კოალიცია „ქართულ ოცნებაში“ რომ ყველაფერი რიგზე ვერ იყო, შეუიარაღებელი თვალითაც ჩანდა. ბოლოს კი, სიტუაცია ისე გამწვავდა, რომ უმრავლესობის ლიდერმა, დავით საგანელიძემ თანაგუნდელ ზაქარია ქუცნაშვილს “ცხვირის წამტვრევა” უწინასწარმეტყველა. ამით შეურაცხყოფილმა ქუცნაშვილმა საგანელიძესთან პაექრობაზე მორატორიუმი გამოაცხადა, თუმცა კოალიციაში დაშვებულ შეცდომებზე საუბარს არ გაურბის.

- ბატონო ზაქრო, როგორც ვიცი, მამათქვენს იმ საბუთზე აქვს ხელი მოწერილი, რომელიც ადასტურებს, რომ საყდრისი ისტორიული მემკვიდრეობის ძეგლი არაა...

- მამას ხელი ძეგლის ისტორიულ მემკვიდრეობაზე არ მოუწერია. ის, როგორც გეოლოგი, მრავალპროფესიული კომისიის შემადგენლობაში მიიწვიეს, რომლის წევრები არქეოლოგები, ისტორიკოსები, გეოლოგები და ინჟინრები იყვნენ. ყველა მათგანს თავისი საექსპერტო შეკითხვა ჰქონდა, რომელიც ძეგლის ისტორიულ წარსულს კი არა, არამედ, იმას უკავშირდებოდა, გასული საუკუნის 80-იან წლებში გათხრილი გვირაბები ტურისტების მისაღებად რამდენად უსაფრთხო იყო. მამაჩემმა სწორედ ამ კუთხით იმუშავა. რაც შეეხება კომისიის წევრების ხელმოწერას, ეს ჩვეულებრივი ამბავია - იკრიბებიან ისტორიკოსები, გეოლოგები, ინჟინრები და დასკვნას დებენ.

- თქვენი აზრით, სამართლიანია, ხელისუფლებამ საყდრისზე ხელი რომ აღმართა?

- ხელისუფლება შეცდა, რადგან სასამართლო გადაწყვეტილებას არ დაელოდა!

- იმის თქმა გინდათ, რომ ხელისუფლებამ იჩქარა თუ დანაშაული გამიზნულად ჩაიდინა?

- ვფიქრობ, საქმე ნაჩქარევ გადაწყვეტილებასთან გვაქვს. აფეთქებამ მოსახლეობა საკმაოდ დაძაბა და გაანერვიულა. ის, რაც მოხდა, მართლაც, სამწუხაროა.

- ბატონო ზაქრო, როგორც ვიცი, „ქართულ ოცნებაში“ თავის დროზე ეკა ბესელიას რეკომენდაციით მოხვდით, მაგრამ მერე, მასთან უსიამოვნება მოგივიდათ და ივანიშვილის კარზე დამოუკიდებელი პოლიტიკური თამაში დაიწყეთ...

- „ქართულ ოცნებაში“ ჩემს მისვლას ეკა ბესელიასთან საერთო არაფერი ჰქონია. რაც შეეხება ჩვენს შორის დაპირისპირებას, ასეთ დეტალებზე არ ვსაუბრობ, თუმცა კოალიციაში ბევრი სხვადასხვა პოლიტიკური გუნდია და აზრთა სხვადასხვაობა მუდამ იყო და იქნება. ეს სამუშაო პროცესისთვის ნორმალურია.

- ვიცი, რომ დავით საგანელიძესთან დაკავშირებით მორატორიული გამოაცხადეთ, მაგრამ მაინც უნდა მითხრათ: ეს კაცი რას გერჩით?

- ვატყობ, ძალიან გინდათ, მაგრამ ვერაფერს დამაცდევინებთ - ამ თემაზე მორატორიუმი მაქვს გამოცხადებული. ამიტომ საგანელიძის მოქმედებებზე კომენტარს არ გავაკეთებ.

- ის მაინც მითხარით, კოალიციაში რას აშავებდა? როგორც ვიცი, მალე უმრავლესობის ლიდერი აღარ იქნება...

- სხვებს ჰკითხეთ, ისინი გიპასუხებენ... ჩემი პირობის დარღვევას არ ვაპირებ.

- კოალიციაში სიტუაციის ამრევად ზვიად ჯანყარაშვილი მიიჩნევა. მასთან მეგობრობდით, არა?

- ჯანყარაშვილს ორჯერ შევხვდი: პირველად საერთო მეგობრის ქორწილში ვნახე, მეორედ - პარტიის ოფისში. ასე რომ, ამ ორი შეხვედრით ამოიწურა ჩვენი ურთიერთობა, რასაც მეგობრობას ვერ დავარქმევ.

- თავიდან ბიძინა ივანიშვილის „ლუბიმჩიკი“ ბრძანდებოდით - თქვენს აზრს  ანგარიშს უწევდა, მაგრამ დღეს ამბობენ, რომ ყოფილ პრემიერთანაც დაძაბული ურთიერთობა გაქვთ. ახალი წლის ღამეს კონფლიქტი ივანიშვილის დაცვასთან მოგსვლიათ. მართალია?

- ყველაფერი ეს ჭორია, მის დაცვასთან უთანხმოება არ მქონია, ყველაფერი ნორმალურ კალაპოტშია... ამ კუთხით სანერვიულო არაფერია!

- ასეა თუ ისე, ფაქტია, რომ კოალიციაში ისეთი გავლენა აღარ გაქვთ, როგორიც ადრე გქონდათ...

- მოდით, მე დაგისვამთ შეკითხვას: თქვენთვის თანამდებობა უფრო მნიშვნელოვანია თუ ავტორიტეტი?

- რა თქმა უნდა, - ავტორიტეტი!

- თქვენს აზრს ვიზიარებ.

- ისე, ბატონო ზაქრო, ყველაფერი რომ წესრიგში ყოფილიყო, ფრაქცია „ქართული ოცნების“ თავმჯდომარეობას არ დატოვებდით...

- მაშინდელ პრემიერ-მინისტრს, ბატონ ბიძინა ივანიშვილს კაცური სიტყვა მივეცი, რომ ის, რაც 2013 წლის 16 ნოემბერს მოხდა, ჩვენს შორის დარჩებოდა. ჩვენი პირობის შემსწრე, მინიმუმ, 50 კაცია. თუ დავით საგანელიძემ ეს თემა გარეთ გამოიტანა, ჩემს და ბიძინა ივანიშვილის წინაშე პასუხისმგებელია.

- გამოდის, რომ თქვენს შორის კონფლიქტი დიდი ხნის წინ დაიწყო...

- კონფლიქტების ისტორიკოსი არ გახლავართ, პროფესიით იურისტი ვარ, მსურს, რომ ქვეყანა კანონებით, კონსტიტუციით იმართებოდეს და არა - გაუგებრობებით.

- ასეთივე პრეცედენტი გია ვოლსკისთანაც გქონდათ?

- იყო მცდელობა, რომ ჯოხი გიაზე გადატეხილიყო, მაგრამ არ გამოუვიდათ. გადაწყვეტილებების მიღება პოსტ ფაქტუმ არ შეიძლება. აი, მაგალითად, როცა ბიძინა ივანიშვილი პრემიერი იყო, გააზრებულად მოქმედებდა. ვიდრე გადაწყვეტილებას მივიღებდით, პარლამენტის წევრები ვიკრიბებოდით, ვმსჯელობდით, ვკამათობდით და მერე, გადაწყვეტილება იბადებოდა. ახლა კი, პირიქით ხდება.

- ნინო გვენეტაძის კანდიდატურის მიმართ არსებულ დაძაბულობას გულისხმობთ?

- დიახ, ნუთუ, გასამართლებელია ის ფაქტი, რომ დეპუტატებთან უზენაესი სასამართლოს თავმჯდომარის კანდიდატურის კრიტერიუმები არავის შეუთანხმებია? პრობლემის წყარო და სათავე ის ხალხია, რომელიც არაკორდინირებულად და შეუთანხმებლად იქცევა. როცა პარლამენტში დეპუტატები გადაწყვეტილებას განხილვის გარეშე, შეუთანხმებლად იღებენ, ეს დემოკრატია არაა!

- ნინო გვენეტაძეს 10 შეკითხვა გადაუგზავნეთ. თუ მისი პასუხები დაგაკმაყოფილებთ, მხარს დაუჭერთ?

- წინასწარ ვერაფერს გეტყვით, ნინო გვენეტაძის სასამართლო პრაქტიკაში არის ისეთი მომენტები, რომლებიც მის მიუკერძოებლობას ეჭვქვეშ აყენებს. ამიტომ, ჯერ მის პასუხებს მოვისმენ და გადაწყვეტილების შესახებ შემდგომში მოგახსენებთ.

- ისე, საზოგადოებას გვენეტაძის დანიშვნაზე მეტად სხვა პრობლემები აწუხებს, მათ შორის, „ქართული ოცნების“ შეუსრულებელი დაპირებები.

- მაინც, რომელი დაპირება გაქვთ მხედველობაში?

- ბოლო დროს უმუშევრობა კიდევ უფრო თვალშისაცემი გახდა. პენსიონერებს პირდებოდით, რომ ღირსეული ცხოვრების პირობებს შეუქმნიდით...

- ჩვენს საპროგრამო დაპირებაში წერია, რომ „ქართული ოცნების“ ხელისუფლებაში ყოფნის დროს, პენსია საარსებო მინიმუმის შესაბამისი იქნება. პენსია ჯერ 150 ლარი გავხადეთ, მალე 10 ლარი დაემატება. სხვა თემაა, რამდენად საკმარისია 160 ლარი, თუმცა 10 ლარით პენსიის ზრდა ხარჯების 84 მილიონით გაზრდას ნიშნავს, რაც ცოტა თანხა არაა.

რაც შეეხება უმუშევრობას და გაჭირვებას, ეს ჩვენი ერთ-ერთი მთავარი გამოწვევაა, ის, ვინც ფიქრობს, რომ ამ ეკონომიკით უმუშევრობის დამარცხება შესაძლებელია, თავს იტყუებს. ამიტომ ვცდილობთ, მაქსიმალურად სამართლიანად გადავანაწილოთ ის მცირე რესურსი, რაც ჩვენს ეკონომიკას აქვს. ჩვენს გუნდს მრავალწლიანი შრომა მოგვიწევს, რომ ძლიერი ქართული ეკონომიკა შევქმნათ.

- არჩევნებამდე ხალხს ეკონომიკის გაძლიერებას, ქარხნების გახსნას, სოციალური პრობლემების მოგვარებას ჰპირდებოდით. გამოდის, რომ ეს დაპირებები ფუჭი იყო...

- ხალხს ვპირდებოდით, რომ ეკონომიკას თავისუფლებას მივცემდით და ამის საფუძველი უკვე შევქმენით, მაგრამ მშენებლობა ჯერ არაა დასრულებული, ამას დრო სჭირდება. ქართული ეკონომიკის გამოსწორებას 6-8 წელიწადში შევძლებთ და, რაც მთავარია, თუ სიღარიბეს დავამარცხებთ, ეს დიდი პროგრესი იქნება. ყველაფერ ამის გაკეთება 1-2 წელში შეუძლებელია და ეს ყველამ იცის.

მოსახლეობას ცრუ მოლოდინი არ უნდა გავუჩინოთ. 4-5 წელი არსებული მდგომარეობიდან გამოსასვლელად საკმარისი არაა, მაგრამ გარკვეულ გარდატეხას აუცილებლად შევიტანთ.

- ბატონო ზაქრო, თქვენი აზრით, კოალიციის ყველაზე დიდი შეცდომა რა არის? ოპოზიციაში რომ იყოთ, ხელისუფლებას რის გამო გააკრიტიკებდით?

- ჩვენი შეცდომა იმაში მდგომარეობს, რომ სამართლიანობის დამკვიდრების საქმეში ბევრი დრო დავკარგეთ, თუმცა მე და ჩემი რამდენიმე მეგობარი პრინციპულად ვამბობდით, რომ ამ საქმეში მოცდას გამართლება არ ჰქონდა. დასანანია ის დრო, რომელიც ამ მოცდენაში დაიკარგა. ალბათ, გახსოვთ: ფორმებს ვეძებდით, თუ როგორ უნდა აღგვედგინა სამართლიანობა, თუმცა მერე გაბატონდა აზრი, რომ ამ თემის რეგულაციისგან თავი საერთოდ შეგვეკავებინა. საზოგადოება სწორია, როცა ამ საკითხზე უკმაყოფილებას გამოთქვამს, რადგან სამართლიანობის აღდგენა ჩვენი ერთ-ერთი მთავარი დაპირება იყო...