ნაციონალების გვერდით, ამ მოწვევის პარლამენტში თავს კომფორტულად არ გრძნობს. მიაჩნია, რომ დღევანდელი ხელისუფლების ბრალია „ნაციონალური მოძრაობის“ გააქტიურება. პარლამენტიდან ნაცმოძრაობის, გაყრის მომხრეა და ამისთვის ვადამდელ საპარლამენტო არჩევნებს მოითხოვს. ამჯერად კი თბილისის მერის არჩევნებში იღებს მონაწილეობას.

წინასაარჩევნო პერიოდთან დაკავშირებით For.ge „მწვანეთა პარტიის“ ლიდერს გიორგი გაჩეჩილაძეს ესაუბრა.

რის საფუძველზე აცხადებთ, რომ დიდი ალბათობით, დავით ნარმანიასა და თქვენს შორის არჩევნების მეორე ტური გაიმართება?

- სხვათა შორის, ჩვენ ამას ვამბობდით დიდი ხნის წინ. არჩევნები რომ დაინიშნა, პოლიტიკური სიტუაციის ჩვენეულმა ანალიზმა, პოლიტიკური პარტიების შეფასებებმა აჩვენა, რომ აუცილებლად იქნება თბილისში მეორე ტური და ეს მეორე ტური შედგება „მწვანეთა პარტიასა“ და „ქართულ ოცნებას“ შორის. სულ ახლახანს ჩვენი ვარაუდი თავისი კვლევებით დაადასტურა NDI-მ. განწყობების შკალის დასაწყისში 38% აქვს დავით ნარმანიას, რაც ნიშნავს, რომ ჩვენი ნათქვამი სწორი იყო და მეორე ტური გარდაუვალი იქნება, რადგან 50% სჭირდება პირველ ტურში კანდიდატის გამარჯვებას, მეორე ადგილზე ვარ მე და სხვაობა არის ძალზე მცირე, დაახლოებით 10%-ის ფარგლებში. ბუნებრივია, ახლა უფრო დავრწმუნდით ჩვენს სიმართლეში, რომ ეს მართლაც ასე იქნება. სიმართლე გითხრათ, ჩვენ ანალიზში არასდროს არ შევმცდარვართ.

სამართლიანობისთვის უნდა ითქვას, რომ თავის დროზე ნაციონალების სასარგებლოდ როცა დაიდო NDI-ს კვლევები, ეს შედეგები არჩვნებმა არ დაადასტურა. ამ შემთხვევაში, თქვენ ლუის ნავაროს კვლევების გარდა კიდევ რას ეყრდნობით? მით უმეტეს, რომ სოციოლოგიური კვლევების ჩატარების საშუალება არ გაქვთ.

- ისე არ არის, როგორც სხვები ლაპარაკობენ. რატომღაც აქცენტი 2012 წლის გამოკითხვებზე გაქვთ გადატანილი. 2012 წლის საზოგადოებრივი ველის შესახებ ჰკითხეთ სოციოლოგებს და გეტყვიან, რომ აზრი არ ჰქონდა 2011 და 2012 წელს გამოკითხვების ჩატარებას, რადგან გამოსაკითხ პირთა ველი გაფუჭებული იყო, შეშინებულ საზოგადოებას კი სიმართლეს ვერ ათქმევინებდით. ჩვენი პარტიის წევრი დემოგრაფებიც ამავეს ამბობდნენ.

წინასაარჩევნო პერიოდში ძალიან გააქტიურებულია ნიკა მელია, თითქმის ყველა კანდიდადტზე მეტად. როგორ ფიქრობთ, ნაციონალები მათ მიმართ საზოგადოების განწყობას შეცვლიან?

- ნაციონალები გააქტიურებულები კი არ არიან, უფრო მეტიც... სხვათა შორის, NDI-მ რომ გამოქვეყნა ეს რეიტინგები და ნდობის პარამეტრები, ძალიან არ გამხარებია. არ გამიხარდა იმიტომ, რომ მივხვდი, ამის შემდეგ ჩვენ დაგვბლოკავდნენ ტელევიზიით - ასეც მოხდა. საერთოდ, მედიასთან ჩხუბი არ მიყვარს, მაგრამ დააკვირდით წამყვან ტელევიზიებს რომ უწოდებენ თავის თავს, თითქმის ყველა მერობის კანდიდატს უწყობენ გუნდის პრეზენტაციას. ამ დროს, მიუხედავად იმისა, რომ NDI-მ საზოგადოების განწყობის მხრივ მეორე ადგილზე გაგვიყვანა, საერთოდ ამოგვაგდეს ამ სქემიდან. ამიტომაც არ გამიხარდა, რომ ჩვენს შესახებ ეს მონაცემი დაფიქსირდა, ცხადი იყო, დაიწყებოდა ომი „მწვანეთა პარტიის“ წინააღმდეგ. აქედან გამომდინარე, ნაციონალები აქტიურები კი არ არიან, მათ მედია აქვთ გახსნილი და მედია აჩვენებს მათ ვითომ აქტიურობას.

რაც შეეხება გარემოს დაცვას, „მწვანეები“ ამ მხრივ ყოველთვის აქტიურობდით, მაგრამ ის ბიუჯეტი, რაც გააჩნია დედაქალაქს, რამდენად საკმარისი იქნება არა მხოლოდ გარემოს დაცვის, არამედ სხვა პროექტებისთვის?

- თქვენ აკვირდებით, რომ ზოგი იძახის, მილიონ ხეს დავრგავო, ზოგს სურს, ლამის ტყედ გადააქციოს თბილისი. რა თქმა უნდა, ამას მივესალმებით, მაგრამ ამას უნდა მოაყოლონ, საიდან იქნება დაფინანსება, თბილისის ბიუჯეტი ეყოფა თუ არა ამას. ჩვენ, როგორც ამ დარგის პროფესიონალებს, გვაქვს განსაკუთრებული პროექტი თბილისის გამწვანებისთვის, ამ მხრივ თბილისი შეიძლება საშუალო ევროპულ დონეზე ავიყვანოთ. ანუ 14-15 კვ. მეტრი ერთ სულ მოსახლეზე. ეს მოხდება ძალიან მარტივად, ისე, რომ ბიუჯეტიდან არცერთ თეთრს არ დავხარჯავთ. პირიქით, ჩვენი პროექტი საშუალებას იძლევა, გამწვანებიდან ბიუჯეტში შევიტანოთ ფული. ეს ხომ უცნაურად გეჩვენებათ? მაგრამ ეს მარტივი პროექტია. საპატრიარქოსთან ერთად ხორციელდება ეს საქმე. რამდენიმე წლის წინ პატრიარქთან შეხვედრა გვქონდა, სადაც ამ თემებზე იყო საუბარი.

გულისხმობთ იმას, რომ ახლადდაქორწინებული წყვილები რგავდნენ ხეებს?

- დიახ, თქვენ იცით ამის შესახებ. სადაც გვაქვს ამის საშუალება, საზოგადოებას ვეუბნებით ამ რეალისტურ პროექტს. საპატრიარქოში ჩვენთან ერთად მომწიფდა ეს აზრი და მარტო იმაზე საუბარი არ არის, რომ ახლადდაქორწინებულები რამდენიმე ხეს დარგავენ, პატრიარქმა მაშინ ასე ბრძანა, რატომ მარტო ახლადდაქორწინებულები? ნათლობის დროსაც გავაკეთოთ ასეთი ამბავიო. რომ ვიანგარიშოთ, ეს ადამიანთა ძალზე დიდი მასაა. ზოგი ხუთ ხეს დარგავს, ზოგი თავისი შვილის სახელობაზე დარგავს ხეს.

გარემოს გარდა, რა იქნება თქვენი პრიორიტეტი?

-  ეს ყველაფერი ერთმანეთთანაა დაკავშირებული. როდესაც ჩვენ ეკონომიას გავაკეთებთ, გამწვანების თვალსაზრისით, ბიუჯეტიდან არცერთ თეთრს არ დავხარჯავთ და ისე გავამწვანებთ ქალაქს, რომ ბიუჯეტში შემოვა საკმაოდ სერიოზული თანხები, ამ თანხებს ღარიბ მოსახლეობას დავურიგებთ. ნერგის ფული ხომ უნდა გადაიხადოს მეჯვარემ და ნათლიამ? თბილისში დაახლოებით 95 ათასი სოციალურად დაუცველი ოჯახია. წარმოიდგინეთ, რამხელა რაოდენობაა, რომელიც ოფიციალურად ითხოვს სახელმწიფოსგან შემწეობას. აქედან მხოლოდ 25 ათასი იღებს შემწეობას, სხვაობა- 65-70 ათასია, რომელიც დაჩაგრულია და ვერ იღებს დახმარებას. თუ გავიმარჯვებთ, სწორედ ბიუჯეტის ეკონომიის ხარჯზე, ახალი შემონატანების ხარჯზე გავუმართავთ ამ ხალხს ხელს და გავუთანაბრებთ იმ ადამიანებს, რომლებიც შემწეობას იღებენ. მათ დაჩაგრულად არ უნდა იგრძნონ თავი.

არ დავიწყებ ზოგად ლაპარაკს, ჩვენ კონკრეტული პროექტები გვაქვს. ეს გეხებათ თქვენც, მეც და ყველას. საქმე ისაა, რომ ჩვენ გვაქვს მასალები საქართველოში და, განსაკუთრებით, თბილისში პურის ხარისხთან დაკავშირებით. ყველამ იცის, როგორი უხარისხოა პური, არც გემო აქვს, არც სუნი, ხმება, ობდება. ეს დაკავშირებულია თურქეთიდან შემოტანილ ქიმიურ საფუართან, რომელიც მასიურად იხმარება. მარტო იმაში კი არ არის საქმე, რომ უხარისხო პური ცხვება, არამედ ეს ქიმიური საფუარი ადამიანის ორგანიზმისთვის კატასტროფაა, სხვადასხვა დაავადებას იწვევს. ევროპაში ჩატარებული კვლევების ბოლო მონაცემებით, იწვევს ონკოლოგიურ დაავადებებს. ჩვენი გეგმაა, გადავარჩინოთ საქართველოს მოსახლეობა, თბილისში აღვადგინოთ საფუარის ქარხანა. არადა, არსებობდა თბილისში საფუარის ქარხანა, რომელიც ნორმალურ, ეკოლოგიურად სუფთა ბუნებრივ საფუარს აწარმოებდა. ამასაც ჩვენ ბიუჯეტის გარეშე გავაკეთებთ. მსხვილ მეწარმეებს, ვინც პურთან არის დაკავშირებული, შევკრებთ და ვთხოვთ თავისი ფონდი შექმნან, ააშენონ წარმოება. ამით ხალხიც დასაქმდება, პურის ხარისხიც გაუმჯობესდება, მათი პრესტიჟიც გაიზრდება, ადამიანის ჯანმრთელობაც გადარჩება და ბავშვების სიცოცხლეც შენარჩუნდება. ეს ყველა შემთხვევაში უნდა გაკეთდეს. საშუალოდ, საქართველოს მოსახლეობის რაციონში 40% პურია, ე.ი. სისტემატურად ადამიანი ამ უბედურებას მიირთმევს.

დედაქალაქი იქცა ერთ დიდ სახლად, უნდა დაიწყოს თუ არა განსახლებაზე ფიქრი? დემოგრაფები ამის შესახებ აქტიურად საუბრობენ და სოფლის მეურნეობის აყვავების ხარჯზე დედაქალაქის განტვირთვაზე მსჯელობენ.

- სოფლის მეურნეობის ინტენსიური განვითარების შედეგად, თავისთავად, უნდა მოხდეს ეს პროცესი და არა ხელოვნური ჩარევით. ეკონომიკა განაპირობებს ყველაფერს. განვითარდება სოფელი, განვითარდება რაიონები, მაშინ თბილისელებიც კი წავლენ საცხოვრებლად რეგიონებში.

თქვენ აცხადებთ, რომ მერი როცა გახდებით, პარლამენტიდან წამოხვალთ, რადგან თქვენთვის აშკარაა ის საშინელება, რაც პარლამენტში ხდება. საინტერესოა, თუ გქონდათ არასაპარლამენტო ოპოზიციასთანაც კონსულტაციები, ან თუ მიიღეთ მათგან შემოთავაზება გაერთიანების თაობაზე?

- დღევანდელ პარლამენტში ყოფნა მართლაც ძალზე მძიმეა ნორმალური ადამიანისთვის. „ნაციონალური მოძრაობის“ საყვედურების მოსმენა და აგრესიული პოლიტიკის გამოხატვა როგორი ასატანია? მათ გაერთიანებას პოლიტიკური ორგანიზაცია ჰქვია, სინამდვილეში, კრიმინალთა დაჯგუფებაა. ნაციონალებმა 300 ათასი ადამიანი გაასამართლეს ქვეყანაში და ისინი პროკურატურის წნეხის ქვეშ გაატარეს. წარმოიდგინეთ, ეს რამხელა ციფრია, ეს 300 ათასი ოჯახია. სულ საქართველოში 940 ათასი ოჯახი ცხოვრობს. 10 ათას ადამიანს ქონება წაართვეს და თვითონ გადაიფორმეს. ათასი ადამიანი მოკლეს, ახლა ეს ხალხი ზის პარლამენტში და იქიდან ჭკუას გარიგებს, შენ კი ზიხარ და უსმენ. ამიტომ ძალიან ძნელია იქ ყოფნა. მირჩევნია, კონკრეტული საქმეები ვაკეთო. „მწვანეთა პარტია“ ყოველთვის კონკრეტულ საქმეებთან იყო დაკავშირებული და, თუ საზოგადოება მომცემს საშუალებას, თბილისს ამოვუდგე მხარში, სიამოვნებით გავაკეთებ ამას. მინდა, უშუალოდ ხალხთან მქონდეს ურთიერთობა და მათი პრობლემების გადაჭრაში მივიღო მონაწილეობა.

რაც შეეხება არასაპარლამენტო ოპოზიციას, არ მქონია მათთან არანაირი ურთიერთობა და სიმართლე გითხრათ, არც მათ ჰქონიათ ჩემთან მოსვლის სურვილი. „მწვანეთა პარტიას“ აქვს იმის შესაძლებლობა, დამოუკიდებლად იბრძოლოს და მიაღწიოს სერიოზულ შედეგებს. ჩვენ გვყავს საუკეთესო პროფესიონალთა გუნდი და იმედი მაქვს, თბილისის საკრებულოში უმრავლესობით შეიძლება მოვიდეთ, მერის პოსტიც მივიღოთ, უმრავლესობაც ჩვენი იყოს და უფრო იოლად გადავჭრათ ჩვენი საკითხი.

იყო პერიოდი, როცა სხვა პიროვნების სასარგებლოდ მოხსენით კანდიდატურა. ამ არჩევნებში ეს გამორიცხულია?

- რომელი პიროვნების?

თუნდაც ლევან გაჩეჩილაძის შემთხვევა.

- ეს ისეთი მნიშვნელოვანი რაღაც იყო, ორი გაჩეჩილაძე მოხვდა საარჩევნო კანდიდატად. ან მე უნდა მომეხსნა კანდიდატურა, ან-  ლევანს. ამიტომ, როგორც ყოველთვის, მე ავიღე ჩემს თავზე პასუხისმგებლობა სახელმწიფო ინტერესებიდან გამომდინარე. იქნებ, ამით მივხმარებოდი ოპოზიციას, რომ გაემარჯვა. სამწუხაროდ, ეს ვერ მოხერხდა, თორემ, მე არასდროს, არავის სასარგებლოდ კანდიდატურა არ მომიხსნია.

გამოდის, დღეს ძირითად მეტოქედ მხოლოდ ნარმანიას აღიქვამთ?

- რაც კვლევებმა აჩვენა, ნარმანიაა ჩემი და „ქართული ოცნებაა“ „მწვანეთა პარტიის“ მეტოქე ამ არჩევნებში, არა მარტო თბილისში, არამედ ბევრ რაიონშიც. ჩვენ ბევრ რაიონში ვმონაწილეობთ არჩევნებში. გადაჭარბებული არაფერი მიყვარს და თქვენ ნახავთ, ჩვენ მერებიც გვეყოლება და ზოგიერთ რაიონში გამგებელსაც გავიყვანთ.

რა დაფინანსებით ახერხებთ წინასაარჩევნო კამპანიის ჩატარებას, რაიონებში გასვლას?

- ეს „მაგარია“, არავითარი დაფინანსება არ გვაქვს, ვინც გვყავს, ზოგი მაჟორიტარია, შეგიძლიათ, შეხვიდეთ აუდიტის სამსახურის საიტზე და ნახავთ, ზოგს ასი ლარი მოაქვს, ზოგს- 200. სხვებთან შედარებით, მე ცოტა მაღალი ხელფასი მაქვს და ამ ხელფასიდან ბენზინის ფულს ვახერხებთ. ერთადერთი, შეიძლება ორგვერდიანი ფლაერები დავბეჭდოთ, რომ საზოგადოებას № 6 შევახსენოთ.

როგორც ვიცი, უსაფრთხოების თვალსაზრისით, ნაცმოძრაობის დროს პარტიაში ახალი წევრების მიღების პროცესი შეაჩერეთ. ახლა ეს პროცესი როგორ მიმდინარეობს?

- აქტიურად და მასიურად. სიმართლე გითხრათ, აქაც ვფრთხილობთ, რადგან უამრავი ხალხია „ოცნებიდან“ წამოსული, „ოცნებაში“ შემავალი პარტიებიდან გადმოსული და ვცდილობთ, პროფესიონალური თვალსაზრისით, რაც პარტიის პერსპექტივისთვისაა მნიშვნელოვანი, ისინი მივიღოთ. ცხადია, ნაცების დროს ვშიშობდით, რომ საეჭო ხალხი არ შემოეგზავნათ.

15 ივნისს სამართლიან არჩევნებს ელოდებით?

- ამას შედეგები გვიჩვენებს. თუ დემოკრატიაზეა საუბარი, შეხედონ ევროპარლამენტის შედეგებს. ჩვენმა მეგობრებმა ევროპის პარლამენტში მეოთხე ადგილი დაიკავეს, იქ მეოთხე ფრაქცია იქმნება, ხოლო, თუ სხვებთან გაერთიანდნენ, შეიძლება, მეორე ფრაქციაც კი შექმნან. თუ საქართველოშიც იგივე მოხდება, „მწვანეთა პარტია“ გაიმარჯვებს და თბილისში მერი იქნება, ეს ხომ დემოკრატიის ზეიმი იქნება საქართველოსთვის. ამიტომ ხელისუფლებას მინდა ვუთხრა, არ არის აუცილებელი, მაინცდამაინც ერთი პარტიით იყოს დაკომპლექტებული მთელი საქართველო. არცერთ ევროპულ ქვეყანაში ასე არ ხდება. სკამის ინტერესებიდან არ უნდა გამოვიდეთ.

როგორ ფიქრობთ, თქვენი ოპონენტი კანდიდატების დაპირებები რამდენად რეალურია?

- ჩემს აზრს კი არ მოგახსენებთ, არამედ - საზოგადოების აზრს. სიტყვა „დაპირებებზე“ ადამიანებს უკვე გული ერევათ. პოლიტიკაში 1991 წლიდან ვარ, მას შემდეგ არც ლოზუნგები იცვლება, არც თემები, სულ ზოგადი ლაყალუყია.

თქვენი აზრით ვინ იყო თბილისის ღირსეული მერი?

- მე ვფიქრობ, ყველაზე ნორმალური მერი მაინც ნიკო ლეკიშვილი იყო, ძალზე მძიმე მდგომარეობაში ჩაიბარა თბილისი და, ასე თუ ისე, შეძლო პრობლემების მოგვარება. თუმცა, მაშინ, არც შუქი იყო, არც გაზი. ამიტომ, სამომავლოდ, ქალაქის იდეალური მერი იქნება „მწვანეთა პარტიის“ წარმომადგენელი. ამას საზოგადოება დაინახავს.