნებრივ, არარეალურ მოთხოვნებს გვიყენებენ: კომისიების შექმნას ითხოვენ, პარლამენტში კანონპროექტები შემოაქვთ, რომელთაგანაც ბევრი შინაარსობლივად მიმზიდველია, მაგრამ რეალობა არაა გათვალისწინებული და პიარზეა აგებული. ერთ ფაქტს გეტყვით: სააკაშვილის დროს, პარლამენტმა განათლების სამინისტროს მიერ ინიცირებული კანონი დაამტკიცა, რომლის მიხედვითაც, სასკოლო ასაკი ხუთი წლით განისაზღვრა. სპეციალისტებმა, ოთხწლიანი კვლევებით, დაადგინეს, რომ ხუთი წლის ბავშვის სკოლაში შეყვანა მართებული არაა. ერთი წელია, ექვსიდან შვიდ წლამდე ბავშვის სკოლაში მიღების თაობაზე ახალი კანონი მივიღეთ. ორი კვირის წინ, ,,ნაციონალების” დეპუტატმა, რომელიც არ მგონია, მაკარენკოს მიმდევარი იყოს, კანონპროექტი შემოიტანა, რომ სასკოლო ასაკი ხუთი წლიდან განისაზღვროს... ატყდა ვნებათაღელვა, კამათი, ბრალდებები, რომ ბავშვებისთვის წინასასკოლო პროგრამა არ გვაქვს. არადა, სექტემბრიდან წინასასკოლო პროგრამა აუცილებლად ამუშავდება. იმედი მაქვს, ისეთ გადაწყვეტილებებს მივიღებთ, რაც ბავშვებს სჭირდებათ.

- ყველაფრის მიუხედავად, ბატონო ნუკრი, “ნაციონალებს” ქართულ პოლიტიკურ სივრცეში ადგილი სერიოზულად აქვთ დამკვიდრებული...

- კი, რაღაც გარკვეული წრე აქვთ, სექტის მაგვარი. კარგი იქნება, თუ საერთოდ არ იქნებიან - გაცილებით ჯანსაღი მდგომარეობა იქნება. “ნაციონალები” ხომ ისინი არიან, ვინც ხალხს ციხეში სვამდა, აწამებდა, შეურაცხყოფდა, ვინც ტერიტორიები დაკარგა, ელიტური კორუფცია ააყვავა, ახლა ანგელოზის ფრთებს ისხამენ და ამინდის მიხედვით იქცევიან. მათ ხელები სისხლში აქვთ გასვრილი და ამას საზოგადოება ფხიზლად უყურებს - ეს 21 მარტის მიტინგმაც აჩვენა, რომელიც ვალის მოხდის მიზნით ჩაატარეს.

- ვალი ვის წინაშე მოიხადეს?

- ,,ნაციონალებმა” მიტინგი დასავლელი პარტნიორების დასანახად ჩაატარეს და გააგებინეს, აქ ვართ, ცოცხლები ვართო. ჩვენს ხელისუფლებას უნიათოს ეძახიან და ამ დროს სწორედ მათი აქცია გახლდათ უნიათო. დავით ბაქრაძე მიტინგზე ამბობდა, მთავრობას ჩვენი ისე ეშინია, აგერ, სპეცრაზმი და პოლიცია  გამოიყვანაო. ,,უნიათო” იმიტომ ვართ, რომ დემოკრატიული განვითარების გზით წავედით და ისე არ ვიქცევით, როგორც თავად იქცეოდნენ? ,,ნაციონალებმა” ტელედაჭერების გზითა და ,,შევარდნებით” ადამიანთა უფლებების შელახვის პრაქტიკა უკრაინაში გააგრძელეს - ახლა შიშს იქ თესავენ.

- როგორც ჩანს, თქვენც იზიარებთ პრემიერის მოსაზრებას, რომ ,,ნაციონალური მოძრაობა” სექტაა? სიტყვა ,,სექტა” ცხოვრების წესს,  მიმდინარეობას, დაჯგუფებას ნიშნავს. სექტაში თავისუფალი, ერთიანი რწმენის ადამიანები არიან გაერთიანებულნი...

- ,,ნაციონალებსაც” რწმენა და დანაშაულებრივი იდეები აერთიანებთ. საქართველოს მოქალაქის ვალია, არ დაივიწყოს მათი საქმიანობა და განაჩენი საარჩევნო ყუთთან გამოუტანოს.

რაც შეეხება დანაშაულში ეჭვმიტანილებს, მათი დრო ნელ-ნელა მოდის - ყველას დაუძახებენ.

- დაპირებული სამართლიანობის აღდგენას გულისხმობთ? ეს პროცესი მეტისმეტად გაჭიანურდა, თან პროკურატურას დაკავებული მაღალჩინოსნებისათვის ბრალის დამტკიცებაც უჭირს...

- დანაშაულის მრავალრიცხოვანი კასკადია, ყველაფერს გამოძიება სჭირდება,  პროკურატურაში ახალი დეპარტამენტი შეიქმნა, რაც იმედს მაძლევს, რომ გარკვეული დროის მერე, საზოგადოებას შედეგებს მოახსენებენ. ამაში დამოუკიდებელი სასამართლო დიდ როლს ითამაშებს. ჩვენი, მთავრობის და ამავე დროს, მოქალაქეების ვალია, იმ თავისუფალ სივრცეს გავუფრთხილდეთ, რაც ,,ქართული ოცნების” დამსახურებით შეიქმნა.

- ...პარლამენტში რეჟისორების, პოეტების და ხელოვნების სხვა სფეროების წარმომადგენელთა ყოფნას აპროტესტებდნენ. საკანონმდებლო ორგანოში ყოფნისას თქვენ, როგორც რეჟისორმა, ქართული თეატრისთვის რა გააკეთეთ?

- თქვენს ნათქვამში მცირედ შესწორებას შევიტან: დღევანდელ პარლამენტში პოეტი დეპუტატი არ გვყავს, ისე, თუ ვინმე ლექსებს ჩუმად წერს, ვერ გეტყვით. პარლამენტი მხოლოდ საკანონმდებლო კი არა, წარმომადგენლობითი ორგანოცაა, ამიტომ იქ საზოგადოების ყველა ფენის წარმომადგენლის ხმა უნდა ისმოდეს.

რაც შეეხება ჩემს საქმიანობას, პარლამენტში განათლების, ხელოვნების და მეცნიერების კომიტეტში ვმუშაობ. ჩემი ინიციატივით, თეატრის კანონი უკვე მივიღეთ. ასევე, ვმუშაობთ, კულტურის და ენის კანონებზე. აი, მეცენატობის კანონს კი, ჯერჯერობით, ვერაფერი მოვუხერხეთ - ბევრი ხვრელია. განათლების სფეროშიც გვაქვს წარმატებები.Gგვაქვს შეცდომები, მაგრამ ვცდილობთ, გამოვასწოროთ. ჩვენი საქმიანობა მოსახლეობამ უნდა შეაფასოს.  

- ,,ქართული ოცნებაც” აღიარებს, რომ პიარი არ უვარგა...

- კი ბატონო, გეთანხმებით. მთავარი მაინც გულწრფელობაა, მინახავს ჩამოყვანილი პიარკომპანიები, მენეჯერებისთვის ბევრი ფულიც გადაუხდიათ, მაგრამ ხელთ უცხოელი პიარ-სპეციალისტების მიერ დამუშავებული სასაცილო პიროვნება შეგვრჩენია.

- გასაოცარია: რატომ ვერ ახერხებს ხელისუფლება საკუთარი საქმიანობა ხალხამდე მიიტანოს. დღეს უბრალო შპს-საც ხომ კარგი პიარ-მენეჯერი ჰყავს...

- გასაგებია, მაგრამ ჩვენ თავიდანვე უარი ვთქვით პიარზე. არ გვაქვს პარტიული ტელეარხი. ხალხი დაჩვეულია ,,რუსთავი 2”-ის მსგავს ტელევიზიებს, რომლებიც სხვა რეალობას თანამედროვე ტექნოლოგიებით ხატავენ. გახსოვთ, წინა ხელისუფლების დროს, ხელისუფლებასთან დაახლოებული ჟურნალისტები წინასწარ ,,ჩაწყობილი” კითხვებით მიდიოდნენ, სხვებისთვის კი, ეს სივრცე დახურული იყო. ბატონმა ბიძინამ ჯერ, კიდევ ხელისუფლებაში მოსვლამდე, მედიასთან ურთიერთობის ტრადიცია დაამკვიდრა. ახლახან, საქართველოს პრემიერ-მინისტრის მორიგ პრესკონფერენციას თვალს ტელევიზიით ვადევნებდი და იცით, რა შევნიშნე?

- რა?

- ბატონი ირაკლი მთავრობის წარმატებულ პროექტებზე საუბრობდა, მედიის წარმომადგენლები მოწყენილი სახეებით ისხდნენ და ერთი სული ჰქონდათ, შეხვედრა კითხვა-პასუხის რეჟიმში როდის გადავიდოდა.

- იქ ვიყავი, ბატონო ნუკრი..

- დამსწრეთ ისეთი სახეები ჰქონდათ, თითქოს ყველაფერი ეს სხვა ქვეყანაში ხდებოდა. დარბაზი მხოლოდ მაშინ გამოცოცხლდა, როცა კითხვები პირად ცხოვრებას შეეხო: როგორია თქვენი საწოლი და ა.შ.

- ბატონო ნუკრი, სამჯერ დავესწარი პრემიერის პრესკონფერენციას და კითხვის დასმა ვერ მოვახერხე.

- რატომ? შეხვედრა საკმაოდ ხანგრძლივი იყო.

- იმიტომ, რომ რიგმა არ მომიწია! ხელისუფლების მხრიდან ჟურნალისტების კრიტიკა ყოველდღიურობის ატრიბუტი გახდა. ჩვენც ოჯახებიდან მოვდივართ, ამ ქვეყნის მოქალაქეები ვართ, ყველა პრობლემა, რაც ქვეყანაშია, ჩვენც გვეხება. გვინდა, მკითხველს ქვეყნის წინსვლისა და წარმატებების შესახებ ვაუწყოთ, მაგრამ როცა შეხვედრაზე გიწვევენ და მაღალი ტრიბუნიდან ასეთ ფრაზებს გეუბნებიან: ,,თქვენ ქმნით სრულ ქაოსს ქვეყანაში, ქმნით აბსოლუტურად განსხვავებულ რეალობას”, ,,თქვენ ხართ ჟურნალიტები, მაგრამ ყველაფრის უფლება არ გაქვთ”, როგორ უნდა მოვიქცეთ?

- ქაოსი არა, მაგრამ მცდელობები არის. ხშირად ჟურნალისტები მეპატრონეების ხელში ბრმა იარაღად გვევლინებიან.

- თუ თავისუფალი სივრცეა, აზრის გამოთქმა ასე რატომ უნდა შეფასდეს?

- შენიშვნის მოსმენაც ასატანი უნდა იყოს. მაქსიმალურად რატომ არ ხდება იმ სიკეთეების წამოწევა, რასაც მთავრობა აკეთებს?! მედიის მხრიდან ეს ინტერესი ვერ დავინახე.

- ბატონო ნუკრი, ამას პიარი ჰქვია და ფული ღირს! ისე, როცა ჟურნალისტი უმაღლეს ხელისუფალს ჩინოვნიკზე მოპოვებულ ინფორმაციას აწვდის და პასუხად იღებს, რომ უჩივლებენ, რადგან ყველაფრის უფლება არ აქვს, რომელ სასიკეთო საქმეებზე ვლაპარაკობთ? ყველაფრის უფლება, მგონი, არც ქვეყნის პირველ პირებს აქვთ, არ მეთანხმებით?

- სწორედ თავის თავზე თქვა პრემიერმა. ეს პირველი შემთხვევა არაა, როცა ჟურნალისტი რაღაცას ყურს მოკრავს და გაავრცელებს. მერე, ეს სიმართლედ საღდება, ადამიანთა მეხსიერებაში ილექება და გაქარწყლებას აზრი აღარ აქვს. გავიხსენებ ერთ ფაქტს, რომელსაც სოციალურ ქსელში გამოვეხმაურე: გაქცეულ პატიმარზე ყველა მედიასაშუალება ერთხმად გაჰყვიროდა, მაგრამ როცა სამართალდამცავებმა დაიჭირეს, მხოლოდ კანტი-კუნტად გაისმა, დააკავესო. E წონასწორობა დარღვეულია და პრემიერსაც რეაგირება ამაზე ჰქონდა. იმასაც ვიტყვი, რომ თავისუფალი სივრცე სწორედ მედიისთვისაა შექმნილი. პრემიერმა ისიც თქვა, რომ ხალხი ეუბნება, ტელევიზიები გააჩუმოს.

- ტელევიზიები როგორ უნდა გააჩუმოთ?

- ხალხს ახსოვს, როგორ აჩუმებდნენ ტელევიზიებს, მაგრამ ჩვენ ამას არ გავაკეთებთ. ჩვენ სამუდამოდ დავამკვიდრეთ ცხოვრება შიშის გარეშე, ამ კურსს არც ჩვენს მერე მოსულმა ხელისუფლებამ უნდა გადაუხვიოს.Aამას ზოგი ,,უნიათობაში” გვითვლის. ვიღაც, ბუნებრივია, მოითხოვს, ცოტა მკაცრად მოვექცეთ იმ მედიასაშუალებებს, რომლებიც სიცრუის ტირაჟირებას ახდენენ. პრემიერს გულწრფელი რეაგირება ჰქონდა მის მიერ დანიშნული გუბერნატორის მისამართით გამოთქმულ ბრალდებებზე. კი ბატონო, დაიდოს დამამტკიცებელი საბუთები, საქმეში პროკურატურა ჩაერთვება, თუკი ჟურნალისტს დამამტკიცებელი უტყუარი საბუთები აქვს, ბოლომდე უნდა მიჰყვეს. ყურმოკრული ფაქტების გამომზეურება არაა საკადრისი.

- არ მგონია, ჟურნალისტი ასეთ შეხვედრაზე ისე მოვიდეს, დამადასტურებელი დოკუმენტი არ ჰქონდეს და ყურმოკრული ფაქტები გაახმიანოს.

- ჩვენ მოვედით არჩევნებით, წავალთ არჩევნებით, ყოველგვარი მკვეთრი მოძრაობების და ,,გადადექი”-ს ძახილის გარეშე. გენიოსები არ ვართ, მაგრამ ნორმალური მთავრობა ვართ... ტაშის გრიალი არ გვინდა..

- ტაშის გრიალი კი არა, წელიწადნახევარში არჩევნები გაქვთ მოსაგები, ბატონო ნუკრი...

- ჩვენ გვინდა, საზოგადოება მაქსიმალურად ინფორმირებული იყოს მთავრობის რეალურად გაკეთებულ საქმეებზე. ისე, როგორც ამბობენ ,,ზოგის ბამბა ჩხრიალებს, ზოგის - ოქროც კი არა”.

- რას აპირებთ?

- მედიამ დადებითი თემები უნდა წამოსწიოს.

- ეს უკვე მითხარით.

- აი, თქვენი გაზეთის მეშვეობით, მივმართავ ყველას, წონასწორობა შეინარჩუნოს. ეს არ ნიშნავს, რომ ცუდი დაიმალოს, შეიფუთოს.

- ისე, ბატონო ნუკრი, ,,ქართული სიტყვა” რატომ არ გაქვთ გამოწერილი?

- ზოგადად, გაზეთებს არ ვიწერ.

- მიშაც ასე იქცეოდა... ,,აი-რა-ი”-ს კვლევებით, ,,ქართული ოცნების” რეიტინგი დაცემულია.

-,,აი-რა-ი”-ს კვლევები ჩემში დიდ ნდობას არასოდეს იწვევდა.

- ანუ, კვლევების შედეგები არ გაშფოთებთ?

- მტკივნეული რეაგირებები არ მაქვს. არ ვიცი, რა მეთოდოლოგიით მუშაობდნენ წარსულში, როცა ,,ნაციონალურ მოძრაობას” უმაღლეს შეფასებას აძლევდნენ, მაგრამ მაინც, სამართალმა გაიმარჯვა. ჩემი აზრით, დღეს ,,ოცნების” რეიტინგი სადღაც 65%-ის ფარგლებში უნდა იყოს. ისე, გაცილებით ცუდი იქნებოდა, 80% რომ დაეწერათ. ვიღაცას ბალიში და მუთაქა, მხართეძოზე წამოწოლა მოუნდებოდა. ბატონმა პრემიერმაც ეს თქვა, ვინც საქმეს აკეთებს, მისთვის რეიტინგი თვითმიზანი არ უნდა იყოს და არც უნდა ეცალოსო.

- უფრო სწორად, რეიტინგები უსაქმურების საქმეაო..

- ეს ფრაზა ცოტა უხეშად მომეჩვენა, მთლად მასეც არაა, ასეთი ტიპის კვლევა რაღაცაზე დაგაფიქრებს, რომლის მიხედვითაც ბიძგი მოგეცემა, აკეთო შენი საქმე.

- თქვენში ემოციას რა იწვევს?

- ნებისმიერი საქმე, რაც იმისთვის უნდა გაკეთდეს, რომ სიღარიბე და გაჭირვება აღმოიფხვრას.

- ამას წინათ, თქვით, თუკი მოსახლეობის 62% გაღარიბდა, ეს უბედურება არააო.

- ეს იყო ამონარიდი ჩემი საუბრიდან. კიდევ ერთხელ განმარტებას გავაკეთებ. უამრავი უბედურება გვაქვს გავლილი, იმდენად მძიმე ცხოვრება გავიარეთ, რომ მასთან შედარებით, ასეთი დონის გაღარიბება არაა ტრაგედია-თქო.

- აბა, რა არის ტრაგედია?

- ტრაგედია ისაა, რომ ტერიტორიებს წაგართმევენ, ხალხს ომში ხოცავენ, ციხე  პატიმრებით ივსება, ელიტური კორუფცია ჰყვავის, ქვეყანაში სამოქალაქო დაპირისპირებაა. სიდუხჭირე, რაც ახლა ლარმა მოიტანა, დაძლევადია, მოევლება. ამის თქმა მინდოდა და არა იმისი, რომ გულგრილი ვარ ღარიბი ადამიანების მიმართ. ხანგრძლივი საუბრის დროს, ადამიანი რაღაცას აზრის გამოსახატავად ამბობს. ჩემთვის ეს მხოლოდ სიტყვებია, რომელიც მედიასაშუალებამ სათაურად გამოიტანა. ნურავის ჰგონია, რახან პარლამენტში მოვხვდი, ჩემი ცხოვრება ერთბაშად საამური გახდა, ყველას შეუძლია, მოვიდეს და ნახოს ჩემი სახლი.

- ბატონო ნუკრი, ხალხს მძიმე ეკონომიკური მდგომარეობა კი არ აშფოთებს, არამედ, ყველაფერს საკუთარ ჯიბეზე გრძნობს.

- მთელი მსოფლიო, რეგიონი კრიზისშია ჩაფლული, მაგრამ ჩვენს მოქალაქეს ნაკლებად აინტერესებს, რა ხდება თუნდაც ჩვენზე მდიდარ მეზობელ აზერბაიჯანში, მაგრამ ეს რეალობაა, ღმერთმა ნუ ქნას, მეგობარ უკრაინაში გაჩენილი ხანძრის ნაპერწკალი აქეთ გადმოვარდეს. წინა ხელისუფლება რომ ყოფილიყო, ახლა ომის ქარცეცხლში ვიქნებოდით გახვეული. ეს ხალხმა უნდა გააცნობიეროს.

- სამოქალაქო ომის საშიშროებას გულისხმობთ?

- არა, ეს იქნებოდა ტერიტორიების დაკარგვის ომი, მაგრამ ჩვენ რუსეთთან, ფრთხილი და ტაქტიანი ურთიერთობებით, ვითარების ნორმალიზება მოვახერხეთ.

 - ბატონო ნუკრი, რუსეთის მიერ აფხაზეთსა და ე.წ. სამხრეთ ოსეთთან დადებული ე.წ. სამოკავშირეო ხელშეკრულება იმაზე ნაკლებია, ვიდრე ომი?

- ყველაფერი ,,ნაციონალური” ხელისუფლების უგუნური პოლიტიკის შედეგია, ეს ხელშეკრულება აფხაზეთისა და ე.წ. სამხრეთ ოსეთის აღიარების შემდგომი პროცესია, მას საერთაშორისო თანამეგობრობა არასდროს ცნობს.

- ბიძინა ივანიშვილი, როცა კოალიცია ,,ქართულ ოცნებას” ქმნიდა, ამბობდა, შესაძლოა, ოდესმე დაიშალოსო. სახეზეა პროცესი: ალასანია კოალიციას გამოეყო. ,,მრეწველების” ლიდერის, გოგი თოფაძის განცხადებები ანტიდასავლური რიტორიკაა. კოალიციიდან კიდევ ვინ გაიქცევა?

- კოალიცია გარკვეული მიზნისთვის შეიქმნა, ეს მიზანი გადალახულია. გოგი თოფაძემ პირადი მოსაზრებები გამოთქვა, თუმცა კოალიციაში შემავალ ამ სუბიექტს ხელი მოწერილი აქვს საქართველოს ევროინტეგრაციის კურსის სასარგებლოდ. მაშინაც კი, როცა ჩვენსა და გარე სამყაროს შორის ,,რკინის ფარდა” იყო ჩამოფარებული, ქართველს აინტერესებდა დასავლეთი, ფიქრობდა, რომ მერცხლები იქიდან მოფრინავდნენ. ჩვენ სერიოზულად ვემზადებით რიგის სამიტისთვის.

- გიგა ბოკერია ამბობს, მთავრობა ცდილობს, ხალხი შეაგუოს რიგის სამიტის იმედგაცრუებასო. თოფაძის ანტინატოური აქტიურობა ამას ხომ არ უკავშირდება?

- რასაც ბოკერია და მისი თანამოაზრენი იტყვიან, განსჯის საგანი არაა. გოგი თოფაძემ გააჟღერა, რომ მოსახლეობის გარკვეულ ნაწილს აქვს საფუძველი, ასე იფიქროს.

- გასაგებია, რომ მოქალაქეს უფლება აქვს, ასე იფიქროს, მაგრამ კოალიციას ხომ საგარეო ვექტორზე საერთო აზრი უნდა ჰქონდეს? ,,მრეწველები” კოალიციას დატოვებენ?

- არ ვიცი, პროცესები როგორ წავა. მოულოდნელი არაფერი იქნება, არც  კოალიციაში შემავალი სუბიექტები არ ვართ ერთნაირები, ამქვეყნად არაფერია მარადიული, მათ შორის, არც - კოალიცია ,,ქართული ოცნება”. ვფიქრობ, არჩევნებამდე რყევა არ იქნება.

- ალასანიას გასვლა რყევა არ იყო?

- რასაკვირველია, იყო, ძალიან სამწუხარო რამ მოხდა. მართალია, კოალიციაში სხვადასხვა შეხედულება არსებობს, მაგრამ დიდ ცვლილებებს არ ველოდები.

- პარტია ,,ქართული ოცნება” როგორ ვითარდება?

- პარტიის განვითარების პროცესი ჭიანურდება, ვისურვებდი, მალე დამთავრდეს.

- ამასობაში, მმართველმა პარტიამ აჭარაში უმრავლესობა დაკარგა.

- შექმნის დღიდან, პარტია უფრო საშტაბო რეჟიმით მუშაობდა - არჩევნებიდან არჩევნებამდე, პარტიული მუშაობა კი კადრების აღზრდას, რეგიონებში განმავითარებელ პროექტებსა და სხვა აქტივობებს გულისხმობს.

- უმრავლესობის გადახალისება არ იგეგმება?

- თავისთავად ფაქტია, რომ რაღაც გარკვეული ნაწილი, ალბათ, გადახალისდება, მაგრამ ეს თვითმიზნად არ უნდა იქცეს. მართალია, იქ ფიცვერცხლნაჭამი ძმები არ ვსხედვართ, მაგრამ აკადემიური ურთიერთობები უნდა დავიცვათ. ყველაზე მთავარი ამოცანა შესრულებულია.  

- რა შესრულდა, ბატონო ნუკრი?

- ,,ნაცმოძრაობა” აღარაა ხელისუფლებაში. დანარჩენ გამოწვევებს მოვერევით.

 - ბატონო ნუკრი, როგორც რიგით მოქალაქეს, არ მაქვს განცდა, რომ ,,ნაციონალები” სადმე წავიდნენ და ამაში პოლიციიდან გივი თარგამაძისთვის ინფორმაციების მიწოდებამაც დამარწმუნა...

- რაც მთავარია, ხელისუფლებაში აღარ არიან, სადღაც, შუა რგოლებში კი ჯერჯერობით სხედან. თუკი პოლიციელი ,,ნაცმოძრაობის” წევრი იყო და გივი თარგამაძეს ინფორმაციებს ნამდვილად აწვდიდა, მავნებლობისთვის დაისჯება. კანონზე მაღლა არავინ დგას.

- თარგამაძემ ხელისუფლებას ბრალი იქით დასდო და ამტკიცებს, რომ პოლიციელი, რომელმაც ,,კანონიერი ქურდის” საქართველოში შემოყვანის შესახებ ინფორმაცია გასცა, სამსახურიდან გაათავისუფლეს.

- გივი თარგამაძეს სხვა ცოდვები აქვს, მას ნელ-ნელა მოჰკითხავენ. შფოთიანი მსოფლიოს ნაწილი ვართ, ჩვენზე ბევრი არაა დამოკიდებული, მაგრამ რეაგირება ყველაფერზე გვექნება.

- გაქვთ შეგრძნება, რომ საზოგადოება ,,თვალში ნაცარს არ შეიყრის”?

- დიახ, ეს შეგრძნება მაქვს და სწორედ ჩვენი დამსახურებაა, ეს სარკმელი ჩვენ გავხსენით.

- ისე, სადაა 105 საწარმო?

- მთავრობის განაცხადი, 105 საწარმო დაფინანსდაო, იმას არ ნიშნავს, რომ ქვეყანაში გემთსაშენი და მეტალურგიული ქარხნები გუგუნებენ. დაფინანსდა საწარმოები, მათგან ზოგმა გაამართლა, ზოგმა - ვერა.

მალე ამუშავდება პროექტი: ,,ძლიერი რეგიონი - ძლიერი ქვეყანა”. დიდი ხანია, აღარ ვართ საბჭოთა ქვეყანა, როცა ქარხანა-ფაბრიკები სხვა რესპუბლიკებიდან გამოგზავნილი მასალებით მუშაობდნენ.

- ასეთი ეკონომიკური თანამშრომლობის ფორმები ახლაც შესაძლებელია. ბატონო ნუკრი, დაპირება, რაც ბანკებისა და იპოთეკის საკითხს უკავშირდებოდა, სადაა?

- იპოთეკის საკითხი ბევრ სირთულეს მოიცავს, თუმცა მცდელობები ახლაც მიმდინარეობს. ,,ატსტუპნიკების”თემაც აქტუალურია. ეს პრობლემაც მემკვიდრეობით გვერგო. სააკაშვილი აგულიანებდა ხალხს, აიღე სესხი და ჩვენ დაგეხმარებითო. ჰოდა, იღებდნენ სესხებს, ზოგი ახლობლის გადასარჩენად, ოპერაციის გასაკეთებლად, ზოგი - ციხიდან პატიმრის დასახსნელად, ზოგიც - გასამდიდრებლად. ახლა თავად გაჰკივიან, ხალხს მიხედეთო. დამეთანხმებით, ქვეყანაში სიკვდილიანობამ იკლო და ეს წარმატებული სამედიცინო პროექტების შედეგია. ,,ნაციონალები” ხელისუფლებას მოუწოდებენ, გადასახადებს დაუწიეთო. კი ბატონო, დავუწიოთ, მაგრამ მერე ჯანდაცვას ვინ დააფინანსებს?

- კიდევ ერთ თემაზე მინდა გკითხოთ: მარნეულში ბიზნესმენ უჩა მამაცაშვილისთვის სიმბოლურ ერთ ლარად გადაცემული მიწა განსჯის საგნად  იქცა. პრემიერმა თქვა, რაღაც ხრიოკი მიწა გადავეცით და იქიდან შემოსული მოსავალი ქართული ბაზრის იმპორტის 30%-ს ჩაანაცვლებსო...

- პრემიერმა აღნიშნა, რომ ბიზნესმენი ძნელად გამოსაყენებელ ტერიტორიას მაქსიმალურად გამოიყენებდა, 45-მილიონიან ინვესტიციას ჩადებდა და იქ მოყვანილი სურსათით მოამარაგებდა მოსახლეობას. ყველაფერ ამას კარგი განწყობით უნდა შეხედოთ.

- ისე, ხრიოკზე გამახსენდა, 2008 წლის რუსეთ-საქართველოს ომის მერე, სამაჩაბლოს 114 დაკარგულ სოფელზე მიხეილ სააკაშვილიც ამბობდა, რაღაც ხრიოკი მიწები დაიკარგაო.

- განსხვავებას ვერ ხედავთ? ნიადაგი ზოგან ხრიოკია, ზოგან - ნოყიერი, ირაკლი ღარიბაშვილს ამ სიტყვის გამოყენებით, სამშობლოსთვის შეურაცხყოფა არ მიუყენებია, რასაც ვერ ვიტყვით ექსპრეზიდენტ მიხეილ სააკაშვილზე.