ვის ეძახის შტერებს, რატომ აკრიტიკებს ,,ვანოს შოუს', ვის ჩუქნის ,,აკრედიტაციის გარეშეს' და რამდენს უხდიან პატარკაციშვილები შალვა რამიშვილს
ეს ის შალვა აღარ არის! ყოველ შემთხვევაში, მუღამდაკაგრული, არაეპატაჟური და ცოტა გულახდილიც მეჩვენა, თუმცა თავად ამტკიცებს, რომ მაღალი ანაზღაურების ხიბლში სულაც არაა, უბრალოდ, ქუჩაში ხალხს აღარ ხოცავენ და ამიტომ, აღარც ,,აკრედიტაციის გარეშე'-ა საჭირო, აღარც - წინააღმდეგობა და პროტესტი. გთავაზობთ ინტერვიუს ყოფილ ჩინოვნიკ, შოუმენ, ,,იმედზე' ორი გადაცემის წამყვან, პროფესიონალ და კორექტულ ჟურნალისტ შალვა რამიშვილთან. 

- თავდაპირველად, უნდა გითხრათ, რომ ბოლომდე კორექტული და მიკერძოებული არ ვიქნები - ერთ-ერთი ტელევიზიის სახე ვარ და ამ პრობლემას საკუთარ თავში ვხედავ, თუმცა ვეცდები, ზღვარს მაინც არ გადავიდე.

- ეკონომიკური კრიზისი ,,იმედელებსაც' შეგეხოთ და, საერთოდ, ციფრულ მაუწყებლობაზე გადასვლა ტელებაზარზე როგორ აისახება?

- ციფრული მაუწყებლობის პლუსი ისაა, რომ ხარისხი უკეთესია და მეტი არხის ყურების საშუალებაც იქნება. სახელმწიფო სოციალურად დაუცველ ოჯახებს, თუ არ ვცდები, ციფრული მაუწყებლობის აპარატურას შეუძენს. მედიაბაზარზე ახალი ტელევიზიების გაჩენა მაინცდამაინც ამ სიახლეზე არაა დამოკიდებული, ამას ორი მიზეზი აქვს - ბაზრის მოთხოვნა და პოლიტიკური დაკვეთა - როცა ტელევიზიას რომელიმე პოლიტიკური ძალა ქმნის. არსებული პატარა ტელევიზიები კი, უფრო პატარა სტუდიებია და არა კლასიკური არხები. ამ ხალხს აქვს ამბიცია, მცირე თანხად ტელევიზიის მსგავსი რაღაცები შექმნას, მაგრამ, ადრე თუ გვიან, ან გაკოტრდებიან, ან ერთ დიდ ტელევიზიად ჩამოყალიბდებიან - ბაზარი ყველაფერს დაალაგებს.

- დღეს ძლიერი ტელევიზიის შესაქმნელად პოლიტიკური ან საბაზრო მოთხოვნილება არსებობს?

- არა და ვფიქრობ, ამის საშუალებას არც სარეკლამო ბაზარი იძლევა. სატელევიზიო სარეკლამო ბაზარი, 2013-2014 წლებში იზრდებოდა, თუმცა ეკონომიკური პრობლემების გამო, ახლა მცირდება - დოლარის კურსმა სარეკლამო ხარჯის შემცირებაზე იმოქმედა.

- ამ მხრივ გავლენა, ალბათ, კომერციული რეკლამის კანონმაც დატოვა, არა?

- ეს კანონი მომწონს, რადგან ეთერს უფრო ცივილიზებულს ხდის და, ამხელა სარეკლამო ბლოკები რომ აღარ იქნება, გადაცემების რეიტინგიც გაიზრდება, რადგან ხალხი სხვა არხზე აღარ გადართავს. რეკლამის ფასიც მოიმატებს, თუმცა არა რადიკალურად.

- აბა, რატომ იჩხუბეს ,,რუსთავი 2'-ის გენდირექტორმა და დეპუტატებმა?

- პოლიტიკური მოტივით. ,,რუსთავი 2', რომელიც ნაციონალების პროპაგანდის მანქანაა, ცდილობს, ვითარება ისე წარმოაჩინოს, თითქოს ,,ოცნება' ებრძვის, მათ შორის, ამ კანონითაც.

- შალვა, ყველა ამბობს, რომ ,,იმედი' და სხვა არხებიც ,,რუსთავი 2'-საა ,,ჩაბმული' და ინერციით მიყვება. ამ შენიშვნას იღებთ?

- ეს უსამართლო შენიშვნაა. ,,რუსთავი 2'-ს კონკრეტული ამოცანა აქვს: ხელისუფლებაში სააკაშვილის დაბრუნების უზრუნველყოფა. ეს ცხადია! არ შეიძლება, სხვა, მით უმეტეს, ბადრი პატარკაციშვილის ოჯახის ტელევიზიას მსგავსი ამოცანა ჰქონდეს. კარგად ვიცი ,,იმედის' შიდასამზარეულო და პატიოსან სიტყვას გაძლევთ, დამფუძნებლები არხის პოლიტიკაში არ ერევიან. რაც შეეხება ,,რუსთავი 2'-ს, ძალიან მიკერძოებულია: არის ეკა კვესიტაძის გადაცემა, რაც, თავიდან ბოლომდე, ხელისუფლების დისკრედიტების მცდელობაზეა აგებული. გასართობი გადაცემები ავიღოთ - პირდაპირ ჩანს, რომ 100 ხუმრობიდან ასივე მარგველაშვილსა და ბიძინას ეხება.

- ვანო ჯავახიშვილის ხუმრობა სააკაშვილსა და ნაციონალებზე არ მოგისმენიათ?

- ამ საქმის სპეციალისტი ვარ და ნაციონალებზე ხუმრობის ხვედრითი წილი ძალიან მცირეა.

- ხელისუფლებაში ,,ოცნებაა'. ხელისუფლებაზე კი, ბუნებრივია, ყველა მეტს ხუმრობს...

- შთაბეჭდილებებს გიზიარებთ, სასამართლო განაჩენი კი არ გამომაქვს. ჩემს აზრს ბევრი ეთანხმება - ეს შოუც პოლიტიკურად ანგაჟირებულია. ცხადია, ეს ტელევიზია ხელისუფლების რეიტინგის დაგდებასა და სააკაშვილის რეიტინგის აწევაზე მუშაობს.

- როგორ ფიქრობთ, გამოსდის?

- ვფიქრობ, ეს შეუძლებელია. როცა ,,იმედიც' და ყველა სხვა ტელევიზიაც მათი იყო, 2012 წელს, მარცხი განიცადეს, ერთსა და იმავე მდინარეში კი ორჯერ არ შედიან. ნაციონალებს კარგად არ აქვთ გააზრებული, რატომ წააგეს არჩევნები. იმიტომ კი არა, რომ საარჩევნო კამპანიას რამე დააკლეს ან ხალხი სხვამ ,,დააბოლა', არამედ იმიტომ, რომ მოსახლეობამ ძალადობასა და კოშმარს უთხრა უარი. ეს კოშმარი არავის დაავიწყდება, თუმცა ,,ოცნებას', რა თქმა უნდა, რეიტინგი დაუვარდა. ბევრი, ვისაც ვიცნობ, ,,ოცნებისადმი' იმედით აღარაა განწყობილი, მაგრამ ეს ხალხი მხარს ნაციონალებსაც არ უჭერს.

- ასე თუ ისე, ,,რუსთავი 2' ყველაზე მძლავრ ტელევიზიად რჩება...

- ამ ეტაპზე, ,,რუსთავი 2'-ს აქვს გარკვეული სიმძლავრე, მაგრამ არსებობს კითხვები, რამდენად სწორია რეიტინგების მთვლელი კომპანია, რომელიც წლების განმავლობაში ამაზე მუშაობს. არის ეჭვები, რომ ის ,,რუსთავი 2'-ის მიმართ მიკერძოებულია. ჩემი აზრით, შეუძლებელია, ნაცმოძრაობის დროს, როცა ყველაფერი კონტროლდებოდა, ხელისუფლებას არ სცოდნოდა, ,,ფიფლმეტრები' ვისთანაა. როცა ეს იცი, გაყალბება იოლია.

- ხელისუფლება შეიცვალა და დღესაც ასეა?

- რა თქმა უნდა, ასეა, თუმცა იმის თქმა არ მინდა, რომ სხვა არხები, თუნდაც ,,იმედი' ახალ გადაცემებს არ უნდა აკეთებდეს. ჩვენს არხს ახალი გადაცემები დაემატა და რეიტინგიც უცილობლად იზრდება. მალე ყველაზე მძლავრი ტელევიზია ჩვენ გავხდებით.

- რატომ?

- იმიტომ, რომ არ ვართ პოლიტიკურად ანგაჟირებულები, არც ერთ პოლიტიკურ ძალას არ ვემხრობით და მთელი რესურსი შემოქმედებაზე მიდის. რეიტინგზე ვზრუნავთ და არა რომელიმე პოლიტიკური ძალის ხელისუფლებაში მოყვანაზე.

- სხვათა შორის, არაერთხელ ითქვა, რომ პატარკაციშვილის ოჯახს პოლიტიკაში მოსვლა სურს. რაკი შიდასამზარეულო იცით, გეცოდინებათ, ეს ჭორია თუ სიმართლე?

- გეუბნებით, არხის საინფორმაციო პოლიტიკაზე მათ ზეგავლენა არ აქვთ. რაც შეეხება პოლიტიკაში მოსვლას, მხოლოდ ის შემიძლია ვივარაუდო, რომ ხალხს საკუთარი ბიზნესი აქვს, კარგად უძღვება და პოლიტიკაში მოსვლის სიმწარეც კარგად ახსოვს, ამიტომ არ მგონია, რომელიმე მხარეს დადგომა სურდეს.

- თქვენს გადაცემებზეც ვისაუბროთ. მაგალითად, ,,შალვა რამიშვილის შოუ' რეიტინგულია?

- დიახ, ძალიან რეიტინგულია. ჩვენი წილი 30-დან 32%-მდეა ანუ საქართველოში ჩართული ტელევიზორების მესამედი ,,იმედზეა' გადართული. ეს ბოლო სეზონის მონაცემებია.

- მეჩვენება თუ თქვენს გადაცემაშიც ნაციონალებზე ხუმრობის ხვედრითი წილი ძალიან დაბალია?

- ნაციონლებზე გაცილებით ნაკლებად ვხუმრობ, რადგან მეტ მიზეზს მთავრობა იძლევა.

- ვანო ჯავახიშვილიც იგივეს აკეთებს და ვერ გავიგე, ,,ოცნებაზე' ხუმრობა მისთვის რატომ არ შეიძლება, თქვენთვის კი შეიძლება?

- ,,ვანოს შოუს' 50 ხუმრობიდან 50-ვე ხელისუფლებაზეა, ჩემთან ერთი მესამედი ნაცებზეა.

- ანუ აქ კომპლექსები, პრობლემები და ძველი ჯავრი არაფერ შუაშია?

- ვცდილობ, ამას ვებრძოლო და მგონი, გამომდის. ეს ძალიან პირადული თემაა. როცა საქმით ხარ დაკავებული, ჯავრის, ბოღმის დრო და ენერგია არ გაქვს, ამაზე აღარც ფიქრობ.

- ხელისუფლებაში ყოფნის მერე, პოლიტიკოსებთან ურთიერთობები შეგეცვალათ?

- ჩემს გადაცემაში სტუმრად ძალიან ბევრი პოლიტიკოსი მოდის. ვერ ვიტყვი, რომ ურთიერთობები რადიკალურად შეიცვალა. აღარ ვარ ჩინოვნიკი, რაც ძალიან მახარებს.

- ისე, სწორია, ჯერ იყო ჟურნალისტი, მერე ჩინოვნიკი, მერე ისევ ჟურნალისტი და ა.შ. თავისუფალი ხართ?

- სანამ ხალხი მიყურებს და აქტუალური ვარ, ამ სფეროში დავრჩები.

- ესეც ,,ფიფლმეტრებით' იზომება?

- არა მხოლოდ ამით, ურთიერთობითაც. როცა პროფესიონალი ხარ, ამას ხალხთან კონტაქტისას გრძნობ.

- პროფესიული კითხვა მაქვს - ,,აკრედიტაციის გარეშე' დღეს საჭირო აღარაა?

- რა თქმა უნდა, ასეთი გადაცემა ყოველთვის საჭიროა.

- მერე, რატომ არ აკეთებთ?

- რა ვიცი, აღარ მინდა. მაშინ ჩემი ერთ-ერთი ამოცანა სააკაშვილის მმართველობის დამთავრება იყო. როცა ეს ამოცანა შესრულდა, მუღამიც გამიქრა. ვისაც უნდა, ადგეს და გააკეთოს ეს გადაცემა, უბრალოდ, მე მუღამი აღარ მაქვს.

- არადა, ამ გადაცემას ჰქონდა ყველზე დიდი მუღამი - დახურულ კარში შესვლა აღარ გინდათ?

- გავიგე, მაგრამ აღარ მინდა. ცოტა რთულია ამაზე საუბარი, მაგრამ არა, დახურულ კარში აღარ მინდა შესვლა. სააკაშვილის რეჟიმი იყო ქვეყნის დაღუპვა, ახლა კი, ბევრი შეცდომის მიუხედავად, ქვეყნის ყოფნა- არყოფნის საკითხი არ დგას. მაშინ ეს წმინდა ჟურნალისტიკაც არ იყო, ბრძოლა იყო. საჯაროდ ვაცხადებ, ვისაც სურს, ეს გადაცემა გააკეთოს, ვჩუქნი!

- გამოდის, გადაცემა არჩევნებს შეეწირა.

- ასე გამოდის. გადაცემა იმიტომ აღარ გადის, რომ მოვიდა ხელისუფლება, რომელიც აღარ კლავს, არ ჩაგრავს.

- მოვიდა ხელისუფლება, რომელმაც შალვა გააჩინოვნიკა და მუღამი დააკარგვინა...

- გიორგი მარგველაშვილთან ყოფნისას, ბოლო 5 წლის განმავლობაში, ყველაზე ნაკლები ხელფასი მქონდა. უბრალოდ, მაინტერესებდა, როგორი იყო ხელისუფლებაში ყოფნა და როცა მივხვდი, ყველა შტერს უფლება აქვს, გეძახოს, მე გიხდი ხელფასს ბიუჯეტიდანო, იმ წუთას მივხვდი, რომ იქ ჩემი ადგილი არ არის.

- შტერი ვინ არის?

- ვგულისხმობ მოსახლეობის გარკვეულ ჯგუფს, რომელსაც ძალიან უჭირს და განსაკუთრებული აგრესია აქვს ხელისუფლებაში მყოფების მიმართ. ეს ხალხი ამბობს, ბიუჯეტიდან რომ იღებ ფულს, რომელსაც მე ვიხდი, უნდა მომემსახუროო.

- ეს ხალხი შტერი კი არა, მართალია!

- არა, შტერი არ არის. ზოგი გამწარებულია, ზოგი კი მართლა შტერია, რადგან ვერ ხვდება, ვის უნდა მიმართოს პრეტენზიებით. ხშირად ეს ადამიანები რაღაცებს დაუმსახურებლად გაბრალებენ, რაც არასწორია. ზოგადად, ყველაფერი ხელისუფლების ბრალი ვერ იქნება. ყველაზე დიდ დისკომფორტს, ბოლო რამდენიმე წლის განმავლობაში, სწორედ საჯარო პოლიტიკაში ვგრძნობდი. უსიამოვნო გრძნობაა, როცა ადამიანები რაღაცას დაუმსახურებლად გთხოვენ, როცა სამთავრობო გუნდის ნაწილი ხარ და სხვისი შეცდომებიც ავტომატურად მოგეწერება.

- ხელფასი რამდენი გქონდათ?

- ძალიან ცოტა, 3 500 ლარი, დასამალი არაფერია, ეს დეკლარაციაშიც მეწერა.

- ახლა რამდენი გაქვთ?

- გაცილებით მეტი, თუმცა დაკონკრეტების ვალდებულება არ მაქვს.

- არა, მაგრამ მაღალი ხელფასიც ამ ,,შტერი' ხალხის დამსახურებაა, რომელიც თქვენს გადაცემას უყურებს და რეიტინგს გიქმნით.

- არა, შტერები არ არიან. მოდი, დავაკონკრეტებ, რა ვიგულისხმე, ისე რომ არ გამოვიდეს, ხალხს შტერი ვუწოდე. შტერები დავუძახე მათ, ვინც გარკვეულ ადამიანებს სრულიად დაუმსახურებლად აბრალებენ გარკვეულ პრობლემებს, თორემ მოსახლეობის უმრავლესობა შტერი არც ერთ ქვეყანაში არაა, მით უმეტეს, საქართველოში.

- GDS-ზე რას ფიქრობთ და ,,20/30'-ის დაბალ რეიტინგს როგორ ხსნით?

- ამ წუთას, ეს არხი კონკურენტად არ მიმაჩნია, თუმცა განვითარების დიდი პერსპექტივა აქვს. რაც შეეხება გადაცემას, ჯერ ერთი, ყველამ არ იცოდა, რომ სტუმარი ბიძინა იქნებოდა ანუ გადაცემას პრომოუშენი აკლდა, თან ყველა გადაცემა იბადება და იზრდება. პირველ გადაცემას არ უნდა მოსთხოვო რეიტინგი, რომელიც შესაძლოა, ერთი თვის მერე ჰქონდეს. თავად გადაცემის ფორმატიც დასახვეწია. თუმცა პირველი გადაცემა იმას ეხებოდა, როგორი იქნებოდა ეს გადაცემა და როცა უფრო აქტუალურ საკითხებს შეეხებიან, დარწმუნებული ვარ, უფრო ყურებადიც იქნება. მისმა მესვეურებმა თავად თქვეს, ამ გადაცემის რეიტინგი შოუებს არ უნდა შევადაროთო და ასეცაა, ვისაც ანალიზის მოსმენა სურს, გადაცემასაც ის უყურებს.

- რიტორიკა, რომ ამ გადაცემით ყველა უნდა გადაგვამზადონ და დაგვაკვალიანონ, თქვენთვის მისაღებია?

- ამაში ცუდი რა არის? მათი დადებული ანალიზი არ მინახავს, ამიტომ ჯერ დაგვაკვალიანონ და, თუ რამე არ მოგვეწონება, კონკრეტულ საკითხებზე მერე გავაკრიტიკოთ. ყველას აქვს უფლება, კრიტიკული აზრი გამოთქვას და ვალდებულნი ვართ, უფრო სწორად, კარგი იქნება, ამ კრიტიკას გარკვეული კომპლექსებისა და წინაპირობების გარეშე მოვუსმინოთ. მერე ვიდავოთ, რაც არ მოგვეწონება. ბიძინა ივანიშვილმაც, როცა ვიღაც გააკრიტიკა, ხელაღებით არაფერი უთქვამს, მიზეზებიც განმარტა, თან მასთან კამათი მის ზოგიერთ გამონათქვამზე ყოველთვის შეიძლება.

- მაინც, რაზე შეიძლება, ეკამათოთ?

- მაგალითად, ივანიშვილს ჰგონია, რომ ერთი კონკრეტული გადაცემით ქართულ მედიაში გარდატეხას შეიტანს. ამას მთელი მოქმედებები სჭირდება, თუმცა, თუ თავად ხალხში არ მოხდა გარდატეხა და პროდუქციის ხარისხზე მოთხოვნა არ გაიზარდა, ისე არაფერი შეიცვლება. დღეს კი ტელევიზიები და ყველა სხვა მედიასაშუალებაც მოსახლეობის სარკეა.

- თუ შეფასებებში თავისუფალი ხართ, ცოტა პოლიტიკაზეც ვისაუბროთ...

- ბუნებრივია, თავისუფალი ვარ. 2012 წელს ხალხმა ხმა მისცა ,,არა მიშას' და არა - რაღაც ჭკვიანურ პროგრამებს. ამის გამო ე.წ. შემთხვევითი ხალხი მოხვდა პარლამენტში, რაც 2016 უნდა დასრულდეს.

- არჩევნებზე ხმას ვის აძლევთ?

- ამ ეტაპზე, არჩევნები რომ ჩატარდეს, ხმას ბიძინა ივანიშვილს მივცემ