ქართულ პოლიტიკაში მოვლენები ისე ვითარდება, მძაფრსიუჟეტიანი ბლოკპასტერი გეგონებათ: გარდა იმისა, რომ ევროსაბჭომ “სამართლებრივი რეკომენდაციები” მოგვცა, ერთი კვირის წინ, პეკინის ქუჩაზე ნამდვილი “მეორედ მოსვლის” მომსწრენი გავხვდით - “თავისუფალი თაობისა” და “თავისუფალი ზონის” წევრებმა ერთმანეთს წყლით სავსე პრეზერვატივები და ცოცხები ესროლეს. უშიშროების თადარიგის პოლკოვნიკი, უსაფრთხოების ექსპერტი კონსტანტინე ფორჩხიძე “ქართული სიტყვის” ექსკლუზიური ინტერვიუების ციკლში ზემოხსენებულ მოვლენებს აფასებს და ეჭვობს, რომ ვიღაც პოლიტიკური პროცესების ქუჩაში გადატანასა და, მინიმუმ, სამოქალაქო დაპირისპირების ინსპირირებას ცდილობს. ფორჩხიძის ვერსიითვე, ეს “ვიღაც” “ნაცმოძრაობა” და მასთან დაახლოებული სამოქალაქო სექტორია. გარდა ამისა, ქართველი სპეცსამსახურელი აქცენტს იმ ახალ სქემაზეც აკეთებს, რომლითაც ყოფილი ხელისუფლებისთვის განკუთვნილი “ქეში” ფული საქართველოში შემოდის. კონსტანტინე ფორჩხიძე, ოპერატიულ ინფორმაციაზე დაყრდნობით, “ნაციონალებისა” და ჩეჩენი ბოევიკების კავშირზეც საუბრობს და ამბობს, რომ მიხეილ სააკაშვილის დაცვის ყოფილმა უფროსმა, გოგი თათუხაშვილმა აწ განსვენებულ რუსლან გილაევის დასთან, რომელიც ევროპაშია, კომუნიკაცია დაამყარა.   

- ბატონო კონსტანტინე, ბევრი ექსპერტი, თქვენი არ იყოს, მიიჩნევს, რომ ე.წ. ორი “თავისუფლების” დაპირისპირებით ვიღაც პროცესების ქუჩაში გადატანას მიზანმიმართულად ცდილობს. ზოგი კი, უფრო დრამატულ პარალელსაც ავლებს და ამბობს, რომ 90-იანი წლების სამოქალაქო დაპირისპირებაც სწორედ ახალგაზრდების კინკლაობით დაიწყო. ლოგიკასთან, ალბათ, ისიც ახლოსაა, რომ ყველაფერი ზემოხსენებული ფინანსების მოზიდვას ემსახურება, მით უმეტეს, სოციალურ ქსელში ითქვა, რომ “თავისუფალი ზონა” ერთ-ერთი უცხოური ფონდიდან თითქოს რამდენიმემილიონიან გრანტს ელოდება...

- საერთოდ, მილიონიან გრატს არავინ იძლევა... წინა ინტერვიუშიც ვთქვი, რომ ეს პროცესები მართულია და მასში ორი მხარე მონაწილეობს. ყოველ შემთხვევაში, მეორე მხარე შეიძლება, სრულად არა, მაგრამ მისი გავლენიანი წრეები აუცილებლად მონაწილეობენ.

- ამ შემთხვევაში, “მეორე მხარე” რომელია?

- “თავისუფალი თაობა”... სპეცსამსახურების მუშაობის სქემა, როგორც ადრეც გითხარით, ასეთია: სიტუაცია რომ დაძაბო, მოწინააღმდეგე მხარეს მეკავშირე უნდა გყავდეს. თავის დროზე სააკაშვილი სწორედ ამ სქემით მუშაობდა და დღესაც ამას აკეთებს. ეს სააკაშვილის ხელწერაა.

- არავინ მალავს, რომ “თავისუფალი ზონის” უკან “ნაცმოძრაობა” დგას: გარდა იმისა, რომ ამ ორგანიზაციას კობა ხაბაზი ხელმძღვანელობს, “ზონელები” ამბობენ, ჩვენი ორგანიზაცია, თავისი შინაარსით, პოლიტიკური კლუბია, რომელიც მხარს ყოფილ ხელისუფლებას უჭერსო...

- ყველაფერს თავი რომ დავანებოთ, კანონით, არასამთავრობო ორგანიზაციის პარტიულ ოფისში განთავსება აკრძალულია, თუმცა ამაზე წაყრუებულია და ხელისუფლება შესაბამის ზომებს არ იღებს...

- “თავისუფალი თაობის” უკან, თქვენი მონაცემებით, ვინ დგას?

- ყველაზე ვერ ვიტყვი, მაგრამ იქ ერთი-ორი ისეთი ტიპაჟია, ვინც პროვოკაციულ მომენტებში ადრე, “ნაციონალების” დროსაც იყო შემჩნეული, რასაც მაშინდელი ხელისუფლება სათავისოდ იყენებდა.

- ვერ ვხვდები, საუბარი საითკენ მიგყავთ...

- ეს ერთი-ორი ტიპი მაშინ ოპოზიციაში იყო და მათ მიერ მოწყობილი პროვოკაცია ყოველთვის ხელისუფლების გამარჯვებით მთავრდებოდა, ანუ ხელისუფლებაში მყოფ “ნაცმოძრაობას” პოლიტიკურ ველში დესტრუქციის შემოტანა სჭირდებოდა, რასაც ამ ტიპების ხელით აკეთებდა. ეს ძველი სქემა დღესაც მოქმედებს, ეგაა ოღონდ: “ნაცმოძრაობა” ახლა ოპოზიციაშია და ამ სქემას უკვე ხელისუფლების საწინააღმდეგოდ ამუშავებს...

- ყველაფერ ამის მიზანი რა არის?

- რა და, - პროცესების ქუჩაში გადატანა.

- ვთქვათ, პროცესები ქუჩაში გადავიდა, მერე?

- მერე, არასტაბილურობისა და დესტრუქციული ქმედების ელემენტებიც გაჩნდება, რასაც უმართავი პროცესები მოჰყვება. ყველაფერი ეს კი, ადრეც მითქვამს და ახლაც ვიმეორებ, რომ მხოლოდ “ნაცმოძრაობას” აწყობს... რასაკვირველია, დანამდვილებით ვერ ვიტყვი, მაგრამ საქმე, შეიძლება, სამოქალაქო დაპირისპირებამდეც მივიდეს.

- სამოქალაქო დაპირისპირებაზე ლაპარაკი, ვფიქრობ, გადაჭარბებულია...

- რატომ? თუკი “ნაცმოძრაობის” წარმომადგენლებს ქუჩაში დევნა და ცემა-ტყეპა დაუწყეს, ეს წყალს ყოფილი ხელისუფლების წისქვილზე დაასხამს და ისე გამოვა, რომ “ნაციონალები” თითქოს დაჩაგრულები არიან. “ნაცმოძრაობა” შეეცდება, ამით საზოგადოების განწყობაში გარდატეხა შეიტანოს და საზოგადოების გარკვეული ნაწილი დაჩაგრულის, ანუ თავის მხარდასაჭერად განაწყოს.

- “ნაციონალები” ხელს ხელისუფლებისკენ იშვერენ. მართალია, “ოცნება” ბრალდებას უარყოფს, მაგრამ მთავრობის წევრები “თავისუფალ ზონას” გაუგებარ და დესტრუქციულ არასამთავრობო ორგანიზაციად მიიჩნევენ...

- და ეს ტყულია? დიახ, ვეთანხმები პრემიერ ღარიბაშვილს, რომ “თავისუფალი ზონის” ყველა ქმედება დესტრუქცივიზმთანაა დაკავშირებული. გავიხსენოთ, ყველაფერი როგორ დაიწყო.

- როგორ?

- ჟურნალისტის ცემით, თუმცა “თავისუფალი ზონის” მხრიდან მანამდეც იყო პატარ-პატარა ქმედებები, რომლებიც სხვადასხვა არასამთავრობოს, მაგალითად, “ერეკლე მეორის საზოგადოების” საქმიანობასთან უნისონში მოდიოდა. ყოველ შემთხვევაში, “ზონისა” და პრორუსული ორგანიზაციების აქტივობა დროში ყოველთვის ერთმანეთს ემთხვევა და ესეც შეთანხმებული მოქმედებაა.

რაც შეეხება ჟურნალისტის ცემას, გავრცელებული ინფორმაციით, მას თავს 12-მდე ახალგაზრდა დაესხა და ფიზიკური შეურაცხყოფა მიაყენა, ეს, რა თქმა უნდა, მედიაზე თავდასხმაა და აქაც მართალია პრემიერი, როცა ამბობს, რომ მედიამ სოლიდარობა არ გამოიჩინა. სხვა თუ არაფერი, “ჟურნალისტთა ეთიკის ქარტია” არსებობს და როცა ჟურნალისტზე თავდასხმა ხდება, მინიმუმ, განცხადება უნდა გააკეთოს და გამოძიება მოითხოვოს. სხვათა შორის, ისიც გათვლილი იყო, რომ ჟურნალისტის ცემას გარკვეული ადამიანების აგრესია მოჰყვებოდა...

- ნებისმიერ ჩემს კოლეგაზე განხორციელებულ ძალადობას ვგმობ, მაგრამ ხელისუფლებას არ შეეძლო, რომ ყველაფერი ეს აღეკვეთა?

- ხელისუფლებას ყველა ბერკეტი აქვს, რომ მხოლოდ “თავისუფალი ზონის” კი არა, “თავისუფალი თაობის” არაკანონიერი ქმედებებიც აღკვეთოს, მაგრამ როგორც ჩანს, ამ ორგანიზაციებთან მიმართებაში სიტუაციას ბოლომდე ვერ მართავს. ეს კი იმას ნიშნავს, რომ სპეცსამსახურების მიერ შესაბამისი ოპერატიული ღონისძიებები არ ტარდება.

- ბატონო კონსტანტინე, “ოცნების” ხელისუფლებაში მოსვლიდან ორი წელი გავიდა და ამ ხნის განმავლობაში გვესმის, “ნაციონალები” საბოტაჟს აწყობენ, კრიმინოგენულ ვითარებას ძაბავენ, გვისმენენ და გვითვალთვალებენო. ამასობაში, ევროსაბჭო საქართველოსადმი მკაცრ რეზოლუციას იღებს. მართალია, “ოცნებელები” ამბობენ, რომ ამ რეზოლუციაში საგანგაშო არაფერია, მაგრამ ფაქტია: “ნაციონალებმა” თავისას საერთაშორისო ასპარეზზეც მიაღწიეს. სხვათა შორის, “ქართული სიტყვის” ექსკლუზიური ინტერვიუების ციკლში, ჯერ კიდევ ორი თვის წინ განაცხადეთ, რომ თუკი ევროსაბჭო ანალოგიურ რეზოლუციას მიიღებდა, აქ რუსული ინტერესები უნდა დაგვენახა, რადგან ევროსაბჭოში რუსული ლობი ძლიერია... მოკლედ, თუკი “ნაციონალები” სიტუაციას ქვეყნის შიგნითაც მართავენ და გარეთაც, გამოდის, რომ ხელისუფლებაში ისევ ისინი არიან, არა?

- ის, რაც ევროსაბჭოში მოხდა, ხელისუფლების უმოქმედებაზე მეტყველებს, თუმცა აქვე, მინდა, ევროსაბჭოს ის რეზოლუციაც გავიხსენო, რომელიც “ნაციონალების” ხელისუფლებაში ყოფნის დროსაა მიღებული და რომელშიც წერია, რომ ხელისუფლებას 7 ნოემბრისა და 26 მაისის მოვლენები უნდა გამოეძიებინა. ამასთან, გირგვლიანის საქმეზე შესაბამისი გადაწყვეტილება დამდგარიყო. სწორედ ესაა ორმაგი სტანდარტი: როცა ხელისუფლებაში ხარ და ევროსაბჭოს რეკომენდაციებს არ ითვალისწინებ, შენს მერე მოსულ ხელისუფლებას კი, რეკომენდაციების შესრულებისკენ მოუწოდებ. არადა, “ოცნება” სწორედ ევროსაბჭოს ძველი რეზოლუციის შესაბამისად მოქმედებს - 7 ნოემბრისა და 26 მაისის გამოძიება დაიწყო და ყოფილი მაღალჩინოსანი “ნაციონალების” დაპატიმრება სწორედ ამ გამოძიების შედეგია...

- ევროსაბჭოს ახალ რეზოლუციაში იმაზეა საუბარი, რომ არ შეიძლება, მაგალითად, ბაჩანა ახალაია ამდენი ხანი წინასწარ პატიმრობაში იყოს...

- ბაჩო ახალაია თავდაცვის მინისტრი 2009 წელსაც იყო. არაერთხელ მითქვამს, რომ 2009 წლის ოქტომბერში, თავდაცვის სამინისტროდან ოფშორში, კერძოდ, სეიშელის კუნძულებზე რეგისტრირებულ უკრაინულ “ბელტრეიდინგს”, ტანკების შესაძენად, 57 ათასი გრინვის შესაბამისი ლარი გადაერიცხა, მაგრამ ეს ტანკები საქართველოში არ შემოსულა, ანუ ფული დაიკარგა და ახალაიას ბრალს ამაზე რატომ არ უყენებენ?

- რაკი შეკითხვას სვამთ, სავარაუდო პასუხიც გექნებათ...

- ამ საქმეზე ახალაიას ბრალს, ალბათ, იმიტომ არ უყენებენ, რომ პროკურატურაზე, გავლენაა.

- ვისი?

- “ნაცმოძრაობის”. არც იმას გამოვრიცხავ, რომ პოლიტიკური ნება არ არსებობს, რათა ახალაიას ბრალი მძიმე დანაშაულში წაუყენონ. შეიძლება, ობივატელმა თქვას, წამებაც მძიმე დანაშაულიაო, მაგრამ როგორც ვიცი, ჯარისკაცების წამებაში სასამართლომ ახალაია გაამართლა და მეც სწორედ ამაზე ვლაპარაკობ - როცა თავდაცვის სამინისტროდან ჰაერში გამოკიდებულ 57 მილიონს დაგიდებენ, პასუხს სახელმწიფო სახსრების არამიზნობრივად ხარჯვაზე აგებ. ბაჩო ახალაიას ეს ბრალი რომ წაუყენონ, მაშინ 2004-დან 2012 წლამდე ყველა დოკუმენტი უნდა მოიძინონ და აღმოჩნდება, რომ ყველა, ვინც თავდაცვის უწყებას ამ პერიოდში ხელმძღვანელობდა, დასაჭერია და ციხეს ვერც სააკაშვილი გადაურჩება.

- ბატონო კოტე, ვერ დავიჯერებ, რომ ვინმე სააკაშვილს ხელს აფარებს, მით უმეტეს, იმ ფონზე, როცა ექსპრეზიდენტის წინააღმდეგ საქმეა აღძრული და ქონებაც დაუყადაღეს...

- “ქართული ოცნების” ერთ-ერთმა მაღალჩინოსანმა, რომელთანაც პირადი კომუნიკაცია მქონდა, პირდაპირ განმიცხადა, სააკაშვილი რომ დავიჭიროთ, ევროპა რას იტყვისო.

- ევროპამ სააკაშვილისა და მისი ოჯახის წევრების ქონების დაყადაღება უკვე გააპროტესტა...

- ასი წელი, სააკაშვილის დამცველი არ ვარ, მაგრამ ბებიამისის ქონება, მართლაც, არ უნდა დაეყადაღებინათ. ეს შეიძლება, არაპროფესიონალიზმის ბრალია, ან უნდოდათ, რომ ამით სააკაშვილზე ზეწოლა მოეხდინათ...

რამდენიმე თვეა, ვლაპარაკობ, ვანო, ამერიკული დოკუმენტები თქვენც გაჩვენეთ, სადაც მიხეილ სააკაშვილის, როგორც მაშინდელი მთავარსარდლის დანაშაული ცხადად ჩანს, მაგრამ ბრალი შედარებით მსუბუქ დანაშაულზე, ალბათ, იმიტომ წაუყენეს, რომ თავის დაცვა გაუადვილდეს, თორემ პროკურატურის, ან შსს მაღალჩინოსანი რომ ვყოფილიყავი, სააკაშვილს ბრალს სწორედ მძიმე დანაშაულში წავუყენებდი...

- და ეს მძიმე დანაშაული იარაღის უკანონო ბიზნესია?

- არა მხოლოდ...

- რა ამის პასუხია და, თინა ხიდაშელმა, რომელიც ევროსაბჭოს სხდომას არ ესწრებოდა, თუ არ ვცდები, განაცხადა, ამ რეზოლუციის მიღება ორჯერ გადავადებინე და არ მეგონა, ევროსაბჭო ოქტომბრის სესიაზე თუ მიიღებდაო.

- ისე, საინტერესოა, ხიდაშელი ამ სხდომას რატომ არ ესწრებოდა...

- ეკა ბესელიამ კი თქვა, ევროსაბჭომ ეს რეზოლუცია იმიტომ მიიღო, რომ სხდომას “ევროპის სახალხო პარტიის” ბევრი დეპუტატი ესწრებოდაო...

- ეს სასაცილო არგუმენტია... საერთოდ, პარტიულ კუთვნილებას, ამ შემთხვევაში, მნიშვნელობა არ აქვს.

- აბა, ისევ ლობსა და ფულთან მივდივართ?

- დიახ, ლობი მუშაობს. ასევე, საქმე იმ ძველ კავშირებთანაც გვაქვს, რომელიც “ნაცმოძრაობას” თავის დროზე ჰქონდა.

- “ძველ კავშირებში” კორუფციულ გარიგებებს გულისხმობთ?

- დიახ, კორუფციულ გარიგებებსაც.

- სხვათა შორის, თავის დროზე, ყოფილმა პრემიერმა განაცხადა, რომ უშიშროების საბჭოდან, გიგა ბოკერიას ხელმძღვანელობით, უცხოელ ლობისტებს სერიოზული თანხა ერიცხებოდათ. ამის გამო ბოკერია, მგონი, პროკურატურაშიც დაიბარეს, თუმცა არავინ იცის, ამ საქმეს რა ბედი ეწია...

- პირდაპირ ვასახელებ იმ კომპანიას, სადაც ლობისტებისთვის ფული ირიცხებოდა. ეს კომპანია “ორიონ სტრატეჯი”, რომელიც იარაღის უკანონო ბიზნესშიც ფიგურირებს და რომელიც “ნაციონალებისთვის” სხვადასხვა ლობისტურ კომპანიას ქირაობდა...

- ბატონო კოტე, “ოცნება”, თქვენი აზრით, დასავლეთში ლობისტების მომსახურებით რატომ არ სარგებლობს?

- ეს მე კი არა, “ოცნებას” უნდა ჰკითხოთ. ისე, ვიცი, რომ ლობისტები “ოცნებასაც” ჰყავს, თუმცა გააჩნია, ამ ლობისტებთან ვინ მუშაობს. მართალია, კოალიციაში ექვსი პარტიაა, მაგრამ პარტია “ქართული ოცნების” ინტერესიც არსებობს და, მე რომ პრემიერი ვიყო, ლობისტებთან ურთიერთობაში ძირითადად პარტია “ქართული ოცნების” “ტიპებს” ჩავრთავდი.

- კოტე ბატონო, მოდით, ისევ პოლიტიკაში ფულის ტრიალს დავუბრუნდეთ. სხვათა შორის, ე.წ. ბაქოს ინციდენტიც მიყუჩდა...

- აზერბაიჯანიდან საქართველოში ამხელა თანხის შემოტანის მცდელობა იყო და ამ საქმეზე ქართველი სამართალდამცავები არ უნდა მუშაობდნენ?

- პირად საუბარში იმ სქემაზე მითხარით, რომლითაც დღეს “ნაციონალებს” ქვეყანაში ფული შემოაქვთ...

- ეს პირველადი ინფორმაციაა.

- “პირველადი ინფორმაცია” რას ნიშნავს?

- გადამოწმებული არაა, მაგრამ საუბარია “ქეში” ფულის საჰაერო გზით შემოტანაზე.

- ანუ?

- ამ სქემაში, როგორც მითხრეს, ქართული ავიაკომპანიების ეკიპაჟები, კერძოდ, პილოტები არიან ჩართულები. არაფერს ვამტკიცებ, მაგრამ ვიმეორებ, ასეთი პირველადი ინფორმაცია არსებობს, რომელიც შესაბამისმა ორგანოებმა უნდა შეისწავლონ... არ მინდა, ვინმემ ჰომოფობიად ჩამითვალოს, მაგრამ ამ სქემაში, თურმე, არაქართველი პილოტები მონაწილეობენ.

- ფული რომელი ქვეყნიდან შემოდის?

- იმ ქვეყნებიდან, სადაც ქართული ავიაკომპანიები დაფრინავენ.

- მაინც?

- ევროპის ქვეყნების გარდა, ლაპარაკია არაბეთსა და სხვა მესამე ქვეყნებზეც.

- ეს ფული ვისია?

- ვისი და, - “ნაცმოძრაობის” იმ “ყულაბების”, რომლებმაც ფული თავის დროზე შვეიცარიის ბანკებში შეინახეს.

- ეს “ყულაბები” ვინ არიან?

- კეზერაშვილები... სააკაშვილის ნათესავები...

- ამ სქემაში თემურ ალასანიაცაა ჩართული?

- არ ვიცი, მაგრამ გამორიცხული არაა...

- თბილისის აეროპორტიდან “ქეში” ფული რა მიმართულებით მოძრაობს?

- ახლა, ისეთ რამეს მეკითხებით, თითქოს, მაპატიეთ და, “ნარუშკაზე ვზივარ” და ყველაფერი თავიდან ბოლომდე ვიცი. უბრალოდ, მომაწოდეს ინფორმაცია, რომ ეს ფულის შემოტანის ერთ-ერთი გზაა და ამას იმიტომ ვახმოვანებ, რომ სამართალდამცავმა უწყებებმა პრევენცია მოახდინონ. საერთოდ, ეს სპეციფიკური თემაა, რომელიც შესაბამისმა სამსახურმა უნდა გამოავლინოს.

- თქვენი ინფორმაციით, ეს ფული რაში იხარჯება?

- ხალხის მობილიზაცია-შენახვაზე.

- რომელი ხალხის?

- ვინმემ დაითვალა, “ნაცმოძრაობის” ხელისუფლებიდან წასვლის დღიდან, რამდენი არასამთავრობო ორგანიზაცია შეიქმნა? “ნაციონალების” თითქმის ყველა ყოფილი კოორდინატორი სწორედ ამ არასამთავრობოებშია დასაქმებული და ათას ლარზე ნაკლები ხელფასი ერთსაც არ აქვს!

- არასამთავრობოები, როგორც წესი, გრანტებით ცხოვრობენ...

- გასაგებია, მაგრამ გრანტი ასე არ გაიცემა, მით უმეტეს, ახლადდაარსებულ ორგანიზაციებზე...

- ჩვენი კანონმდებლობით, არც ე.წ. ენჯეოს შექმნა იკრძალება...

- თუკი არასამთავრობო პარტიულ საქმიანობაშია ჩართული და მისი თანხების აკუმულირება პარტიული მიზნებით ხდება, ეს პოლიტიკური პარტიის არაპირდაპირი დაფინანსებაა, რაც კანონით აკრძალულია. ყველაფერ ამის შესწავლაში, სამართალდამცავ უწყებებთან ერთად, სახელმწიფო აუდიტის სამსახურიც უნდა ჩაერთოს...

- თუკი არასამთავრობოების ფინანსებით კონტროლის პალატა დაინტერესდება, ამას დიდი აჟიოტაჟი მოჰყვება და ოპოზიცია “ოცნებას” არადემოკრატიულობაში დაადანაშაულებს. სხვათა შორის, როგორც მახსოვს, თავის დროზე “ენჯეოების” ფინანსური მონიტორინგი რუსეთისა და, მგონი, ბელორუსის ხელისუფლებამაც განახორციელა...

- აქ საუბარი იმ არასამთავრობოთა შემოწმებაზეა, რომლებიც პროცესების ქუჩაში გადატანას დესტრუქციული ელემენტებით ცდილობენ, თორემ “ენ-დი-აი”-სა თუ სხვა პროფესიული ორგანიზაციების შემოწმებაზე არაფერს ვამბობ.

- არასამთავრობოს დარეგისტრირება რთული პროცედურაა?

- არა, საამისოდ მიზერული თანხა, კრების ოქმი და ანგარიშის გახსნაა საჭირო.

- თქვენი გათვლით, “ნაციონალთა” ყულაბაში, ზემოხსენებული სქემით, ყოველთვიურად რა თანხა შედის?

- თითო შემოტანაზე, ალბათ, მილიონ დოლარამდე შემოაქვთ. სხვათა შორის, საჰაეროს გარდა, ფულის შემოტანა, საზღვაო გზითაც შეიძლება.

- საერთოდ, ფულის ასეთი გზებით მოძრაობა აპრობირებულია?

- დიახ. 90-იან წლებში რუსეთიდან ფული სწორედ ამ გზებით შემოდიოდა, თუმცა მაშინ ლაპარაკი დიდ თანხაზე არ ყოფილა. ასევე, თავის დროზე არსებობდა ინფორმაცია, რომ რუსეთიდან ფული არაკონტროლირებადი ტერიტორიებიდან და საპატრიარქოს საშუალებითაც შემოდიოდა. გამორიცხული არაა, რომ ფული კერძო პირებმაც შემოიტანონ...

- ბატონო კონსტანტინე, გამორიცხავთ, რომ საპროტესტო აქციები “ნაცმოძრაობის” ისეთი ოდიოზური ლიდერების სახლებთანაც გაიმართოს, როგორიც, მაგალითად, გივი თარგამაძეა?

- გამორიცხული არაფერია და ეს შეიძლება, თავად მათ ინტერესშიც შედიოდეს.

- მაგალითად, გივი თარგამაძეს რატომ უდა აწყობდეს, რომ სახლთან აქციები მოუწყონ?

- ამით შეიძლება, პოლიტიკური დევნილის სტატუსი მიიღონ, საქართველოდან საერთოდ გაქრნენ და ის ფულიც შერჩეთ, რაც ბიუჯეტიდან მიითვისეს. ეს “ნაცმოძრაობის” საერთაშორისო პიარზე დამატებით იმუშავებს, ამასთან, პარტიის გარკვეული რებრენდინგიც მოხდება.

- ერთი სიტყვით, ეჭვობთ, რომ ქვეყანა სამოქალაქო დაპირისპირების ზღვარზეა?

- დიახ. რაც ბოლო დღეებში ვნახეთ, რა, სამოქალაქო დაპირისპირება არ არის? სხვათა შორის, “ვარდების რევოლუციის” წინ, მოვლენები სწორედ ასე ვითარდებოდა - გაიხსენეთ ბოლნისში მომხდარი შეტაკება...

- მოგვიანებით გაირკვა, რომ მაშინდელი უშიშროება, პირდაპირ თუ ირიბად, სააკაშვილსა და მის გუნდს ხელს უწყობდა...

- პირდაპირ გეტყვით: მაშინდელი უშიშროება ნებისმიერ ინფორმაციას ბლოკავდა და პრეზიდენტ ედუარდ შევარდნაძეს არ აწვდიდა. ეს ასპროცენტიანი ინფორმაციაა, რომელიც უშიშროების საბჭოს იმდროინდელი მაღალჩინოსნისგან მაქვს.

- უშვებთ, რომ სპეცსამსახურები ინფორმაციებს დღესაც ბლოკავდნენ?

- არ ვიცი... შეიძლება, სპეცსამსახურში ერთგული ადამიანები გყავს, მაგრამ ინფორმაციის დაბლოკვა ნებისმიერ დონეზე შეიძლება, მაგალითად, ინფორმაცია შეიძლება, განყოფილების უფროსმაც დაბლოკოს და ამისგან დაცული არავინაა.

- სოციალური ქსელების ეპოქაში ინფორმაციის დაბლოკვა, ალბათ, შეუძლებელია...

- ლეგალიზებულ კი არა, ოპერატიული ინფორმაციის დაბლოკვაზე ვლაპარაკობ.

- ბატონო კოსტანტინე, “ქართული სიტყვის” წინა ნომერში ვაჰაბიზმზე, უფრო კონკრეტულად, რელიგიურ პროვოკაციაზე საუბრობდით... ცალკეულ წრეებში აინტერესებთ, ეს ინფორმაციები საიდან მოგაქვთ?

- დავდგე და ვილაპარაკო, ინფორმაციები საიდან მომაქვს? თუ ვინმეს ჰგონია, რომ ქუჩაში გაგდებულ ოპერატიულ მუშაკს ოპერატიული მუშაობა დაავიწყდა და აღარც ოპერატიული წყაროები ჰყავს, ძალიან ცდება! იმას, რაც მისწავლია, ვერავინ წამართმევს და ვიცი, ინფორმაცია სად, როგორ და რანაირად მოვიპოვო. საიმედოობა, სისრულე, დროულობა და მიკუთვნებულობა - აი, ძირითადი კრიტერიუმები, რასაც ინფორმაცია უნდა აკმაყოფილებდეს.

- მიკუთვნებულობა რას ნიშნავს?

- რას და, - ინფორმაცია სახელმწიფოებრივი მნიშვნელობისაა თუ არა.

სხვათა შორის, ჩემმა ოპერატიულმა წყაროებმა კიდევ ერთი პირველადი ინფორმაცია მომაწოდეს, რომლის თანახმადაც, მიხეილ სააკაშვილის დაცვის ყოფილმა უფროსმა, გოგი თათუხაშვილმა ურთიერთობა რუსლან გილაევის დასთან დაამყარა. ეს ის რუსლან გილაევია, რომელიც 90-იანი წლების ბოლოს, პანკისიდან კოდორის ხეობაში ჩეჩენი მებრძოლების რაზმის გადაადგილებას ხელმძღვანელობდა და ამის შესახებ წინა ნომრებში ვრცლად ვისაუბრე. როგორც მითხრეს, გილაევის და უცხოეთში საკმაოდ გავლენიანია. ამასთან, ვიცი, რომ ჩეჩნურ დიასპორის ერთ-ერთი გავლენიანი ფიგურაა.

- თათუხაშვილისა და გილაევის დის შეხვედრის მიზანი, თქვენი ინფორმაციით, რა არის?

- მიზანი, ალბათ, მალე გამოჩნდება, მაგრამ “ნაციონალებისგან” ასეთი კატეგორიის ხალხთან ურთიერთობის დამყარება უკვე ბევრ რამეზე მიანიშნებს. ყოველ შემთხვევაში, ეს ოპერატიულად საყურადღებო ინფორმაციაა.

- საყურადღებო რატომაა?

- ეს “ტიპები” ტერორისტებად აღიქმებიან და ურთიერთობა, შეიძლება, სირიელ ამბოხებულებთან  ჰქონდეთ და პანკისის ხეობაშიც. მოკლედ, ამ ინფორმაციაზე ოპერატიული მეთვალყურეობის დაწესება აუცილებელია.

- ბატონო კონსტანტინე, პროცესების ქუჩაში გადატანის მცდელობა და თათუხაშვილის მიერ გილაევის დასთან კომუნიკაციის დამყარება ერთმანეთთან კავშირშია?

- შეიძლება, ეს კომუნიკაციაც ფინანსების შემოტანას უკავშირდება.

- ანუ?

- ვიცით, რომ პანკისის ხეობა ჩეჩნურ დიასპორასთანაა დაკავშირებული...

- იმის თქმა გინდათ, რომ ე.წ. ნაციონალური ფული საქართველოში პანკისის გავლით შემოვიდეს?

- დიახ... ეს ტიპები შეიძლება, აზერბაიჯანშიც გამოიყენონ, მით უმეტეს, რომ აზერბაიჯანიდან ფულის შემოტანის ერთი მაგალითი უკვე არსებობს, თან ჩეჩნური დიასპორა, როგორც ვიცი, აზერბაიჯანშიცაა. არც ისაა გამორიცხული, რომ ყველაფერ ამის უკან სხვა რამე იდგეს...

- სხვა კიდევ რა?

- მაგალითად, საქართველოში ჩეჩენი ტერორისტები გამოჩნდნენ და “ნაციონალებმა” ამის საერთაშორისო ასპარეზზე გაპიარება დაიწყონ, აი, “ოცნება” ტერორისტებს ინახავსო...

- ესე იგი, საქმე ისევ დიდ “ნაციონალურ” პროვოკაციასთან გვაქვს?

- ყოველ შემთხვევაში, ყველაფერი ეს ერთმანეთთან კავშირშია!