შეხვდება თუ არა პრემიერ-მინისტრი არასამთავრობო ორგანიზაციებს, ეს საკითხი პრემიერთან კონსულტაციების შემდეგ გადაწყდება. მთავრობის ადმინისტრაციის უფროსის მოადგილე ნინო კობახიძე განმარტავს, რომ არასამთავრობო სექტორს არაერთხელ გამოუთქვამს პრემიერთან შეხვედრის სურვილი და თუ შესაძლებელი იქნება, ბუნებრივია, ეს შეხვედრა შედგება, თუმცა მანამდე კონსულტაციები უნდა გავმართოთ.

პრემიერისა და არასამთავრობო სექტორის შეხვედრის შესახებ საუბარი აქტუალური, თავად პრემიერის მხრიდან გაკეთებული განცხადების შემდეგ გახდა, რაც ირაკლი ღარიბაშვილმა არასამთვრობო სექტორის მისამართით კრიტიკული განცხადებები გააკეთა. პრემიერის თქმით, არასამთავრობო სექტორის მუშაობაში ტენდენციურობას ამჩნევს და აღნიშნა, რომ ვერ გაურჩევიათ, სად გადის ობიექტურობის ზღვარი.

„არ მსურს, რომ გავაკრიტიკო სამოქალაქო სექტორი, მაგრამ ერთ მაგალითს გეტყვით. რამდენიმე კვირის წინ, საქართველოში ევროკავშირიდან ჩამოსულიყო იყო ერთ-ერთი მაღალი თანამდებობის პირი, რომელმაც პირად საუბარში მითხრა, რომ შეხვედრა ჰქონდა წამყვან არასამთავრობო ორგანიზაციების წარმომადგენლებთან და დარჩა გაოცებული, რადგან უთხრეს, რომ ისინი ემხრობიან მთავარ ოპოზიციურ ძალას, რადგან ის დღითიდღე სუსტება. მთავარი არგუმენტაცია იყო, რომ სუსტის დაცვა სურთ.

ეს აბსოლუტურად დამახინჯებული მიდგომაა. ეს ადამიანი იყო გაოცებული, რადგან ფიქრობს, რომ როცა წამყვან არასამთავრობოებს აქვთ ასეთი მიდგომა, ეს ძალიან დიდ სირთულეზე მიუთითებს. მან უთხრა ორგანიზაციების წარმომადგენლებს, რომ არც ერთ მხარეს არ უნდა გადაიხაროს არასამთავრობო სექტორი. არც მთავრობისკენ, არც ოპოზიციისკენ, რომ ეს არის ძალიან დიდი შეცდომა. ტენდენციურობა არ უნდა იყოს გამოკვეთილი. ხშირად ვერ გაურჩევიათ, სად გადის ობიექტურობის ზღვარი. ამ ზღვარის დადგენაა არასამთავრობო სექტორის მთავარი გამოწვევა“, - განაცხადა ირაკლი ღარიბაშვილმა. 

პრემიერი ამბობს, რომ ობიექტური კრიტიკისთვის მზად არის, რადგან გაძლიერებაში ეხმარება, თუმცა უსამართლო კრიტიკას ვერ მიიღებს.

„თუ ვიღაც სუბიექტურად მაკრიტიკებს იმის გამო, რომ სხვა პოლიტიკური ძალის ინტერესები გამოხატოს, ესაა უსამართლობა და ამ კრიტიკას არ მივიღებ. აუცილებელია მთავრობას, სამოქალაქო სექტორსა და მედიას შორის აქტიური კომუნიკაცია, რათა ხარვეზებზე დაუფარავად საუბარი გაიმართოს. თუ გვინდა, თანამედროვე და ძლიერი სახელმწიფო ავაშენოთ, არ უნდა მოვერიდოთ ერთმანეთის კრიტიკას“, - აღნიშნა ირაკლი ღარიბაშვილმა. 

არასამთავრობო სექტორის მიმართ პრემიერ-მინისტრის კრიტიკას უსაფუძვლოს და არალოგიკურს უწოდებენ თავად არასამთავრობო ორგანიზაციის წევრები. „საერთაშორისო გამჭვირვალობა საქართველოს“ აღმასრულებელი დირექტორი ეკა გიგაური ამბობს, რომ პრემიერმა არასამთავრობო სექტორის მიმართ ასეთი მიდგომა უნდა დაასრულოს, ვინაიდან ეს არაა დამახასიათებელი დემოკრატიული ლიდერისთვის. მისი თქმით, პრემიერ-მინისტრის მხრიდან უკვე ტრადიციად იქცა, თავს დაესხას იმ ადამიანებს, რომლებსაც განსხვავებული პოზიცია აქვთ სხვადასხვა საკითხთან მიმართებაში.

რაც შეეხება ევროკავშირის მაღალი რანგის თანამდებობის პირს, რომლის პოზიციაც ღარიბაშვილმა არგუმენტად მოიყვანა, გიგაუარი ამბობს, რომ ღარიბაშვილი შტეფან ფულეს და მასთან გამართულ შეხვედრას გულისხმობდა. 

„ასოცირების შესახებ ხელშეკრულების რატიფიკაციასთან დაკავშირებით ჩამოსული იყო შტეფან ფულე, რომელიც არასამთავრობო სექტორის წარმომადგენლებს პარლამენტში შეხვდა. ამ შეხვედრაზე „ნაციონალური მოძრაობა“ ნახსენები არ ყოფილა. საუბარი შედგა იმაზე, რომ ოპოზიცია არის სუსტი და ძალიან მნიშვნელოვანია, რომ არასამთავრობო სექტორი, მოქალაქეები იყვნენ აქტიური, რომ მთავრობის ანგარიშვალდებულება და გამჭვირვალობა გაიზარდოს. პარტიის მხარდაჭერასა და დახმარებაზე საუბარი არ ყოფილა“, - აცხადებს ეკა გიგაური.

საარჩევნო და პოლიტიკური კვლევის ცენტრის დირექტორი კახა კახიშვილი თვლის, რომ პრემიერ-მინისტრი შესაძლოა მიიჩნევდეს, რომ რომელიმე არასამთავრობო ორგანიზაციის მიერ გაკეთებული განცხადება არაობიექტურია, ან არ ასახავს რეალობას, თუმცა, კახიშვილი თვლის, რომ „ხელისუფლებაში მყოფი პირების ამოცანაა ზუტად ის, რომ მიიღონ გადაწყვეტილებები და თუ რამე შენიშვნა აქვთ, ეს უნდა გადაწყდეს კომუნიკაციის ფარგლებში“.

„თუ პრემიერ-მინისტრი მიიჩნევს, რომ არასწორად მიმდინარეობს არასამთავრობო ორგანიზაციების მუშაობა, ამისთვის დისკუსიების ფორმატი არსებობს, სადაც არასამთავრობო ორგანიზაციებს ექნებათ საშუალება, პრემიერს ის კითხვები დაუსვან, რომელსაც მას უსვამენ დისტანციურად და თუ მას მიაჩნია, რომ კითხვები არ არის ობიექტური, მას ექნება საშუალება გასცეს კითხვებზე პასუხი და მანაც დაუსვას კითხვები არასამთავრობო სექტორს.

როცა ცოცხალი დისკუსიაა, ბევრი რამ ხდება ნათელი. ცუდს ვერაფერს ვერ ვხედავ იმაში, რომ ორივე მხარემ, ერთმანეთს კითხვები დაუსვან. მთავარია, ამ კითხვების დასმის პროცესით არ დასრულდეს ყველაფერი. ბუნებრივია, რომ ძალიან ბევრი არასამთავრობო ორგანიზაციაა და შესაძლებელია, რომ განცხადებების ნაწილი არასწორედ იქნებს მიჩნეული მთავრობის მხრიდან. დემოკრატიის თვისება და ღირებულება ის არის, რომ პოლემიკა უნდა იყოს აუცილებლად. თუ საქართველოს პრემიერ-მინისტრი თვლის, რომ არასამთვრობოს რაღაცა ნაწილის განცხადება არის მიკერძოებული, ამაში დიდ საფრთხეს ვერ ვხედავ. მთავარია შედგეს შეხვედრა“, - აცხადებს for.ge-სთან საუბრისას კახი კახიშვილი.

პოლიტოლოგ რამაზ საყვარელიძის განცხადებით, ყველაფერში არსენა ოძელაშვილობა არ გამოდგება. მისივე განცხადებით, თუ კი არასამთავრობო სექტორს შეხვედრაზე არ უსაუბრია, რომ მთავარ ოპოზიციურ ძალას ემხრობიან იმიტომ, რომ დღითიდღე სუსტება მათი პოზიცები, ეს არაა არგუმენტი.

„არასამთავრობოები იძახიან, რომ არ გვითქვია ასეო, მაშინ როგორ თქვეს? ფორმულა - ვინც სუსტია იმის მხარეს ვდგები, სადაა აქ სამართლიანობა? სამართლიანობას არ უწევ ანგარიშსს და ანგარიშსს უწევ მხოლოდ იმას, რომ სუსტია? ეს არასწორად მინაჩნია. ამ შემთხვევაში ვერ ვიქნები არასამთავრობო ორგანიზაციების მხარეზე, ისევე როგორც პრემიერის მხარეზე. მე როგორც ადამიანს მაქვს რაღაცა პოზიცია და ჩემი პოზიციის ერთგული ვარ.

სააკაშვილის მიმართ კრიტიკული ვიყავი მაშინ, როდესაც მისი მრჩეველი ვიყავი და კრიტიკული ვარ დღესაც. მარტო იმიტომ, რომ დღეს თურმე დაჩაგრულია, ამიტომ პოზიცია შევცვალე და „ნაციონალური მოძრაობის“ დაცვა დავიწყო, ეს იქნება სწორი სტრატეგია? რა თქმა უნდა, არა. მკვლელი თუ დაიჭირეს, იმის გამო რომ ცოდვაა, მკვლელის მხარეს დადგები? თუ ეს პრინციპი აიღე, რომ ვინც გასაჭირშია იმის მხარეს დადგები, ეს არაა ობიექტურობა. ყველაფერში და მითუმეტეს სინდის-ნამუსთან არსენა ოძელაშვილობა გამოდგება, ეს არაა სწორი პოზიცია“, - აცხადებს for.ge-სთან საუბრისას რამაზ საყვარელიძე.

პოლიტოლოგი სოსო ცინცაძე თვლის, რომ ღარიბაშვილი იმეორებს ივანიშვილის აზრს. მისი თქმით, ევროპაში და აშშ-ი არასამთავრობოების გავლენა ესმით და სწორედ ამიტომ ისმენენ პოზიციას. მისი თქმით, საქართველოში არასამთავრობო სექტორი პოლიტიზირებულია.

„სააკაშვილის დროს ჯაფარიძე იყო არასამთავრობოში, ხომ დამტკიცდა ჯაფარიძის და სხვების მაგალითზე, რომ პოლიტიზირებული იყვნენ. როდესაც არასამთვრობა შედის პარლამენტში, ეს უკვე არის თვითლუსტრაცია. მაგათ დაამტკიცეს, რომ არასოდეს არ ყოფილან ობიექტურები. ობიექტურები რომ ყოფილიყვნენ, მაშინ ვერც მთავრობაში და ვერც პარლამენტში ვერ მოხვდებოდნენ. ესენი არასამთავრობო კი არა პოლიტიკოსები იყვნენ არასამთავრობოს ნიღბით“, - აღნიშნა for.ge-სტან საუბრისას სოსო ცინცაძემ.