“გაზაფხული ძალიან მალე მოვა. ჩვენ არ ვაყენებთ კონკრეტულ ვადებს. ჩვენ არ შეგვიძლია ბუნებრივი პროცესების დაჩქარება, ან შენელება. არ ვაპირებთ ქულების ჩაწერას შოუებით და პოპულისტური განცხადებებით. გვინდა ავაშენოთ სააკაშვილის ხელისუფლების ანტივარიანტი და თუ ხელისუფლება მოკლე დროში ზნეს არ შეიცვლის, სააკაშვილი მიიღებს იმას, რასაც დიქტატორულ რეჟიმებს უკეთებენ”, - აცხადებს “ქართული პარტიის” ერთ-ერთი ლიდერი ეროსი კიწმარიშვილი.

ბატონო ეროსი, ბოლო დროს ხშირად ლაპარაკობთ რევოლუციაზე. შემთხვევით, მოთხოვნილებად ხომ არ გექცათ რევოლუცია?

- არასდროს ვყოფილვარ რევოლუციის მომხრე და ის, რაც ხდება, არაა რევოლუციის სურვილით ნაკარნახევი. ხალხი ჩამოშორებულია მართვას, გვაქვს ავტორიტარული რეჟიმი და არის უმძიმესი სოციალური კრიზისი - ეს განსაზღვრავს უმწვავეს კრიზისს, რომლიდანაც, როგორც პოლიტიკური ძალა, ვცდილობთ გამოსავლის მოძებნას. თუ მოკლე პერიოდში რეჟიმი არ შეიცვლის ზნეს, თუ არ მიხვდა, რომ ხალხს მისცეს ის, რისი უზურპაციაც მოახდინა - თავისუფალი სასამართლო, არჩევანი, თავისუფალი აზრის გამოთქმა, ბიზნესის თავისუფლად წარმოება - სააკაშვილი მიიღებს იმას, რასაც ხალხი ყოველთვის უკეთებს დიქტატორულ თუ ავტორიტარულ რეჟიმებს, ხელში აიღებს მმართველობას და გადასცემს იმას, ვისგანაც ელოდება ქვეყნის სწორი მიმართულებით წაყვანას. საზოგადოების მოთმინება დროშია ლიმიტირებული და ეს ცვლილებები ხელისუფლებამ მოკლე ვადაში უნდა განახორციელოს.

რვა წელია, ეს ხელისუფლება ზნეს არ იცვლის და გჯერათ, რომ რამდენიმე თვეში გახდება ადექვატური?

- უკაცრავად, მაგრამ რეჟიმს ამასობაში მოუწია დათმობებზე წასვლა - 2007 წელს გადადგა სააკაშვილი და, ფაქტობრივად, ამის შედეგი იყო ის აბსურდი, რაც 2008 წელს ჩაიდინა. ჩვენ, როგორც პასუხისმგებლობის მქონე ძალა, ვამბობთ, რომ დრო შეზღუდულია და ადექვატურობას მოვითხოვთ სწრაფად. რაც შეეხება რევოლუციური პროცესების განვითარებას, მას  განსაზღვრავს ხალხი, მაგრამ ნებისმიერ შედეგზე პასუხისმგებელია ხელისუფლება.

თქვენი პასუხისმგებლობა რაში მდგომარეობს? იმაში, რომ ამბობთ, “ქართული პარტია” მზადაა, პროცესებზე პასუხისმგებლობა აიღოს, თუ ხალხი ხელისუფლების შეცვლას ამბოხის და რევოლუციის გზით გადაწყვეტსო?

- ჩვენ პასუხისმგებელი ვიქნებით ქვეყნის კრიზისიდან გამოყვანაში. ოპონენტები ცდილობენ, ჩვენგან გარკვეული ნეგატიური ხატის შექმნან, ჩავთვალოთ, ეს მათი პიარმცდელობაა. სინამდვილეში, ჩვენ გვინდა, ხალხს ვუთხრათ, რომ ჩვენ ვართ ის პოლიტიკური ძალა, რომელიც ხვალინდელ დღეზე იქნება პასუხისმგებელი. ძალიან გვინდა, რომ პროცესი წავიდეს ევოლუციურად. ყველაფერი გვაქვს, რომ ნებისმიერი ოპონენტი საარჩევნო მოედანზე დავამარცხოთ - ცოდნა, გამოცდილება, სახეები. შესაძლებლობაც გვაქვს საიმისოდ, რომ ერთკაციან პარტიებს კი არა, ნებისმიერ ოპონენტს და ნებისმიერ გამოწვევას ვუპასუხოთ და ელექტორალური ეფექტი იქნება ბევრად უკეთესი.

თქვით, ხალხი გაბრაზებულია და მოახდენს რევოლუციასო. სად ხედავთ გაბრაზებულ ხალხს, როცა ხელისუფლების შემოთავაზებები, კერძოდ, ვაუჩერები აბედნიერებს, ხმას არც კომუნალური გადასახადების, არც პროდუქტისა და არც საწვავის ფასების მომატებაზე იღებს. თქვენ თუ ხართ გაბრაზებული, იმას არ ნიშნავს, რომ ერი მზადაა რევოლუციური ცვლილებებისთვის...

- ანალოგიური სიტუაცია იყო 2007 წელს, როცა ხმა ამოიღეს უსამართლობის წინააღმდეგ. მაშინაც ამბობდნენ, ოპოზიცია სუსტია, ხალხი მას არ გაჰყვება, არ გაბრაზდებაო, მაგრამ ხალხი არ გადასულა მოთმინების რეჟიმში, როგორც კი ირაკლი ოქრუაშვილმა გააკეთა განცხადება, წარმოიქმნა უზარმაზარი ცუნამის ტალღა, რომელმაც სააკაშვილი აიძულა, გადამდგარიყო და რომ არა ამ პროცესში ბევრი ინსტიტუტის მონაწილეობა, ყველაფერი რეჟიმის დამთავრებით დასრულდებოდა. სააკაშვილი, როგორც რეჟიმი, ჩამოყალიბდა 2008 წლის შემდგომ, ანუ საპრეზიდენტო არჩევნების უკანონო შედეგის დაფიქსირებიდან. ჩვენ საქმე გვაქვს რეჟიმთან, რომელმაც თავისი მოქმედება დაასრულა სამხედრო პოლიტიკური ავანტიურით - რუსეთთან ომით, რის შემდეგაც, საბოლოოდ, დაკარგა ნებისმიერი ფორმით უფლება, წარმოადგენდეს საქართველოს.

ისევ უნდა ველოდოთ “ცუნამს” ირაკლი ოქრუაშვილისგან?

- უნდა ველოდოთ ცუნამს არა მარტო ირაკლი ოქრუაშვილისგან, არამედ, იმ განწყობისგან, რომელსაც ქართველი ხალხი შიგნით ატარებს. ხშირად კითხულობენ, მძღოლების აქციაზე რატომ არ გამოვიდა მთელი საქართველოო. ასეა, გენერალიზებულ კრიზისს და დაავადებას პატარ-პატარა სიმპტომები ახასიათებს. შეიძლება, ერთ კონკრეტულ სიმპტომზე ადამიანმა არ მიმართოს ექიმს, მაგრამ როცა რაღაც პროცესი, ან ტკივილი აუტანელი ხდება, შესაბამისი რეაქციები წარმოიქმნება. როდესაც დევნილებს გაურკვეველი მიმართულებით ერეკებოდნენ ცივ ზამთარში, ეს იმ ხალხის უზარმაზარი ტრაგედია იყო, მაგრამ არა - მთელი ქართული საზოგადოების, ეს არ იყო საკმარისი იმსათვის, რომ გენერალიზებულ საპროტესტო განწყობად ჩამოყალიბებულიყო. ჩვენთვის არაა თვითმიზანი სამოქალაქო დაპირისპირება და ამ გზით ხელისუფლების შეცვლა. “ქართული პარტია” აერთიანებს ისეთ ადამიანებს, რომელთაც შეუძლიათ ქვეყნის მართვა, როგორც წარმატებული ეკონომიკური პროექტების განხორციელების, ისე, ადამიანის უფლებების დაცვის სფეროში.

ძალიან თავდაჯერებული ხართ, ბატონო ეროსი...

- რატომ? ჩვენ ვართ ის ადამიანები, რომლებსაც ეს გაგვიკეთებია და გაგვივლია. თქვენ თუ ჩამომითვლით რომელიმე პოლიტიკურ ძალას, რომელშიც ამაზე დიდი გამოცდილებისა და ცნობადობის ლიდერების ერთობლიობაა, მაშინ ვიკამათოთ ამ თემაზე, მაგრამ მაპატიეთ, მითხარით “ნაცმოძრაობის” სიის პირველი ათეული, ჩვენი ათეული ჩამოვთვალოთ და თითეული სფეროს წარმატებულობაზე მერე ვილაპარაკოთ. ჩვენ შევცვლით ამ რეჟიმს და გავიმარჯვებთ ამ არჩევნებში. ეს სხვა ძალებთან კოალიციის გზით გამარჯვება იქნება თუ ინდივიდუალური, ამაზე დღეს არც ვფიქრობთ. მთავარია, რომ ჩვენ ეს შეგვიძლია და ამას მოვახერხებთ. ჩვენ არც არჩევნების გვეშინია. დღეს ჩვენ ვხედავთ, რომ ხელისუფლება არის ყრუ, ბრმა და მიიღებს იმას, რასაც იმსახურებს.

რატომ ფიქრობთ, რომ მაინცდამაინც თქვენი პარტია იქნება პოლიტიკური პროცესების განმსაზღვრელი?

- ზუსტად იმიტომ, რომ ეს არის უნიკალური პროექტი - განსხვავებული წარსულის და მსოფლმხედველობის ადამიანებმა გვერდზე გადავწიეთ და გამოვიტანეთ დასკვნები წარსული შეცდომებიდან, რომლებიც თითეულ ჩვენგანს ჰქონდა დაშვებული და ძალები გავაერთიანეთ. ირაკლის, ლევანს, სოზარს, თქვენს მონა-მორჩილს შეგვეძლო, საკუთარი პარტიები დაგვეარსებინა და პოლიტიკური პროცესები მეტ-ნაკლებად წარმატებული გვქონოდა. ჩვენ უნდა მოვძებნოთ, კოლეგებთან ერთად, ფორმატი, როდესაც ერთ მოედანზე ძირითად საკითხებზე უნდა შევთანხმდეთ. როცა ხელისუფლებაში მოვალთ, ჩვენ პასუხისმგებლობას ავიღებთ მომავალზე, იმაზე, რასაც ქვეყნის მართვა და წარმატებულ ქვეყნად ჩამოყალიბება ჰქვია. რასაც ჰქვია მედიის, ბიზნესის, სასამართლოს და ა.შ. თავისუფლება. და როგორ ავაშენებთ წარმატებულ ქვეყანას, ამას გაჩვენებთ. რაც შეეხება ხვალინდელ დღეს, ეს იქნება ცვლილება არჩევნებისა თუ სახალხო ამბოხის გზით, ამაზე პასუხისმგებელი იქნება ხელისუფლება. ჩვენ ავაშენებთ ღირსეულ ქვეყანას, რაც დაიმსახურა ჩვენმა ხალხმა და შევიყვანთ ამ ქვეყანას იმ თანამეგობრობაში, რასაც ევროპული  ორიენტაცია ჰქვია და რისკენაც მიისწრაფვის ქართველი კაცი. მგონი, მაქვს ხალხთან მისვლისა და ლაპარაკის უფლება. ეროსი კიწმარიშვილი პრინციპული იყო იმ დროს, როდესაც ძალზე ძნელი იყო იმის თქმა, რაც მან თქვა. არ იყო გაბატონებული იდეა, რომ ომი ამ კაცმა დაიწყო და სწორედ ქართველები ვიყავით იმის ინიციატორები, რომლის გამო ომში აღმოვჩნდით.

და ამიტომაც შეგრაცხეს მტრად და რუსეთუმედ...

- მე არ მეშინია პროპაგანდის. მშვიდ სიტუაციაში იყო ვაჟკაცი, ეს ადვილია. სააკაშვილი კაბინეტში დიდი ვაჟკაცია, მაგრამ გორში, როცა თვითმფრინავი დაინახა, თავქუდმოგლეჯილი გარბოდა. მიუხედავად იმისა, რომ ჩემთვის ძალიან მძიმე იყო იმის თქმა, რაც ქართული საზოგადოებისთვის არ იყო ადვილი მოსასმენი, ვუთხარი ის, რასაც ვფიქრობდი. როგორ, ხვალ ვერ მოვახერხებ ამ ღირსების შენარჩუნებით მივიდე აფხაზებსა და ოსებთან და დაველაპარაკო? მე მაქვს ამის უფლება, არასოდეს ვმდგარვარ მათთან ბრძოლის ავანგარდში. საკამათოა ის, რომ რუსეთთან ურთიერთობა უნდა დარეგულირდეს? ვის, თუ არა ლევანს შეუძლია, რომ ქართული ღვინო და ბიზნესი დადგეს ღირსეულ სიმაღლეზე. ვის, თუ არა სოზარ სუბარს შეუძლია, ადამიანის უფლებების დაცვა, ვის თუ არა, ეროსი კიწმარიშვილს შეუძლია უზრუნველყოს სიტყვის თავისუფლება, რომელმაც შექმნა თავისუფლების მაშინდელი მთავარი ინდიკატორი, “რუსთავი-2”-ის სახით...

წეღან თქვით, შეცდომა ყველას გვქონდაო. ისეთი შთაბეჭდილება მრჩება, სააკაშვილის გაშვებით თქვენი შეცდომის გამოსწორება გინდათ...

- შევთანხმდეთ, რომ ჩვენ, ქართველმა ხალხმა ავირჩიეთ სააკაშვილი, სააკაშვილი მე არ ამირჩევია, რევოლუცია მე არ მომიწყვია, მისი მონაწილე ვიყავით ყველა ჩვენთაგანი. რევოლუცია მოხდა ზუსტად იმის გამო, რომ იმ მომენტში არაადეკვატური იყო ის ხელისუფალი.

ერთი პარტიის ლიდერი ყველაფერში კონკრეტულად თქვენ გდებთ ბრალს, ეროსიმ მომიყვანა მიშაო...

- ვიცი, ბატონ შალვას ბევრჯერ აქვს ეს ნათქვამი და ძალიან განვიცდი მის დამსხვრეულ ილუზიებს, მაგრამ ეს არ იყო ჩემი მიზეზით, ეს იყო საზოგადოებრივი შეკვეთა, რომელიც შალვამ ვერ გაიგო, როცა უნდა გაეგო - ნოემბერში ისიც იქ უნდა მდგარიყო, სადაც ქართველი ხალხი იდგა. ბევრი შეცდომა დამიშვია, მაგრამ ადამიანმა შენსა და სხვის შეცდომებზე უნდა ისწავლო და ეცადო, ისინი გამოასწორო. ჩვენ ვლაპარაკობთ იმაზე, როგორ ამოვიყვანოთ ქვეყანა ორმოდან და ერთი ვიცით, რომ ამ რეჟიმის გაგრძელება შეუძლებელია.

დარწმუნებული ხართ, რომ ხალხი გამოგყვებათ?

- სრულიად დარწმუნებული ვართ, რომ საარჩევნო კამპანიის პირობებში ჩვენ გვექნება ხალხისთვის მისაღები ზუსტი შეთავაზებები, რომელსაც გაჰყვება. ჩვენს კოლეგებს, “პოლიტიკურ რვიანს” მარტივ შეთავაზებას ვუკეთებთ: სად არის ის ვადები, რომლის შესრულების შემთხვევაშიც, ისინი ჩათვლიან, რომ წარმატებულია მათი პროექტი? თუ იქნება ეს ვადები, მივესალმებით. ჩვენი შეთავაზება იყო თავისუფალი მედია, ბიზნესი, სასამართლო და საარჩევნო გარემოს არსებობა. ამ ყველაფრის ფინალი უნდა იყოს თავისუფალი არჩევნები. თუ ეს ყველაფერი არ სრულდება და გაურკვეველი ვადით არის გადაწეული, მაშინ რა აზრი აქვს? როცა ამ თემებს ხელისუფლება არ ითვალისწინებს, ის უკვე უზურპატორი ხდება. ჩვენ რაზე ველაპარაკებით ისეთ ხელისუფლებას, რომელმაც კონსტიტუცია შეცვალა ისე, რომ არავის არაფერი ჰკითხა, უზურპაცია გაუკეთა სამოქალაქო თავისუფლებებს? მასთან რომ დავჯდეთ და დრო ვკარგოთ, ეს უპერსპექტივო მეჩვენება. ძალიან მოკლე ვადაში ჩვენ დავიწყებთ ამ რეჟიმის ისეთი ტიპის პრესინგს, რომლისგანაც ეს პატივცემული გვამები და რეჟიმი იძულებული გახდება ან უზრუნველყოს ის, რაც გასაკეთებელია, ან მოელის იგივე ბედი, რაც მიიღეს არაბულმა ქვეყნებმა. ჩვენ არ გვინდა ვიყოთ უზენაესი ჭეშმარიტება, არიან ადამიანები და კოლეგები, რომელთაც ჩვენგან განსხვავებული ხედვები აქვთ და მზად ვართ, ამ მიმართულებით მათთან ვითანამშრომლოთ ყოველგვარი ანტაგონიზმის გარეშე. ეს რეჟიმი ჯერჯერობით არ არის ადეკვატური და ყოველი დღე მას საარჩევნო თუ არასაარჩევნო გარდაცვალებასთან აახლოვებს.

თუმცა, ამერიკასა და ევროპაში ჯერჯერობით არიან სააკაშვილის მხარდამჭერი ძალები, აგერ, რამდენიმე დღის წინ, დონალდ ტრამპმა მას მსოფლიო კერპიც კი უწოდა...

- ტრამპზე სერიოზულად ლაპარაკი არ შეიძლება. ამერიკაში მიცხოვრია და ტრამპის მიმართ ამერიკული საზოგადოების დამოკიდებულება ვიცი. ეს არ არის სერიოზული პოლიტიკოსი, რომლის მიმართაც არსებობს სიმპატიები. ის ერთი ამერიკელი საქმოსანია, რომელიც თავის სახელს ჰყიდის. ჩემი ინფორმაციით, ამ ადამიანს ფული გადაუხადეს იმაში, რაც თქვა. ტრამპისგან განსხვავებით, ამერიკის მთავრობასა და ევროკავშირს ფულს ვერ გადაუხდი, რომ შენზე კარგი ილაპარაკონ. მუბარაქი სააკაშვილზე ბევრად დიდი, მნიშვნელოვანი და სტრატეგიული მეგობარი იყო ამერიკის, მაგრამ მას ზურგი აქციეს იმიტომ, რომ ხალხის წინააღმდეგ წავიდა. ხალხშია ლეგიტიმაცია. ჩვენი გადასაწყვეტია, ვინ იქნება ჩვენი ხელისუფალი. კი, მნიშვნელოვანია, როგორი ურთიერთობა გვექნება რუსეთთან, ევროპასა და ამერიკასთან, მაგრამ პრინციპულია, რომ ქართველმა ხალხმა გადაწყვიტოს, ვინ იქნება მისი ხელისუფალი და როგორ იცხოვროს.

გარდა იმისა, რომ “ქვეყანა შეჭამეთ, ბევრი ფული გაქვთ და აღარ იცით სად წაიღოთ”, ოპონენტები იმასაც ამბობენ, რომ “ვარდების ხელისუფლების” მოწყობის სანაცვლოდ, თქვენ სავაჭრო პალატის თავმჯდომარე გახდით, შემდეგ კი ელჩობა მიიღეთ.  რას ელით მომავალი რევოლუციისგან, თუ მოხდა, რასაკვირველია...

- ვაი, თქვენს პატრონს, უბედურს-თქო, ასე გადაეცით, ვინც ამას ამბობს. მე იმ რევოლუციიდან შემეძლო მიმეღო ყველაფერი, თუკი ფასეულ მომენტებს გვერდზე გავწევდი. პირიქით, მე იმ რევოლუციიდან ყველაფერი დავკარგე. მე ვიყავი საქართველოს სამი უმსხვილესი კომპანიის - “რუსთავი-2”-ის, “კავკასუს ონლაინის” და გაზეთი “24 საათის” მფლობელი. თუ ვინმეს ჰგონია, რომ სავაჭრო პალატის ხელმძღვანელობა ფუფუნებაა, ძალიან ცდება. მანამდე 10-15 წელი ვცხოვრობდი ისე, რომ არც ერთი სახელმწიფო სტატუსი არ მქონია. მქონდა წარმატებული ბიზნეს-პროექტები, რომლებიც ერთ დღეში დავკარგე. თუ ვინმეს უნდა ჩემს დღეში ჩადგომა, დათვალოს, რა ღირს ისინი, შეკრიბოს და ექნება წარმოდგენა. რაც შეეხება ელჩობას. ჰგონიათ, რომ ელჩის 5000-ლარიანი ხელფასია ის, რისთვისაც რევოლუციაში ვმონაწილეობდი? ისე, მე ეს თემები ნაკლებად მაღელვებს.

არ გიყვართ ეს კითხვა, მაგრამ მართალია, რომ “რუსთავი-2” საკმაოდ სოლიდური თანხის სანაცვლოდ დაგათმობინეს?

- კაცო, ეს ფული ვერავინ ნახა! ფაქტები დადონ, არ მიყვარს - “ამბობენ”. ამ სპეკულაციას ეწევა ხელისუფლება. 2007 წელს სააკაშვილი “იმედს” რკინიგზაში ცვლიდა, ანუ მასში იხდიდა მილიარდნახევარს. “რუსთავი-2” სააკაშვილს ბევრად მეტი უღირდა, “კავკასუს ონლაინი” კი - 350 მილიონი მაინც, ყველაზე მცირეს ვამბობ. ამდენ ფულს სახელოში ან მანჟეტში ვერ დამალავ. მე არც ჩემს დღევანდელ მდგომარეობაზე ვტირი, მაგრამ არც იმაზე საუბარს ვიღებ, რომ რაღაცა მივიღე. ბევრჯერ მითქვამს, რომ იძულებული გავხდი, არა თუ ბიზნესი, საქართველო დამეტოვებინა იმისთვის, რომ სამოქალაქო დაპირისპირება არ წარმართულიყო. ამ რევოლუციის შემდეგ, ყველაფერი დავთმე იძულებით და ვაპირებ, უკან დავიბრუნო. თუ მერაბიშვილს, ადეიშვილსა და სააკაშვილს აქვთ იმის მტკიცებულება, რომ რამე გადამიხადეს და მე მოვატყუე ისინი, წარმოდგინონ მტკიცებულებები.

“მაესტროსთან” უთანხმოება რითი დამთავრდა? მის დირექციას მართლა ახვევდით თავს თქვენს პოლიტიკურ ინტერესებს, წინააღმდეგ შემთხვევაში კი, დაფინანსების შეწყვეტით იმუქრებოდით?

- არანაირი უთანხმოება არ მქონია. დაახლოებით ერთი წელია, “მაესტროს” მენეჯმენტს ჩამოშორებული ვარ. ბექაურთან ჩემი ურთიერთობა არის ერთი დიდი სამწუხარო ისტორია და ძალიან გულდაწყვეტილი ვარ იმით, რაც მოხდა. მაშინ ვთქვი, რომ მას რაღაც ცუდი დაესიზმრა-მეთქი და აღარც გამიკეთებია ამაზე კომენტარი. ყველა ჩვენგანი თანაუგრძნობს “მაესტროს”, რომელსაც აქვს დაბალანსებული საინფორმაციო პოლიტიკა და არის უმძიმესი წნეხის პირობებში. ჩემი დაარსებული კომპანია დღეს აქტიურად თანამშრომლობს მასთან, მაგრამ ეს არის კომპანიის საქმე და არა - დამფუძნებლის. არანაირ საინფორმაციო პოლიტიკაში არ ჩავრეულვარ. წინასაახალწლო დღეებში ეს იყო ჩემთვის სრული შოკი. ადამიანურად, მე ამ ერთი თვის განმავლობაში დიდი შეურაცხყოფა მივიღე სრულიად დაუმსახურებლად, გული მეტკინა, მაგრამ რას იზამ, პოლიტიკოსის ჯვარია, რომ ტყუილ-მართალი აიტანოს.

გაჩეჩილაძე-ბურჯანაძის სკანდალს რაც შეეხება. მას გაგრძელება არ მიეცა და სიმართლე ჯერაც არ გარკვეულა. რატომ შეეგუა ლევან გაჩეჩილაძე მის მიმართ აგორებულ ამდენ სიბინძურეს?

- ძალიან ცუდი ფაქტია, მაგრამ არ ვფიქრობ, რომ ეს იყო მათი სკანდალი. ეს ის საქმე იყო, რომელიც სააკაშვილს ყოველ საღამოს კმაყოფილს აძინებდა. ჩვენ მაქსიმალურად ვწონიდით ყველა სიტყვას, რათა არ მომხდარიყო ამ პროცესის დამატებითი ესკალაცია. მეორეც, ჩემთვის საპატივცემულო ადამიანმა, დავით უსუფაშვილმა გარკვევით ბრძანა, რომ მან იცის, რომ ეს ასე არ ყოფილა. ამ ყველაფრით ძალიან ხალისობდა პრეზიდენტი და მისი გარემოცვა, თუმცა არავის მოსვლია აზრად, რამე ეკითხა სააკაშვილისთვის. ბურჯანაძის მიერ ინიცირებული ეს თემა იყო უდიდესი დარტყმა ზოგადად პოლიტიკური სპექტრის სტაბილურობაზე. ჩვენ ამას ძალიან განვიცდიდით, ძნელი მოსასმენი იყო და ამ შემთხვევაში, მნიშვნელოვანი იყო ნეიტრალური, ღირსეული ადამიანის პასუხი. ჩავთვალეთ, რომ ჩვენი მხრიდან არგუმენტების დადებას აზრი აღარ ჰქონდა, ვინაიდან არ ყოფილა ქაღალდის თუნდაც რაღაც ნაგლეჯი, რომელიც გაჩეჩილაძის დანაშაულზე მიანიშნებდა, მალევე ვეცადეთ ამ თემიდან გასვლა. ჩვენ, ზოგადად პოლიტიკურმა სპექტრმა დიდი ზიანი მივიღეთ ამ პროცესიდან. ეს იყო ბინძური ტექნოლოგიის ერთი კლასიკური მაგალითი. სიმართლე მაინც გაირკვევა.

ბატონო ეროსი, მთელი საუბრის მანძილზე მარწმუნებთ თქვენი პარტიის  ძლიერებასა და განსაკუთრებულობაში, მაგრამ სააკაშვილი მუდმივად წუწუნებს, არ მყავს ძლიერი ოპოზიციაო...

- სააკაშვილი მძიმე დღეშია. როგორც კი რუსთავში ჩავედით ხალხთან შესახვედრად და უდიდესი დარბაზი ხალხით გაივსო, სააკაშვილი რამდენიმე დღეში თავქუდმოგლეჯილი ჩავარდა რუსთავში, მოაწყო საჩვენებელი გამოსვლა და წამოსცდა, პენსია 100 ლარამდე გაიზრდებაო. ჩვენ ვაპირებთ აქტიურ მუშაობას და თუ სააკაშვილი ჩვენი შიშით “იმედს”, “რუსთავი-2”-ს, “მზეს” დაუბრუნებს პატრონებს, თუ საზოგადოებრივ მაუწყებელს და სასამართლოს გაათავისუფლებს, თუ ბიზნესმენებს თავს დაანებებს, მერე მივალთ იმ არჩევნებზე და მოვუგებთ, მეტი რა გავაკეთოთ? ამ პირობებს თუ არ შეასრულებს, მაინც მივალთ და მოვუგებთ!