,,ქართული ოცნების' პარტიისა და ფრაქციის წევრის, თამარ კორძაიას გუნდიდან გაშვების საკითხი უმრავლესობის ლიდერმა რამდენიმე დღის წინ დააყენა. მიუხედავად ამისა, რესპუბლიკელებთან მოაზრებული დეპუტატი ,,ოცნებაში' რჩება და, როგორც ჩვენთან ინტერვიუში აცხადებს, საკუთარი მოსაზრებები ფრაქციის სხდომაზე დამაჯერებლად დაიცვა. თამარ კორძაია ,,ვერსიასთან' საკუთარ და კოალიციის მინუსებზე, კოლეგების სკანდალურ განცხადებებსა და რესპუბლიკელებთან მეგობრობაზე საუბრობს.

- გოგი თოფაძემ ყურადღება კიდევ ერთხელ მიიქცია, როცა განაცხადა, რომ ,,ენჯეობი' ქვეყნიდან უნდა განიდევნოს. არასამთავრობოები გრანტიჭამიებად და გადამტრიალებლად მხოლოდ მას არ მიაჩნია. ემიჯნებით თუ არა თქვენი თანაგუნდელის განცხადებებს? 
- არასამთავრობო ორგანიზაციებისადმი ასეთი დამოკიდებულება რუსეთისა და მსგავსი ტიპის არადემოკრატიული ქვეყნებისთვისაა დამახასიათებელი. დემოკრატიული ქვეყნები კი არასამთავრობოებს არათუ აგინებენ, მათი საქმიანობის მიმართ მადლიერებასაც გამოხატავენ. არ ვამბობ, რომ არასამთავრობოები ყოველთვის მართლები არიან, მაგრამ უმეტესობა ცოდნაზე, გამოცდილებასა და დემოკრატიულ ღირებულებებზე დგას. არც საერთაშორისო არასამთავრობო ორგანიზაციები უნდა დაგვავიწყდეს, რომლებიც ჩვენს ქვეყანას ფინანსურ, ინტელექტუალურ დახმარებას უწევენ; ამიტომ დეპუტატის მხრიდან მსგავსი მსჯელობა ქვეყანას სარგებელს არ მოუტანს. თუ საქართველოში რამე დადებითი ხდება, ამაში არასამთავრობო ორგანიზაციების დიდი წილიცაა. მათზე ასე საუბარი მიანიშნებს, რომ ვიღაცის სულისკვეთება ძალიან ახლოსაა რუსეთის სულისკვეთებასთან. 

- ეს ,,ვიღაც' თქვენი კოალიციის წევრია, რომლის განცხადებით, ნატო- ში გაწევრიანება კოალიციის პრიორიტეტი არ არის. 
- 2 დღის წინ პარლამენტის თავმჯდომარე, დავით უსუფაშვილი ამ განცხადებებს კარგად გამოეხმაურა: გოგი თოფაძეს არ აქვს შესაძლებლობა, ქვეყნის პრიორიტეტი და კურსი შეცვალოს. ალბათ, როცა ამას ამბობდა, ჩემნაირ დეპუტატებზე ფიქრობდა, ვინც ევროკავშირსა და ნატო- ში ინტეგრაციისკენ მივისწრაფით. ჩვენ ბევრნი ვართ და ერთეულები ამ პოზიციას ვერ შეცვლიან. 

- სხვათა შორის, ევრაზიულ კავშირზე ჯერ ბიძინა ივანიშვილმა ისაუბრა, სამ არასამთავრობო ორგანიზაციასაც დაემუქრა, ამის შემდეგ კი იგივე განცხადებები გოგი თოფაძემ გააკეთა - ეს საინტერესო არაა? 
- კარგია, რომ ბიძინა ივანიშვილმა თავისი განცხადებები, რაც მანამდე ყველამ არასამთავრობოებზე თავდასხმად აღიქვა, დააზუსტა. როცა შეახსენეს, რომ სამივე არასამთავრობო 2012 წლამდეც სერიოზულად მუშაობდა ქვეყანაში ვითარების შესაცვლელად, მადლობაც გადაიხადა. ამის მერე მსგავსი განცხადებების გაკეთება თოფაძის მხრიდან, ინდივიდუალური დამოკიდებულებაა და არა კოალიციისა. ეს ტენდენცია არ უნდა განვითარდეს, ამიტომ მნიშვნელოვანია, ყველას დავანახოთ, რამდენს მუშაობენ არასამთავრობოები ხელისუფლების მხარდასაჭერად, თუნდაც რეფორმების კრიტიკისა და საკუთარი წინადადებების წარმოდგენის პროცესში. დიდი ბოდიში, როცა ხელისუფლებაში ხარ, ეს კრიტიკაც უნდა აიტანო. თუ არ გვინდა, გვაკრიტიკონ, ხელისუფლებაში არ უნდა მოვიდეთ.

- განსხვავებული პოზიცია ე.წ. მოსმენების ორგასაღებიან სისტემაზეც გქონდათ. 2 დღის წინ პერსონალურ მონაცემთა დაცვის ინსპექტორის ანგარიში მოვისმინეთ. ალბათ, უკვე გამოჩნდა, მუშაობს თუ არა ეს ინსტიტუტი. თქვენი შეფასება მაინტერესებს? 
- დღესაც განსხვავებული პოზიციები მაქვს. პერსონალურ მონაცემთა დაცვის ინსტიტუტი რომ ამართლებს, ცალსახაა. მას იმ სისტემას პირდაპირ არ მივაბამ, რაც პარლამენტმა მიიღო. უბრალოდ, საკანონმდებლო დონეზე, ვერ შევქმენით სისტემა, რომლის გაკონტროლების საშუალებაც ქალდანის უწყებას ექნებოდა. არსებობს ძველი ტექნიკური სისტემა, რომელსაც ინსპექტორის გვერდისავლით მოქმედება შეუძლია. ეს იყო ჩვენი წინააღმდეგობის მთელი არსიც. ეს საკითხი დღის წესრიგში ისევ დადგება, როცა შს სამინისტროს და უშიშროების სამსახური ერთმანეთისგან გაიმიჯნება. როგორც ვიცი, მთავრობაში შსს-ს რეფორმაზე მუშაობენ და იმედია, ამ საპარლამენტო მოწვევის ვადებში ყველაფერი მოესწრება. 
- ,,ოცნებისგან' განსხვავებული მოსაზრებები სხვა თემებზეც გქონიათ. რამდენიმე დღის წინ იმსჯელეს ფრაქციიდან თქვენს გაშვებაზე. ეს საკითხი მოგვარდა? 
- რა თქმა უნდა, ისევ ფრაქციისა და პარტიის წევრი ვარ. ჩემს განსხვავებულ პოზიციებზე მართლაც ისაუბრეს. საკუთარი შეხედულებები დავასაბუთე. მათი პოზიცია არ მომწონს, მათ კი - ჩემი. სხვა ტიპის საუბარი არ ყოფილა. 

- რა ფორმატში შედგა საუბარი, გითხრეს, რატომ გაქვს განსხვავებული მოსაზრებებიო? 
- არა... საუბარი ფრაქციის სხდომაზე შედგა. რა დავმალო, როცა დავით საგანელიძემ თავად თქვა, მას, როგორც უმრავლესობის ლიდერს, არ მოსწონს, როცა დეპუტატები ჩვენს პრინციპულ პოზიციებს არ ვთმობთ. როცა ფრაქცია და უმრავლესობა იღებს გადაწყვეტილებას, რომელსაც არ ვეთანხმები, ეს შეფასება მათი უფლებაა და მესმის კიდეც. საკუთარ პრინციპებს ვერ გადავლახავ და შესაძლოა, ეს ჩემი, როგორც გუნდის წევრის ნაკლია. ეს ჩემი ადამიანური გადაწყვეტილებაა. მესმის, ასეთ დროს რისკზე მივდივარ, როგორ შეაფასებენ ამას მოქალაქეები. 

- მოქალაქეები თუ საგანელიძე? 
- საგანელიძე უკვე მაფასებს და ალბათ, მომავალშიც შემაფასებს. ეს მისი გადასაწყვეტია. ამ ეტაპზე, პრობლემა არ არის, ვფიქრობ, ჩემი არგუმენტები მიიღეს. ისე, როგორც უმრავლესობის წევრს, უმრავლესობის ლიდერის შეფასება გოგი თოფაძის განცხადებებზეც მაინტერესებს. 

- მოწოდებით, განცხადებებით რესპუბლიკელი ხართ, ახლაც იყო საუბარი, ,,ოცნებიდან' რესპუბლიკელებში გადადისო. თავიდანვე რატომ აირჩიეთ ,,ოცნება' და პირდაპირ ამ პარტიაში რატომ არ შეხვედით, ან ახლა, როცა ფრაქციაზე თქვენი საკითხი დადგა, რესპუბლიკელებში გადასვლაზე არ გიფიქრიათ? 
- თინა ხიდაშელსა და დავით უსუფაშვილთან მრავალწლიანი ურთიერთობა მაქვს. თინასთან, განსაკუთრებით, რადგან, როცა ახალგაზრდა იურისტთა ასოციაციაში დავიწყე მუშაობა, თინა საია- ს თავმჯდომარე იყო. არაა გასაკვირი, რომ ზოგ საკითხზე ერთნაირი ხედვა გვაქვს. ამ პარტიის ყველა წევრთან მეგობრული ურთიერთობა მაკავშირებს, ამიტომ მათთან რომ მაიგივებენ, საამაყო უფროა. თუმცა, სხვა საკითხია მათთან ერთად ფრაქციაში ყოფნა. როცა პოლიტიკაში მოსვლა და დეპუტატობა გადავწყვიტე, ახალი დაპირებებით ახალი ძალა, ,,ოცნება' მოვიდა და მჯეროდა, იმ ყველაფერს შეცვლიდა, რისი შეცვლა მეც მინდოდა. 

- ამის ახლაც გჯერათ? 
- ამ წუთას, რეფორმა, რომელსაც იურიდიული კომიტეტი და მე ვახორციელებთ, ერთ-ერთი უმნიშვნელოვანესია, ამიტომ ნამდვილად არ მაქვს საფუძველი, ვიფიქრო, რომ რაღაცები არ კეთდება. შეიძლება რაღაცები არ მომწონს, თუნდაც კანონი ფარული მოსმენების შესახებ. 

- ალბათ, არც მოსწავლეების გამოყენებით ოპონენტებთან ბრძოლა მოგწონთ, ბავშვებისთვის ნაჩვენებ ,,ციხის კადრებს' ვგულისხმობ. ბოროტებას ასე უნდა ებრძოლო? 
- ეს ბოროტებასთან ბრძოლა კი არა, თავად იყო ბოროტება. როცა არასრულწლოვანი მიგყავს და მისთვის მავნე პროდუქციას აჩვენებ, ამაზე პასუხიც უნდა აგო! ვერ გეტყვით, რა იყო მიზანი, მაგრამ რაც უნდა ყოფილიყო, დაუშვებელია. ევროსასამართლომ საგამოფენო დარბაზი იმის გამო დასაჯა, რომ იქ გამოფენილი ზოგი ნახატი სექსუალურ სცენებს შეიცავდა, დარბაზს კი გარედან არ ჰქონდა წარწერა, რომ არასრულწლოვნები არ დაიშვებოდნენ. ჩემ შვილს წამების კადრები რომ ენახა, მასწავლებლების გარდა, პასუხს იმ დარბაზსაც მოვთხოვდი, სადაც კადრები გაუშვეს. განათლების სამინისტრომ კი ამ პროცესში ჩართული მასწავლებლების, მინიმუმ, დისციპლინური პასუხისმგებლობის საკითხი უნდა დააყენოს, თუ ეს კადრები ნამდვილად აჩვენეს. 

- ნაციონალების აქციის დარბევა, ამ კადრების გაშვება - თითქოს, ეს 21 მარტისთვის ხელისუფლების რაღაც ჯგუფის კონტრქმედებებია. ასეა? 
- 21 მარტს რა იქნება, არ ვიცი, მაგრამ რაც ზუგდიდში მოხდა, ამაზრზენი იყო: 21-ე საუკუნეში ადამიანები საკუთარი აზრის გამოსახატად კომბლებით ებრძოდნენ ერთმანეთს. 21 მარტს, იმის მიუხედავად, ვინც უნდა ჩაატაროს აქცია, შსს-მ აქციის წევრთა უსაფრთხოება უნდა დაიცვას. ევროპის კონვენცია აქციის მასშტაბისა და დამსწრეთა რაოდენობის მიხედვით არ განსაზღვრავს სახელმწიფოს ვალდებულებას, უზრუნველყოს ნებისმიერი ძალის პროტესტის უსაფრთხოება. თუმცა ზოგადად, ამ აქციის მოთხოვნა არაბუნებრივი და არასწორია. არ შეიძლება, აქციები მხოლოდ ვიღაცის, სააკაშვილისა თუ ,,ოცნების' გადადგომის მოთხოვნით ტარდებოდეს. მოთხოვნა შედეგზე უნდა იყოს ორიენტირებული და არა კონფრონტაციაზე. ნაციონალებისგან ჩვენს განსხვავებას სწორედ იმით დავამტკიცებთ, რომ მოვლენ უსაფრთხოდ, ილაპარაკებენ, გააპროტესტებენ, თუნდაც მთავრობის დაშლას მოითხოვენ და წავლენ.